ދުނިޔޭގައި ހުރި އެންމެ ދުވަސްވީ މީހާގެ ރެކޯރޑް އޮތް ފްރާންސްގެ ލޫސިލް ރަންޑޮން އުމުރުން 118 އަހަރުގައި މަރުވެއްޖެއެވެ.
ސިސްޓަރ އަންޑްރޭ (އަސްލު ނަމަކީ ލޫސިލް ރަންޑޮން) އަށް ގިނެސް ވާރލްޑް ރެކޯރޑްސްގެ ފޮތަށް އަރާފައިވަނީ އޭރު ދުނިޔޭގައި ހުރި އެންމެ ދުވަސްވީ މީހާގެ ރެކޯޑް އޮތް، ޖަޕާންގެ ކަނެ ޓަނަކާ 2022 ވަނަ އަހަރުގެ އެޕްރިލްމަހު، އުމުރުން 119 އަހަރުގައި މަރުވުމާއި ގުޅިގެންނެވެ.
ފްރާންސްގައި، 1904ވަނަ އަަހަރުގެ ފެބްރުއަރީމަހުގެ 11 ވަނަ ދުވަހު އުފަންވީ ލޫސިލް އޭނާގެ ނަމެއްގެ ގޮތުގައި ސިސްޓްރ އަންޑްރޭގެ ނަން އިޚްތިޔާރު ކޮށްފައިވަނީ 1944 ވަނަ އަހަރުއެވެ. އަދި އޭނާއަކީ ފްރާންސްގައި ތިންވަނައަށް އެންމެ ދިގު މުއްދަތަކަށް ދުނިޔޭގައި ހުރި މީހާގެ އިތުރުން އޭނާ ހިމެނިގެން ގޮސްފައިވަނީ ޔޫރަޕްގައިވެސް ތިންވަނައަށް އެންމެ ދިގު މުއްދަތަކަށް ދުނިޔޭގައި ދިރިއުޅެމުންދިޔަ މީހާކަމުގައިވެސް މެއެވެ.
ސިސްޓަރ އަންޑްރޭގެ ފަރާތުން އޭނާގެ ތަރުޖަމާން ޑޭވިޑް ޓެރެއްލާ ބައެއް މީޑިއާތަކަށް މައުލޫމާތު ދެމުން ވިދާޅުވެފައިވަނީ ސިސްޓަރ އަންޑްރޭ ދުނިޔެ ދޫކޮށްފައިވަނީ ހަމަހިމޭން ކަމާއެކު އޭނާގެ ނިދީގައި، ފްރާންސްގެ ޓައުލޮންގައި އޭނާ ބަލަަހައްޓަކުންދިޔަ ނާރސިންގ ހޯމްގައި ކަމުގައެވެ.
"މިއީ ވަރަށް ބޮޑު ހިތާމައެއް.. އެހެންނަމެވެސް އޭނާގެ ލޯބިވާ ބޭބެއާއި ބައްދަލު ކުރުމަކީ އޭނާގެ ވަރަށް ބޮޑު އުއްމީދެއް. އޭނާއެއީ އެނާއަށް ލިބިގެންދިޔަ ވަރަށް ބޮޑު މިނިވަންކަމެއް،" ޓެރެއްލާ ވިދާޅުވެފައި ވެއެވެ.
ސިސްޓަރ އަންޑްރޭއަކީ އޭނާގެ ޅަ އުމުރުގައި ޓީޗަރެކެވެ. އޭނާ ކިޔަވާދީފައިވަނީ އަމިއްލަ ސްކޫލެއްގައި ކުޑަ ކުދިންނަށެވެ. އެއީ ދުނިޔޭގެ ދެވަނަ ބޮޑު ހަނގުރާމައިގެ ތެރޭގައެވެ.
އަދި ދެވަނަ ބޮޑު ހަނގުރާމައަށްފަހު، 28 އަހަރު ވަންދެން އޭނާ މަސައްކަތް ކޮށްފައިވަނީ، ފްރާންސްގެ އަވާންޖް ރޮން އަލްޕްސް ރީޖަންގެ ވިޗީގައި ހުންނަ ހޮސްޕިޓަލެއްގައި ޔަތީމު ކުދިންނާއި މުސްކުޅިން ބެލެހެއްޓުމުގައެވެ. އެއަށްފަހު އޭވާނީ ކެތޮލިކް ނަން (އަޅުކަމާއި އެހީތެރިކަން ފޯރު ކޮށްދިނުމަށް އެކަނި ޚާއްސަވާ، ކުރިސްޓިއަން ދީނު އެންހެނުން) އަކަށް ބަދަލު ވެފައެވެ.
އޭނާގެ ހަޔާތުގެ ބޮޑުބައި ދީނީ އަޅުކަމުގައި ހޭދަކޮށްފައިވާ ސިސްޓަރ އަންޑްރޭ އަކީ އޭނާ މަރުވިއިރު ދުނިޔޭގައި ހުރި، އެންމެ ދުވަސްވީ ކެތަލިކް ނަންވެސް މެއެވެ.
2019ވަނަ އަހަރު އޭނާއަށްވަނީ، އޭނާ ދިރިއުޅެމުންދާ ސިޓީ ކަމުގައިވާ، ޕްރޮވެންސް އަލްޕްސް ކޯޓް ޑީ އަޒޫރު ރީޖަންގެ ޓޯލަންއިން ޝަރަފްވެރި ރައްޔިތެއްގެ ހައިސިއްޔަތު އަރުވާފައެވެ. އަދި ކުރިންޓިއަން ދީނުގެ އިސް ފާދިރީ ޕޯޕޮ ފްރާންސިސްގެ ފަރާތުން އޭނާއަށް ޚާއްސަ ސިޓީއެއްވެސް އަރުވާފައި ވެއެވެ.
2021 ވަނަ އަހަރު ސިސްޓަރ އަންޑްރޭއަށްވަނީ، ކޯވިޑް19 އަށް ޕޮޒިޓިވްވި ދުނިޔޭގައި ހުރި އެންމެ ދުވަސްވީ މީހާގެ ރެކޯޑްވެސް ލިބިފައެވެ. 1918ވަނަ އަހަރު ދުނިޔެއަށް އާންމު ސްޕެނިޝް ފުލޫއަށްވެސް އޭނާއަށް ޖެހިފައިވެއެވެ. އޭނާ ކޯވިޑް19އަށް ޕޮޒިޓިވްވީ 2021ވަނަ އަހަރުގެ ޖެނުއަރީމަހުގެ 16ވަނަ ދުވަހުއެވެ. ކޯވިޑް19އަށް އޭނާ ޕޮޒިޓިވް ވުމާއެކު، އެކިހެރިކޮށް އޭނާގެ ރިޓަޔަމަންޓް ގޭގައި ބަހައްޓާއިގެން ފަރުވާ ދީފައި ވެއެވެ.
އުމުރުން 118 އަހަރުވިއިރު ސިސްޓަރ އަންޑްރޭ ވަނީ ކޮންމެވެސް ވަރަކަށް ބީރު ވެފައެވެ. އެހެންނަމަވެސް އޭނާގެ ސިނކުޑި ރަގަޅަށް މަސައްކަތް ކޮށްފައި ވެއެވެ.
