ޕެޓްއެއްގެ ގޮތުގައި ބުޅާ ގެންގުޅޭމީހުން އެ އެއްޗެހި ބޭނުންވެގެން އުޅޭ ކަމެއް ނޭނގިގެން އުޅެން ހެއްޔެވެ؟ މިކަމަށް ފަހުގެ ޓެކްނޮލޮޖީ ވަނީ ހައްލެއް ގެނެސްފައެވެ.
އެގޮތުން މި ކަމަށް ހާއްސަ އެޕްއެއް ކަމަށްވާ "މިއޯ ޓޯކް" ވަނީ 2020 ގައި އެމެޒޯން އެލެކްސާގެ ކުރީގެ އިންޖީނިޔަރުންތަކެއް އުފައްދާފައެވެ.
މި އެޕުން ބުޅާ ދައްކާ ވާހަކަ ތަރުޖަމާ ކޮށްދެއެވެ. ނުވަތަ އޭތި ލައްވާ އަޑުތައް ތަރުޖަމާ ކޮށްދެއެވެ. މި އެޕް ބޭނުންކުރާ ގޮތަކީ ބުޅަލުގެ އަޑުތައް އެޕަށް ރިކޯޑުކުރުމުން އޭގެ މާނަ ދެނެގަންނަނީއެވެ. އަދި ބުޅާ ލެއްވި އަޑުތަކުގެ ތަރުޖަމާ އިނގިރޭސި ބަހުން އަންގައިދެއެވެ.
މި ވަގުތު މި އެޕްގެ އެހީގައި ބުޅާ ލައްވާ 13 އަޑެއް ތަރުޖަމާ ކޮށްދޭނެ ކަމަށް އެޕް އުފެއްދި ޓީމުން ބުނެއެވެ. އެގޮތުން ބަނޑުހައިވުމާއި، ރުޅިގަދަވުމާއި، ހިތްހަމަ ނުޖެހުން ފަދަ ކަންކަން މި އެޕްގެ އެހީގައި ދެނެގަނެވޭނެ އެޕް އުފެއްދި ޓީމުން ބުނެއެވެ. އެޓީމުން ގެންދަނީ މި އެޕްލިކޭޝަން އިތުރަށް ތަރައްގީ ކުރުމުގެ މަސައްކަތް ކުރަމުންނެވެ.
ގޫގުލް ޕްލޭ ސްޓޯރާއި އެޕަލްގެ އެޕް ސްޓޯރުން މި އެޕްލިކޭޝަން މިހާރު ޑައުންލޯޑު ކުރެވެން އެބަ ހުއްޓެވެ. އެހެންކަމުން ބުޅާ ގެންގުޅޭ ކުދިން އަޅެ މި އެޕްގެ އަޖުމަ ބަލައިލަބަލާށެވެ.
