މިހާރު ސަރުކާރުން ވިސްނަމުން ދަނީ، ރާއްޖޭގައި ބިންހިއްކަން މިސަރުކާރުން ވައުދެވެ، މިހާރު ބާކީ ހިއްކަން ޖެހިފއިވާ ހުރިހާ ރަށްތައް ހިއްކުމަށް ރާއްޖެއިން ބޭރުގެ ކުންފުންޏަކާ ހަވާލު ކުރުމަށް ކަމަށާއި އެ މަސައްކަތުގެ ތެރޭގައި ދިއްދޫގެ ބިންވެސް ހިއްކިގެންދާނެ ކަމުގައި ރައީސް ސާލިހު ވިދާޅުވެއްޖެއެވެ.
ރައީސް ސާލިހު މިހެން ވިދާޅުވީ މިހާރު ކުރިޔަށްދާ އެމްޑީޕީގެ ޕްރައިމަރީ ކެމްޕޭންގައި އުތުރުގެ އަތޮޅުތަކަށް ކުރައްވަމުން ގެންދަވާ ދަތުރުފުޅުގައި ރޭ ހއ. ދިއްދޫގައި ކުރިޔަށްދާ ކެމްޕޭން ޖަލްސާގައި ވާހަކަ ދައްކަވަމުންނެވެ.
މި ޖަލްސާގައި ވާހަަކަ ދައްކަވަމުން ރައީސް ސާލިހު ވިދާޅުވީ ސަރުކާރުގެ މިހާރުގެ ވިސްނުމަކީ ރާއްޖޭގައި ބިން ހިއްކާން ޖެހިފައިވާ ބާކީހުރި ރަށްތަކުގެ ބިންތައް ހިއްކުމަށް ބޭރުގެ ކުންފުންޏަކާ ހަވާކު ކުރުން ކަމުގައެވެ.
ބިން ހިއްކުން އަޅުގަޑުމެން ވީ ވައުދުތަކުގެ ތެރޭގައި ނުނިމި ހުރި ރަށްރަށް އެއްކޮށް، ހިއްކުމަށްޓަކާ ބޭރުގެ ކުންފުންޏަކާއެކީގައި މިހާރު މިދަނީ މަޝްވަރާ ކުރަމުން. އަޅުގަޑުގެ ވިސްނުމަކީ މި ހުރިހާ ރަށެއްގެ ބިންހިއްކުން، ބިން ބޮޑުކުރުން ވަކިބަޔަކާއި ހަވާލުކޮށް، އެގްރިމަންޓެއްގައި ސޮއިކޮށް، އެމަސައްކަތް މި ދައުރެގެ ތެރޭގައި ނިންމާލުން. އެގޮތުން ދިއްދޫވެސް އޭގެ ތެރޭގައި އަޅުގަޑުމެން ހިމަނާނެ ވާހަކަ ދަންނަވަން.
ރައީސް ސާލިހު ވިދާޅުވިއެވެ.
މިޖަލްސާގައި އިތުރަށް ވާހަަކަ ދައްކަވަމުން ރައީސް ސާލިހު ވިދާޅުވީ ދިއްދޫގެ ބިން ބޮޑުކުރެވެމުން ދާއިރުގަ އެރަށުގައި އެއަރޕޯޓެއް އެޅުމާއިމެދު މަޝްވަރާކޮށް، އަދި އެއަރޕޯޓެއްގެ ވާހަކައަކީ އަޅުގަޑުމެންނަށް ނުދެއްކޭނެ ވާހަކައެއް ނޫން ކަމުގައެވެ. މިގޮތުން ކުރިޔަށް އޮތް ރިޔާސީ އިންތިޚާބުގެ ކެމްޕޭންގެ މެނިފެސްޓޯއެއް އެކުލަވާލާއިރު ދިއްދޫގެ އެއަރޕޯޓު ނުހިމަނަންވީ ސަބަބެއް ނެތްކަމުގައިވެސް ރައީސް ސާލިހު ވިދާޅުވިއެވެ.
މީގެ އިތުރުންވެސް ރައީސް ސާލިހުވަނީ ދިއްދޫގައި މިހާރު އަޅަމުންދާ ހައުސިން ޔުނިޓްތަކަށް ދިއްދޫ ރައްޔިތުން އެދެމުންދާ މިންވަރަށް އިތުރު ކޮށްދެއްވާނެކަމަށް ވިދާޅުވެފައެވެ. އަދި ދިއްދޫ ރައްޔިތުން އެދެމުންދާ އައުޓުޑޯ ޖިމްވެސް އެރަށަށް ލިބިގެންދާނެ ކަމުގައިވެސް ރައީސް ސާލިހު ވިދާޅުވިއެވެ.
މިޖަލްސާގައި ވާހަކަ ދައްކަވަމުން ރައީސް ސާލިހު ވިދާޅުވީ، އެމްޑީޕީ ހުއްޓި އޮވެގެން ނުވާނެކަމަށާއި، އެމްޑީޕީ ދާންވާނީ ކުރިޔަށް ކަމުގައެެވެ. އެކަމަށްޓަކާއި މި ޕްރައިމަރީވެސް ކާމިޔާބު ކުރާންޖެހޭ ކަމުގައިވެސް ރައީސް ސާލިހު ވިދާޅުވިއެވެ.
ކުރިޔަށްދާ އެމްޑީޕީގެ ރިޔާސީ ޕްރައިމަރީއަށް ރާއްޖޭގެ އުތުރުގެ ބައެއް ރަށްތަކަށް ކުރައްވާ ދަތުރުފުޅެއް ރައީސް ސާލިހު ފައްޓަވާފައިވަނީ މިއަދުއެވެ.
ރައީސްގެ މި ދަތުރުފުޅުގައި ހއ. އަތޮޅު، ހދ. އަތޮޅު، އަދި ށ. އަތޮޅުގެ ގިނަ ރަށްތަކަކަށް ވަޑައިގަންނަވާ ގޮތަށް ވަނީ ހަމަޖެހިފައެވެ. ރައީސްގެ މި ދަތުރުފުޅުގައި ހދ. ހަނިމާދޫ އިންޓަނޭޝަނަލް އެއާޕޯޓް ތަރައްގީ ކުރުމުގެ މަޝްރޫއުގެ މަސައްކަތް ފައްޓަވާ ދެއްވާ ގޮތަށް ވަނީ ހަމަޖެހިފައެވެ.
މައުލޫމާތު ލިބިފައިވާ ގޮތުގައި މި މަޝްރޫޢު ފެށުމުގެ ރަސްމިއްޔާތު ބޭއްވުމަށް ހަމަޖެހިފައިވަނީ މާދަމާއެވެ. އަދި މި ރަސްމިއްޔާތުގައި އިންޑިއާގެ ފޮރިން ސެކެޓްރީ ޖައިޝަންކަރު ބައިވެރިވެވަޑައިގަތުމަށް ހަމަޖެހިފައިވާކަމަށްވެސް ވަނީ މައުލޫމާތު ލިބިފައެވެ.
ރައީސް ސާލިހުވަނީ ވަނީ ކެމްޕޭން ދަތުރުތަކުގައި ރ، ނ، ޅ އަދި ބ. އަތޮޅަށް ވަޑައިގެންފައެވެ.
