ނޯތު ޕޮލިސް ރީޖަންގައި މަސައްކަތްކުރާ ފުލުހުން ހެއްކާ ބެހޭ ގާނޫނަށް އަހުލުވެރި ކުރުވުމުގެ ޕްރޮގްރާމެއް ޕްރޮސެކިއުޓަރ ޖެނެރަލް އޮފީހުން ހިންގައިފިއެވެ.
ޖަނަވަރީ 31 އަދި ފެބްރުއަރީ 1 ވަނަ ދުވަހު ރ. އުނގޫފާރުގައި ކުރިއަށް ގެންދިޔަ މި ޕްރޮގްރާމުގައި ހެއްކާ ބެހޭ ގާނޫނުގައި ހުރި ޖިނާއީ އަދުލުގެ ނިޒާމާ ގުޅުންހުރި މާއްދާތަކަށް ފުލުހުން އަހުލުވެރިކުރުވުމަށް މައުލޫމާތު ހިއްސާކޮށްފައިވެއެވެ. އަދި އެ ގާނޫނާ އެއްގޮތްވާ ގޮތުގެ މަތިން ފުލުހުންގެ މަސައްކަތްތައް ކުރިއަށް ގެންދާނެގޮތުގެ މައުލޫމާތު ހިއްސާކޮށްފައިވެއެވެ.
ނޯތު ޕޮލިސް ރީޖަންގައި ހިމެނޭ ނ. ރ. ބ އަދި ޅ. އަތޮޅު ކޮމާންޑަރުންނާއި އެ އަތޮޅުތަކުގެ ޕޮލިސް ސްޓޭޝަންތަކުގެ އިންޗާޖުންނާއި އިންވެސްޓިގޭޝަން އޮފިސަރުންނާއި ޓީމް ލީޑަރުންނާއި ފްރަންޓް ލައިން އޮފިސަރުން ހިމެނޭހެން 79 ފުލުހުންނާއި އެ ހަތަރު އަތޮޅުގެ ޕީޖީ ގޮފީގެ ހަތް ޕްރޮސެކިއުޓަރުން މި ޕްރޮގްރާމުގައި ބައިވެރިވިކަމަށް ފުލުހުން ބުނެފައި ވެއެވެ.
މި ޕްރޮގްރާމުގައި މައުލޫމާތު ދެއްވީ ޕްރޮސެކިއުޓަރ ޖެނެރަލް އޮފީހުގެ ޓްރެއިނަރުންނާއި ހައިކޯޓުގެ ރިޓަޔަރޑް ޗީފް ގާޒީ ހާޠިފް ހިލްމީ އާއި ޔޫއެސް ޑީއޯޖީ ރެޒިޑެންޓް ލީގަލް އެޑްވައިޒަރ ޔޭ-ޓިންގް ވޫ އެވެ.
