މިމަހުގެ 28 ވަނަ ދުވަހު އެމްޑީޕީގެ މެމްބަރުން ލާން ނިކުންނަ ވޯޓަކީ އެމްޑީޕީގެ ތާރީޚުގައިވެސް ވަރަށް ބޮޑު ތަފާތެއް އޮތް ވޯޓެއް ކަމަށާއި، މިއީ ދެވަނަ ދައުރަކަށް ދިއުމަށް އެމްޑީޕީއަށް ލިބޭ ފުރަތަމަ ފުރުސަތު ކަމުގައި ރައީސް ސާލިހު ވިދާޅުވެއްޖެއެވެ.
ކުރިޔަށްއޮތް އެމްޑީޕީގެ ޕްރައިމަރީ ކެމްޕޭންގައި ރޭ ބޭއްވުނު "އެމްޑީޕީ ކުރިޔަށް" ކެމްޕޭންގެ ފަރާތުން އާރޓިފިޝަލް ބީޗް ސަރަހައްދުގައި ބޭއްވި ބޮޑު ޖަލްސާގައި ވާހަކަ ދައްކަވަމުން ރައީސް ސާލިހުވަނީ އެހެންކަމުން، އެމްޑީޕީގެ ހުރިހާ މެމްބަރުންވެސް އެމަނިކުފަނާއެކު މިފުރުސަތުގެ ބޭނުން ހިފުމަށް އެދިވަޑައިގެންފައެވެ.
އެމްޑީޕީގެ ތާރީޚުގައިވެސް މި ޖެނުއަރީ 28ގައި ވޯޓުލާ ޕްރައިމަރީގައި ތަފާތެއް އެބަވޭ. ދެވަނަ ދައުރަކަށް އެމްޑީޕީ ދިއުމަށް ލިބޭ ފުރަތަމަ ފުރުސަތަކީ މިއީ. ތިޔަ ބޭފުޅުން އަޅުގަޑާއެކު މިފުރުސަތުގެ ބޭނުން ހިތްޕަވާ. އަޅުގަޑު މިހުރީ ތައްޔާރަށް. ތަފާތު ބޮޑު ތާއީދާއެކު މި ޕްރައިމަރީ އަޅުގަޑު އިރާދަ ކުރެއްވިއްޔާ ކާމިޔާބު ކުރާނަން. އޭގަ އެއްވެސް ޝައްކެއް ނެތް. އެއްވެސް ޝައްކެއް ނެތް. މިތަނުން މިއަދު މިއޮތީ އެކަން ނިންމާފަ. ނިމިއްޖެ. ނިމިއްޖެ. ނިމިއްޖެ. ނިމިއްޖެ.
އެމްޑީޕީގެ އެތައް ސަތޭކަ މެމްބަރުން ހާޒިރުވި ރޭގެ ބޮޑު ޖަލްސާގައި ވާހަކަ ދައްކަވަމުން ރައީސް ސާލިހު ވިދާޅުވިއެވެ.
މި ޖަލްސާގައި ވާހަކަ ދައްކަވަމުން ރައީސް ސާލިހު ވިދާޅުވީ ޑިކޮމްރަސީއަށްޓަކާ ނުކުރެވޭނެ އަދި ކުރަން ހެޔޮނުވާނެ ކަންކަން ހުންނަ ކަމުގައެވެ. މިގޮތުން ވެތުވެދިޔަ ތަނުގައި ކުރި އަނިޔާއާއި ދެއްކި ބިރާއި, އޭގެ ފަހަތުގައި ތިބި މީހުންނަށް އޯކޭއެއް ނޫން ކަމަށާއި، އެއަނިޔާތަކުގެ ފަހަތުގައި ތިބި އެމީހުންނާއެކީ ކުރާނެ އެއްވެސް ސިޔާސީ މަސައްކަތެއްވެސް ނޯންނާނެ ކަމަށް ވިދާޅުވެ، ރައީސް ޔާމިނާއެކީ އެއްވެސް ސިޔާސީ މަސައްކަތެއް ނުކުރައްވާނެކަމުގައި ރައީސް ސާލިހު މިޖަލްސާގައި ވާހަކަ ދައްކަވަމުން ވިދާޅުވިއެވެ.
ރައީސް ޔާމިން އޯކޭއެއް ނޫން. އެކީގަ ކުރާނެ މަސައްކަތެއް ނޯނާނެ.
ރައީސް ޔާމިންއަކީ ވިޝަނަރީ ލީޑަރެއްކަމަށް ނަޝީދު ވިދާޅުވަމުން ގެންދަވާ ވާހަކަތަކަށް މޭރުންކޮށް ރައީސް ސާލިހު ވިދާޅުވިއެވެ.
ރޭ އާރޓިފިޝަލް ބީޗުގައި ކުރިޔަށްދާ " އެމްޑީޕީކުރިއަށް" ކެމްޕޭންގެ ބޮޑު ޖަލްސާގައި ވާހަކަ ދައްކަވަމުން ރައީސް ސާލިހު ވިދާޅުވީ ދިވެހި ރައްޔިތުންނަށް ހައްގުވަނީ ހަމަޖެހިގެން އުޅުމާއި، ތައުލީމު ލިބޭނެ މަގެއް ތަނަވަސް ވުމާއި، ރަގަޅު ބޯހިޔާވަހިކަމެއް ލިބުމާއި ހަމަހަމަ އުފާވެރި ދިރި ދިރިއުޅުމެއް ލިބުން ކަމުގައެވެ.
މިގޮތުން ރައީސް ސާލިހު ވިދާޅުވީ ހުއްޓި ތިބެވޭކަށް ނެތް ކަމަށާއި އެމްޑީޕީ ދާންޖެހޭނީ ކުރިއަށް ކަމަށެވެ. ރައީސް ވިދާޅުވި ގޮތުގައި ކުރިއަށް އޮތް ރިޔާސީ އިންތިޚާބަކީ މިދާ ބާރުމިނުގައި ކުރިޔަށް ގޮސް ނުވެހުރި ކަންކަން ނިންމާލުމަށް ދިވެހި ރައްޔިތުންނަށް ލިބޭނެ ފަހު ފުރުސަތު ކަމުގައެވެ. އަދި ވިދާޅުވީ އެއްދޮނެއްގައި މިޖެހެނީ ދެބުޅި ކަމުގައެވެ.
ރައީސްގެ ވާހަކަ ފުޅުގައި ވިދާޅުވީ މިސަރުކާރުން 65،529 ދަރިވަރުން ހިލޭ ޑިގްރީ ސްކީމުން ކިޔަވާ ނިމިއްޖެކަމަށާއި، 10 ހާހަށްވުރެ ގިނަ މުދައްރިސުންގެ މުސާރަ ބޮޑު ކުރެވިއްޖެ ކަމަށާއި، 5 ސަރަހައްދުގައި ސީޓީ ސްކޭންގެ ޚިދުމަތް ތައާރަފް ކުރެއްވިއްޖެ ކަމުގައެވެ.
އޭގެ އިތުރަށް 137 ރަށަކަށް އެމްބިއުލާންސް ފޯރުކޮށް ދެވިއްޖެ ކަމަށާއި، 13،000 އަށްވިރެ ގިނަ ފަތުރުވެރި މުވައްޒަފުންނަށް މިނިމަމް ވޭޖްގެ ފައިދާ ލިބިއްޖެ ކަމަށާއި، 16 ހާހަށްވުރެ ގިނަ ފްލެޓް މަޝްރޫއުތައްވެސް ރާއްޖޭގެ އެކި ކަންކޮޅުތަކުގައި ކުރިޔަށްދާ ކަމުގައިވެސް ރައީސް ވިދާޅުވިއެވެ. ރައީސް ސާލިހު ވިދާޅުވީ މާލޭ ސަރަހައްދުގައި އެކަނިވެސް 7،590 ހައުސިން ޔުނިޓް ތަރައްގީ ވަމުންދާ ކަމުގައިވެސް ރައީސް ސާލިހު ވިދާޅުވިއެވެ.
މާލޭގެ ރައްޔިތުންނަށް އިން ކަނޑާ އިން ވަކިކޮށް ގޯތި ދޭނީ އަޅުގަޑު. ދައުރެއްގެ ތެރޭގައި ފުރަތަމަ ފަހަަރަށް މާލޭގައި ބިންގަލުން ފަށާ ނިންމާ ފްލެޓްގެ ތަޅުދަނޑި އަތަށް ދޭނީ އަޅުގަޑު.
އެމްޑީޕީގެ ގިނަ އަދަދެއްގެ މެމްބަރުން ހާޒިރުވި މި ޖަލްސާގައި ރައީސް ސާލިހު ވިދާޅުވިއެވެ.
ރައީސް ސާލިހު ވިދާޅުވީ މިސަރުކާރުން ހުޅުމާލޭގައި އަޅާ ފްލެޓްތައް ތަފާތުވާނެ ކަމަށާއި، ރައްޔިތުންގެ ބޭނުންތައް މިސަރުކާރުން ހާސިލް ކޮށްދެއްވާނެ ކަމުގައެވެ. އަދި ސަރުކާރުގެ އަމާޒަކީ 20-30 މިނިޓުން ވާސިލް ވެވޭ ގޮތަށް އެއަރޕޯޓުތައް އެޅުން ކަމުގައި ވިދާޅުވަމުން ރައީސް ވިދާޅުވީ ހަނިމާދޫ އެއަރޕޯޓު ބައިނަލްއަގުވާމީވެގެން ދިޔަގޮތަށް އައްޑޫގައިވެސް 1.5 މިލިއަން ޕަސެންޖަރުންނަށް ބޭނުން ކުރެވޭވަރު ބައިނަލްއަގުވާމީ ފެންވަރުގެ އެއަރޕޯޓެއް ތަރައްގީ ކޮށްދެއްވާނެކަމުގައެވެ.
އަދި އެކަންކަން ފުރިހަމަ ކުރުމަށް އަނަން 28ވަނަ ދުވަހު އެމްޑީޕީގެ ހުރިހާ މެމްބަރުން ކެނޑީޑޭޓް ނަމްބަރު 2 އަށް ވޯޓު ދެއްވުމަށް ރައީސް ވަނީ އެމްޑީޕީގެ މެމްބަރުންގެ ކިވައިން އެދިވަޑައިގެންފައެވެ.
އަދި ވިދާޅުވީ މި އިންތިޚާބުގައި އެމްޑީޕީގެ މެމްބަރުން ދޭ ވޯޓު ވެގެންދާނީ ރާއްޖޭގެ މަސްލަހަތު ހިފެހެއްޓުމަށް ދޭވޭ ވޯޓަކަށް ކަމުގައެވެ.
