ބޭންކް އޮފް މޯލްޑިވްސް ގެ 40 ވަނަ އަހަރީ ދުވަހާ ގުޅުވައިގެން ހިންގުނު މުޖުތަމައަށް ފައިދާ ހުރި މުހިންމު 12 ހަރަކާތުގެ ތެރެއިން ތައާރަފް ކުރި ސްޕޯޓްސް ސްކޮލާޝިޕް ލިބޭ އެތުލީޓުން ހޮވައިފިއެވެ.
މި ސްކޮލާޝިޕް ހުޅުވާލެވުނީ އެތުލީޓުންގެ ހުނަރު ކުރިއަރުވައި، ކުޅިވަރުގައި ފުރިހަމަ ކާމިޔާބީއެއް ހޯދުމުގައި އެހީތެރިވުމުގެ ގޮތުންނެވެ. މި ޕްރޮގްރާމުގެ ދަށުން ރާއްޖޭގެ މޮޅު އެތުލީޓުންނަށް ހުރިހާ ޚަރަދަކާއެކު ރާއްޖޭން ބޭރުގެ ހައި ޕަރފޯމަންސް ޓްރެއިނިންގ ސެންޓަރުތަކުގައި ތަމްރީން ހޯދުމުގެ ފުރުސަތު ފޯރުކޮށްދެވިގެން ދާނެއެވެ.
ސްކޮލާޝިޕަށް ހޮވުނު އެތުލީޓުން އިއުލާންކުރަން އިއްޔެ މާލެ ޓޭބަލް ޓެނިސް ހޯލުގައި ކުރިޔަށް ދިޔަ ހަފްލާގައި އޮލިމްޕިކް ކޮމިޓީގެ ރައީސް، މުޙައްމަދު ޢަބްދުއްސައްތާރުއާއި ބީއެމްއެލްގެ ސީއީއޯ އަދި މެނޭޖިންގ ޑައިރެކްޓަރ، ކާރލް ސްޓުމްކައާއި މޯލްޑިވްސް އޮލިމްޕިކް ކޮމިޓީގެ އޮފިޝަލުންގެ އިތުރުން ޤައުމީ ކުޅިވަރު އެސޯސިއޭޝަންގެ ފަރާތުންވެސް ވަނީ ބައިވެރިވެފައެވެ.
ބީއެމްއެލް ސްޕޯޓްސް ސްކޮލާޝިޕް ލިބުނު އެތުލީޓުންނަކީ:
| އެތުލީޓް | ކުޅިވަރު | ޓްރެއިނިންގ ސެންޓަރ | |
| މަރިޔަމް ރޫޔާ އަލީ | އެތްލެޓިކްސް | ކިންގްސްޓަން، ޖެމައިކާ | |
| މުހައްމަދު މިންހާލް ޝާމިން | އެތްލެޓިކްސް | ކިންގްސްޓަން، ޖެމައިކާ | |
| މުޙައްމަދު ސާލިމް އަބްދުލް ސަމަދު | ބެޑްމިންޓަން | ޑުބާއީ، ޔުނައިޓެޑް އަރަބް އެމިރޭޓްސް | |
| ޝުބާ މުޙައްމަދު ޝަރީފް | ބެޑްމިންޓަން | ޑުބާއީ، ޔުނައިޓެޑް އަރަބް އެމިރޭޓްސް | |
| ފާތިމަތު ޖުމާނާ ނިމާލް | ޓޭބަލް ޓެނިސް | ޒަޤްރިބް، ކްރޯއޭޝިއާ | |
| މޫސާ މުންސިފް އަޙްމަދު | ޓޭބަލް ޓެނިސް | ޒަޤްރިބް، ކްރޯއޭޝިއާ | |
| ލަޔާން މުޙައްމަދު ޝާމިން | ޓެނިސް | ބާސެލޯނާ، ސްޕެއިން |
ބީއެމްއެލްއިން ހާމަ ކޮށްފައިވާ ގޮތުގައި މި ސްކޮލާޝިޕް އަށް ހުޅުވާލެވިފައިވަނީ ގައުމީ ކުޅިވަރު އެސޯސިއޭޝަންތަކަށެވެ. އަދި ސްކޮލާޝިޕް އަށް އެތްލީޓުން ހޮވާފައިވަނީ މޯލްޑިވްސް އޮލިމްޕިކް ކޮމިޓީއިންނެވެ.
ކޮމެންޓު ފޮނުވާ