ރައީސް ވިދާޅުވަނީ މިހާރު ޖެހިގެން މިދަނީ އެއްދޮނެއްގައި ދެބުޅިކަމަށް

ކުރިޔަށް އޮތް ރިޔާސީ އިންތިޚާބަކީ މިދާ ބާރުމިނުގައި ގޮސް ނުނިމިހުރި ހުރިހާކަމެއް ނިންމާލުމަށް އެމްޑީޕީއަށް އޮތް ފަހު ފުރުސަތު ކަމަށާއި، މިހާރު މި ކުރާ ކަންކަމުން އެއް ދޮނުގައި އެޖެހެނީ ދެބުޅި ކަމުގައި ރައީސް ސާލިހު ވިދާޅުވެއްޖެއެވެ.

ކުރިޔަށްއޮތް އެމްޑީޕީގެ ޕްރައިމަރީ ކެމްޕޭންގައި ރޭ "އެމްޑީޕީ ކުރިޔަށް" ކެމްޕޭންގެ ފަރާތުން އާރޓިފިޝަލް ބީޗް ސަރަހައްދުގައި ބޭއްވި ބޮޑު ޖަލްސާގައި ވާހަކަ ދައްކަވަމުން ރައީސް ސާލިހުވީ މިހާރު ކުރެވެމުންދާ މަސައްކަތްތަކުގެ ނަތީޖާއަކީ އަތޮޅުތަކުގެ ތަރައްގީ ވަށާޖެހި އޭގެ ލުއި މާލެއަށް ލިބިގެން ދިއުން ކަމުގައެވެ.

އަދި އޭގެ ނަތީޖާއަކީ މާލެއަކީ ހަމަ ނޭވާލެވޭ ތަނަކަށް ވެގެން ދިއުން ކަމުގައެވެ.

ކުރިޔަށްއޮތް ރިޔާސީ އިންތިޚާބަކީ މިދާ ބާރުމިނުގައި ގޮސް ނުނިމި ހުރި ހުރިހާކަމެއް ނިންމާލުމަށް އެމްޑީޕީއަށް އޮތް ފަހު ފުރުސަތު. މިކުރާ ކަންކަމުން އެއް ދޮނުގައި އެޖެހެނީ ދެބުޅި. އަތޮޅުތަކުގެ ތަރައްގީ ވަށާޖެހި އޭގެ ލުއި މާލެއަށް ލިބުން. މާލެއަކީ ހަމަނޭވާ ލެވޭ ތަނަކަށްވުން. ހާސްކަމުން ނެއްޓި ހަމަޖެހޭ ދިރިއުޅުމެއް މުޅި ރާއްޖެއަށް ލިބިގެންދިއުން.

މިހާރު ރާއްޖޭގައި ކުރިޔަށްދާ ތަރައްގީގެ މަޝްރޫޢުތަކުގެ ނަތީޖާއެއްގެ ގޮތުން ރާއްޖެތެއަށްވެސް ހަމަޖެހުން ލިބިގެންދާއިރު، އޭގެ ފައިދާ މާލެއަށްވެސް ކުރާނެކަން ފާހަގަ ކުރައްވަމުން ރައީސް ސާލިހު ވިދާޅުވިއެވެ.

ރޭ އާރޓިފިޝަލް ބީޗުގައި ކުރިޔަށްދިޔަ " އެމްޑީޕީކުރިއަށް" ކެމްޕޭންގެ ބޮޑު ޖަލްސާގައި ވާހަކަ ދައްކަވަމުން ރައީސް ސާލިހު ވިދާޅުވީ ދިވެހި ރައްޔިތުންނަށް ހައްގުވަނީ ހަމަޖެހިގެން އުޅުމާއި، ތައުލީމު ލިބޭނެ މަގެއް ތަނަވަސް ވުމާއި، ރަގަޅު ބޯހިޔާވަހިކަމެއް ލިބުމާއި ހަމަހަމަ އުފާވެރި ދިރި ދިރިއުޅުމެއް ލިބުން ކަމުގައެވެ.

މިގޮތުން ރައީސް ސާލިހު ވިދާޅުވީ ހުއްޓި ތިބެވޭކަށް ނެތް ކަމަށާއި އެމްޑީޕީ ދާންޖެހޭނީ ކުރިއަށް ކަމަށެވެ.

ރައީސްގެ ވާހަކަ ފުޅުގައި ވިދާޅުވީ މިސަރުކާރުން 65،529 ދަރިވަރުން ހިލޭ ޑިގްރީ ސްކީމުން ކިޔަވާ ނިމިއްޖެކަމަށާއި، 10 ހާހަށްވުރެ ގިނަ މުދައްރިސުންގެ މުސާރަ ބޮޑު ކުރެވިއްޖެ ކަމަށާއި، 5 ސަރަހައްދުގައި ސީޓީ ސްކޭންގެ ޚިދުމަތް ތައާރަފް ކުރެއްވިއްޖެ ކަމުގައެވެ.

އޭގެ އިތުރަށް 137 ރަށަކަށް އެމްބިއުލާންސް ފޯރުކޮށް ދެވިއްޖެ ކަމަށާއި، 13،000 އަށްވިރެ ގިނަ ފަތުރުވެރި މުވައްޒަފުންނަށް މިނިމަމް ވޭޖްގެ ފައިދާ ލިބިއްޖެ ކަމަށާއި، 16 ހާހަށްވުރެ ގިނަ ފްލެޓް މަޝްރޫއުތައްވެސް ރާއްޖޭގެ އެކި ކަންކޮޅުތަކުގައި ކުރިޔަށްދާ ކަމުގައިވެސް ރައީސް ވިދާޅުވިއެވެ. ރައީސް ސާލިހު ވިދާޅުވީ މާލޭ ސަރަހައްދުގައި އެކަނިވެސް 7،590 ހައުސިން ޔުނިޓް ތަރައްގީ ވަމުންދާ ކަމުގައިވެސް ރައީސް ސާލިހު ވިދާޅުވިއެވެ.

މާލޭގެ ރައްޔިތުންނަށް އިން ކަނޑާ އިން ވަކިކޮށް ގޯތި ދޭނީ އަޅުގަޑު. ދައުރެއްގެ ތެރޭގައި ފުރަތަމަ ފަހަަރަށް މާލޭގައި ބިންގަލުން ފަށާ ނިންމާ ފްލެޓްގެ ތަޅުދަނޑި އަތަށް ދޭނީ އަޅުގަޑު.

އެމްޑީޕީގެ ގިނަ އަދަދެއްގެ މެމްބަރުން ހާޒިރުވި މި ޖަލްސާގައި ރައީސް ސާލިހު ވިދާޅުވިއެވެ.

ރައީސް ސާލިހު ވިދާޅުވީ މިސަރުކާރުން ހުޅުމާލޭގައި އަޅާ ފްލެޓްތައް ތަފާތުވާނެ ކަމަށާއި، ރައްޔިތުންގެ ބޭނުންތައް މިސަރުކާރުން ހާސިލް ކޮށްދެއްވާނެ ކަމުގައެވެ. އަދި ސަރުކާރުގެ އަމާޒަކީ 20-30 މިނިޓުން ވާސިލް ވެވޭ ގޮތަށް އެއަރޕޯޓުތައް އެޅުން ކަމުގައި ވިދާޅުވަމުން ރައީސް ވިދާޅުވީ ހަނިމާދޫ އެއަރޕޯޓު ބައިނަލްއަގުވާމީވެގެން ދިޔަގޮތަށް އައްޑޫގައިވެސް 1.5 މިލިއަން ޕަސެންޖަރުންނަށް ބޭނުން ކުރެވޭވަރު ބައިނަލްއަގުވާމީ ފެންވަރުގެ އެއަރޕޯޓެއް ތަރައްގީ ކޮށްދެއްވާނެކަމުގައެވެ.

އަދި އެކަންކަން ފުރިހަމަ ކުރުމަށް އަނަން 28ވަނަ ދުވަހު އެމްޑީޕީގެ ހުރިހާ މެމްބަރުން ކެނޑީޑޭޓް ނަމްބަރު 2 އަށް ވޯޓު ދެއްވުމަށް ރައީސް ވަނީ އެމްޑީޕީގެ މެމްބަރުންގެ ކިވައިން އެދިވަޑައިގެންފައެވެ.

އަދި ވިދާޅުވީ މި އިންތިޚާބުގައި އެމްޑީޕީގެ މެމްބަރުން ދޭ ވޯޓު ވެގެންދާނީ ރާއްޖޭގެ މަސްލަހަތު ހިފެހެއްޓުމަށް ދޭވޭ ވޯޓަކަށް ކަމުގައެވެ.