ކުރިޔަށް އޮތް ރިޔާސީ އިންތިޚާބު ކާމިޔާބު ކުރެވިއްޖެނަމަ، ރާއްޖެއަށް ބޮޑު 50 ބަދަލެއް ގެނެސް ދެއްވާނެކަމަށް ވައުދުވަމުން އުމަރު ނަސީރު 2023 ވަނަ އަހަރުގެ ރިޔާސީ ކެމްޕޭން ލޯނޗު ކުރައްވައިފިއެވެ.
މިގޮތުން "އާ މިސްރާބަކަށް، އުމަރު 2023″ ރިޔާސީ ކެމްޕޭން ލޯނޗު ކުރުމަށް ރޭ ސަލްޓަން ޕާކުގައި ސަޕޯޓަރުންނާއެކު ބޭއްވި ޖަލްސާގައި ވާހަކަ ދައްކަވަމުން އުމަރު ވިދާޅުވީ ދިވެހިރާއްޖޭގެ ރައީސްކަން ކުރެއްވި ބޭފުޅުން އެއް އޮޑިއެއްގައި، އެހެންނަމަވެސް މިސްރާބެއް ނެތި ދުއްވަމުން ދާތާ 15 އަހަރު ފާއިތުވެގެން ހިގައްޖެ ކަމަށާއި، މިއަދު މިއީ ދިވެހި ރައްޔިތުން އާ މިސްރާބަކަށް ދަތުރު ފަށަން ޖެހިފައިވާ ވަގުތު ކަމުގައެވެ.
އަދި އުމަރުވިދާޅުވީ އޭނާ ވެރިކަމަށް ވަޑައިގަންނަވަނީ ބޮޑު 50 ބަދަލަކާއެކީ ކަމަށާއި، އޭގެ ތެރެއިން ރޭގެ ޖަލްސާގައި އޭނާ އިއުލާން ކުރައްވާފައިވަނީ 25 ވަރަކަށް ބަދަލު ކަމުގައެވެ.
އޭގެ ތޭރޭގައި ހިމެނޭ ބައެއް ކަންކަމަކީ، ރާއްޖޭގެ އަކުއަ ކަލްޗަރ ތަރައްގީ ކުރުމަށް 200 މިލިއަން ރުފިޔާގެ ބަޖެޓެއް ޚާއްސަ ކުރުމާއި، މިފްކޯ ޕްރައިވެޓައިޒް ކުރުމާއި، ރޯމަސް ރާއްޖެއިން ބޭރުކުރުން ހުއްޓުމަކަށް ގެނެސް، ވެލިއު އެޑް ކޮށްގެން ރާއްޖެއިން މަހުގެ އުފެއްދުން ބޭރުކުރަން ފެށުމާއި، ފަތުރުވެރިކަމުގެ ސިނާއަތުގެ އިސް މަގާމްތަކަށް ދިވެހިން ތަމްރީން ކުރުމަށް 100 މިލިއަން ރުފިޔާގެ ބަޖެޓެއް ކަނޑައެޅުމާއި، ރިސޯޓުތަކުގެ އިސް މަގާމްތަކުގައި ބޭރު މީހުންނަށް ދެމި ތިބެވޭ އެންމެ ދިގު މުއްދަތަކަކީ 2 އަހަރުކަމުގައި ހަމަޖެއްސުން ހިމެނެއެވެ.
އަދި އޭގެ އިތުރުން ރާއްޖޭގެ އެންމެ އުތުރުގައި ޓްރާންޝިޕްމަންޓް ބަނދަރެއް ގާއިމް ކުރުމާއި، އައްޑެއަކީ ފްރީ ޓްރޭޑް ޕޯޓު ޒޯންއަކަށް ހެދުމާއި، ޓެކްސް ކުޑަ ކުރުމުގެ އިތުރުން، އިންކަން ޓެކްސް ނެގުން ހުއްޓާލާ އޭގެ ބަދަލުގައި މުދަލުގެ ޒަކާތް ނަގަން ފެށުމާއި، ޖީއެސްޓީ ދެއްކުމަށް މިހާރު ކަނޑައެޅިފައި އޮންނަ 1 މިލިއަން ރުފިޔާގެ މިންގަޑު 3 މިލިއަން ރުފިޔާއަށް މައްޗަށް ޖެއްސުމާއި، ވިޔަފާރި ކުރާ ސަރުކާރުގެ ކުންފުނިތައް ހިންގުން ހުއްޓާލާ އެވިޔަފާރިތައް އަމިއްލަ ފަރުދުންނަށް ދޫކޮށްލާނެކަމަށްވެސް އޭނާގެ ރިޔާސީ ވައުދުތަކުގެ ތެރޭގައި އުމަރު ހިމަނާފައި ވެއެވެ.
އޭގެ އިތުރުންވެސް ރޭގެ ޖަލްސާގައި އުމަރުވަނީ ފެނަކައިން ރާއްޖޭގެ ރަށްތަކުގައި ހިންގަމުންދާ އިންޖީނުގެތައްވެސް ރަށްރަށުގެ ކައުންސިލްތަކާއި ހަވާލު ކުރައްވާނޭކަމަށް ވައުދުވެފައެވެ.
ރިޔާސީ ކެމްޕޭން ލޯނޗު ކުުރުމަށް ބޭއްވުނު މި ޖަލްސާގައި އުމަރު ވިދާޅުވީ، އިންޑިއާގެ ހުޅަނގު ދެކުނު ބިތުން އެގައުމަށް ކުރިމަތިވެދާނޭ ސަލާމަތީ ނުރަކަލެއްގެ ކަންބޮޑުވުން އިންޑިއާގަ އޮތް ކަމަށާއި، އަދި އެ ސެކިއުރިޓީގެ ޔަގީންކަން އޭނާގެ ސަރުކާރެއްގަ އިންޑިއާއަށްވެސް، އަދި އަވައްޓެރި އެހެން ގައުމުތަކަށްވެސް އޮންނާނޭ ކަމުގައެވެ. އެހެންނަމަވެސް ރާއްޖޭގައި އިންޑިއާ ސިފައިން ތިބޭ ތިބުމަށް ނިމުން ގެންނަވާނޭކަމަށްވެސް އުމަރު ވިދާޅުވިއެވެ.
އޭނާ ވިދާޅުވީ އިންޑިއާއިން ރާއްޖެއަށް ދެމުންދާ ލޯންތަކަކީ އެގައުމުގެ ސިފައިން ދެން އަންނަ ސަރުކާރަކަށްވެސް ރާއްޖެއިން ބޭލުމުގެ ފުރުސަތު ފަހިވެގެން ދިޔަ ނުދިނުމުގެ ގޮތުން ކުރަމުންދާ ކަމެއް ކަށެވެ. އެހެންނަމަވެސް ލޯންތައް ހުއްޓަސް އިންޑިއާ ސިފައި ރާއްޖެއިން ބާލުވާނެކަމުގައިވެސް އުމަރު ވިދާޅުވިއެވެ.
ދިވެހިރާއްޖެ ބަނގުރޫޓު ކޮށްލިއަސް އިންޑިއާ ސިފައިން އަޅުގަޑު ބާލާނަން. އަޅުގަޑު ނޭވާވެސް ނުލާނެ އެކަން ނުކޮށެއް، އިނގޭތޯ.
އުމަރު ވިދާޅުވިއެވެ.
އަދި އޭގެ އިތުރުން އޭނާގެ ވެރިކަމެއްގައި އޮންނާނީ ސައިޒުން ކުޑަ ރައްޔިތުންގެ މަޖިލީހެއްކަމުގައި ވިދަޅުވަމުން އުމަރު ވިދާޅުވި، އެންމެ ގިނަވެގެންވެސް މަޖިލިހުގައި ތިއްބަވާނީ 50 މެމްބަރުން ކަމުގައެވެ. އަދި ދާއިރާގެ ރައްޔިތުން ބޭނުންވެއްޖެ ހާލަތެއްގައި، މެމްބަރުން މަގާމުން ދުރުކުރުމުގެ އެފުސަތު ރައްޔިތުންނަށް އޮންނަ ގޮތަށް "ރީކޯލް" ވޯޓު ތައާރަފް ކުރައްވާނޭކަމަށްވެސް އުމަރުވަނީ ވައުދު ވެފައެވެ.
މިޖަލްސާގައި އުމަރު ވިދާޅުވީ އޭނާ ވެރިކަން ނިންމަވާނީ، ސުވަރުގެ ދެވޭވަރަށް ވެރިކަން ކުރެއްވުމަށް ފަހުގައި ކަމުގައެވެ. އުމަރުގެ ރިޔާސީ ކެމްޕޭންގެ ކެމްޕޭން މެނޭޖަރަކަށް ހަމަޖައްސަވާފައިވަނީ 2013ގެ ރިޔާސީ އިންތިޚާބުގެ ކެމްޕޭންގަވެސް އޭނާގެ ކެމްޕޭން މެނޭޖަރުކަން ކުރެއްވި މާޒު އަހުމަދު ސަލީމެވެ.
