އެމްޑީޕީއަށް ކުރިޔަށްއޮތް ރިޔާސީ އިންތިޚާބު ކާމިޔާބު ނުކުރެވިއްޖެނަމަ އޭގެ ފަހަށް އޮތް ރައްޔިތުންގެ މަޖިލިހުގެ އިންތިޚާބުވެސް އަދި ކައުންސިލް އިންތިޚާބުވެސް އެމްޑީޕީއަށް ކާމިޔާބު ނުކުރެވިދާނެ ކަމަށާއި، އެހެންކަމުން ކުރިޔަށް އޮތް ރިޔާސީ އިންތިޚާބު އެމްޑީޕީން ކާމިޔާބު ކުރާންޖެހޭ ކަމުގައި ރައީސް ސާލިހު ވިދާޅުވެއްޖެއެވެ.
މިއަދު ފުވައްމުލަކަށް ކުރައްވަމުން ގެންދަވާ ދަތުރުފުޅުގައި، އެ ރަށުގައި ރައީސް ސާލިހުގެ ކެމްޕޭން އޮފީސް ހުޅުވުމަށް ބޭއްވުނު ރަސްމިއްޔާތުގައި ވާހަކަ ދައްކަވަމުން ރައީސް ސާލިހު ވިދާޅުވީ ފާއިތުވެދިޔަ ތަނުގައި ރައްޔިތުންގެ މަޖިލިހުގެ އިންތިޚާބުވެސް އަދި ކައުންސިލް އިންތިޚާބުވެސް ކާމިޔާބު ކޮށްފައިހުރީ ރިޔާސީ އިންތިޚާބު ކާމިޔާބު ކުރި ޕާޓީތަކުން ކަމަށެވެ.
އޭގެ ހެއްކެއްގެ ގޮތުގައި ރައީސް ސާލިހު ދެއްކެވީ 2018 ގެ ރިޔާސީ އިންތިޚާބަށްފަހު އެމްޑީޕީން ރައްޔިތުންގެ މަޖިލިހުގެ އިންތިޚާބު ކާމިޔާބު ކުރުމާއި، އަދި އޭގެ ކުރީގެ ވެރިކަންތަކުގައި އޭރުގެ ޑިއާރުޕީން އޭރުގެ މަޖިލިސް އިންތިޚާބާއި އަދި ކައުންސިލް އިންތިޚާބުތައް ކާމިޔާބު ކުރި ކުރުމެވެ.
އެހެންކަމުން 2023ގެ ފަހުން އަންނަ މަޖިލިސް އިންތިޚާބާއި އަދި ކައުންސިލް އިންތިޚާބުތަކާއި ދޭތެރޭ ވިސްނާންވެސް ޖެހޭނީ 2023ގެ ރިޔާސީ އިންތިޚާބު ކާމިޔާބު ކުރުމަށް ފަހު ކަމަށާއި، މަގުމަތި ނުވެ ރިޔާސީ އިންތިޚާބު ކާމިޔާބު ކުރެވެން އޮތީ ކުރިޔަށް އޮތް ޕްރައިމަރީގައި ކެނޑިޑޭޓު ނަމްބަރު 2 އަށް ވޯޓު ދެއްވައިގެން ކަމުގައިވެސް ރައީސް ސާލިހު ވިދާޅުވިއެވެ.
ރައީސް ސާލިހުގެ ކެމްޕޭން އޮފީސް ހުޅުވުމަށް ބޭއްވުނު މި ރަސްމިއްޔާތުގައި ވާހަކަ ދައްކަވަމުން ރައީސް ސާލިހުވަނީ ފުވައްމުލަކުގައި ސަރުކާރުން ކުރިޔަށް ގެންދާ ތަރައްގީގެ މަޝްރޫއުތަކަށް ބައްލަވާލައްވާފައެވެ. މިގޮތުން އެރަށުގެ ހޮސްޕިލްގެ މަސައްކަތާއި، ހޮސްޕިޓަކުގައި ސީޓީ ސްކޭންގެ ޚިދުމަތް ގާއިމް ކުރުމާއި އަދި ބަނދަރުވެސް ރައްޔިތުންގެ އެދޭގޮތަށް ކުރިޔަށް ގެންގޮސްދެއްވާނެ ކަމުގައި ރައީސް ސާލިހު ވިދާޅުވިއެވެ.
ކޮމެންޓު ފޮނުވާ