މި ސަރުކާރުން ކުރިޔަށް ގެންދާ ބިންވެރިޔާ ސްކީމުގެ ދަށުން މާލޭ ސަރަހައްދުން ދޫކުރާ 3،000 ގޯތި ހައްގުވާ މީހެއް ކަމުގައި ބަލާ އުސޫލުގެ މައްސަލަ ހައި ކޯޓުން ބަލައި ނުގަމުން މައްސަލަ ސުފްރިމް ކޯޓަށް ހުށަހަޅައިފިއެވެ.
ގާނޫނީ ވަކީލް ޝިހާދު އިބްރާހިމާއި ވަކީލް ހަސަން ފަލާހު ހައި ކޯޓަށް ހުށެހެޅި މިމައްސަލަ ހައި ކޯޓުން ބަލައިގެންފައި ނުވަނީ މިއީ ދުސްތޫރީ މައްސަލައެއް ނޫންކަމަށް ނިންމުމަށް ފަހުއެވެ. ދެވަކީލުން މައްސަލަ ހައި ކޯޓަށް ހުށަހެޅީ ގޯތި ދިނުމުގައި މާލޭ މީހުން ކަމުގައި ބަލާ މިންގަނޑު ބާތިލްކުރުމަށެވެ.
މައްސަލަ ހައި ކޯޓުން ބަލައި ނުގަތުމުން ސުޕްރިމް ކޯޓަށް މައްސަލަ ހުށަހަޅާފައިވަނީ މި ހަފްތާގެ އާދީއްތަ ދުވަހުއެވެ. އެހެންނަމަވެސް މިމައްސަލަ ސުޕްރިމް ކޯޓުން އަދި ބަލައިގަތްކަމެއް އެނގިފައެއް ނުވެއެވެ.
މިސަރުކާރުން ކުރިޔަށް ގެންދާ ބިންވެރިޔާ ސްކީމުގެ ދަށުން ދޫކުރާ ގޯތިތަކަށް ކުރިމަތި ލުމުގައި އެންމެ ފުރަތަމަ މާލޭ މީހެއްގެ ގޮތުގައި ބެލުމަށް ހަމަޖައްސާފައިވަނީ އެއްވެސް އިރަކު މާލެ ފިޔަވާ ރާއްޖޭގެ އެހެން އެއްވެސް ރަށެއްގައި ރަޖިސްޓްރީ ވެފައި ނުވާ މީހެއް ކަމުގައި ވުމެވެ.
އެހެންނަމަވެސް މި އުސޫލަށް ބަދަލު ގެނެސް ފަހުން ހަމަޖައްސާފައިވަނީ، މާލޭ މީހެއް ކަމުގައި ބަލާނީ ކުރިން އެހެން ތަނެއްގައި ރަޖިސްޓްރީ ވިޔަސް މިހާރު މާލޭގައި ރަޖިސްޓްރީވެފައިވާ އަދި އެ މީހެއްގެ މަންމަ ނުވަތަ ބައްޕައަކީ މާލޭ މީހެއް ނަމަ، އެއީ މާލޭ މީހުން ކަމުގައި ބަލާ ގޮތަށެވެ.
