ނަޝީދުގެ ވެރިކަމުގައި 2008 ވަނަ އަހަރު އައި ފައިނޭންޝަލް ކްރައިސިސްގައި އޭރުގެ ސަރުކާރުން ސިވިލް ސާވިސް މުވައްޒަފުންގެ މުސާރަތައް ކުޑަކޮށް، ރައްޔިތުންނަށް ތަކުލީފު އުފުލާންޖެހޭ އެތައް ކަމެއް ކޮށްފައިވާ ކަމަށާއި، އެހެންނަމަވެސް އެއާއި ޚިލާފަށް ދާދިފަހުންއައި ކޯވިޑްގެ އާލަމީ ވަބާގައި މި ސަރުކާރުން ރައްޔިތުންނަށް ކަރަންޓާއި ފެނުން ސަބްސިޑީ އާއި އަދި އިންކަން ސަޕޯޓުވެސް ދީ، ރައްޔިތުންނަށް އެތަކެއް އެހީތެރިކަމެއް ފޯރުކޮށްދީފައިވާކަމަށް ރައީސް ސާލިހު ވިދާޅުވެއްޖެއެވެ.
މިހާރު ކުރިޔަށްދާ "އެމްޑީޕީ ކުރިއަށް" ކެމްޕޭނުން މިހާރު ހއ.ގެ ރަށްތަކަށް ކުރައްވަމުން ގެންދަވާ ކެމްޕޭދަތުރު ތަކުގެ ތެރެއިން އެއަތޮޅު ކެލައަށް ވަޑައިގެން އެރަށުގެ އެމްޑީޕީގެ މެމްބަރުންނާއި ބައްދަލުކޮށް ވާހަކަ ދައްކަވަމުން ރައީސް ސާލިހު ވިދާޅުވީ މާލީ ގޮތުން ގޮންޖެހުންތަކާއި ގައުމަށް ކުރިމަތި ލާންޖެހުނު ނަމަވެސް، މުސާރަ ކުޑަކުރުމާއި އަސާސީ ޚިދުމަތްތަކުގެ އަގަށް ނުރަގަޅު ބަދަލު ގެނައުމަކީ ކޮށްގެންވާނެ ކަމަކަމުގެ ގޮތުގައި އެމަނިކްފާނު ދެކެވަޑައި ނުގަންނަވާ ކަމުގައެވެ.
ސިވިލް ސާވިސްގެ މުސާރަ ކުޑަކުރީ، މުވައްޒަފުން މަދުކުރީ. މިހެން ގޮސް ރައްޔިތުން ތަކުލީފުތަކެއް އުފުލަން ޖެހޭ އެތައް ކަމެއް އެ ވަގުތު ކުރެއްވި.
ނަޝީދު ވެރިކަމުގައި އައި ފައިނޭންޝަލް ކްރައިސިސްގައި ގެނައި ބަދަލުތަކުން ރައްޔިތުންނަށް އެތަކެއް ތަކުލީފުތަކެއް އުފުލާންޖެހުނުކަމަށް ވިދާޅުވަމުން ރައީސް ސާލިހު ވިދާޅުވިއެވެ.
މި ބައްދަލުވުމުގައި އިތުރަށް ވާހަކަ ދައްކަވަމުން ރައީސް ސާލިހު ވިދާޅުވީ މާލީގޮތުން ދަތިތަކާއި ކުރިމަތިލާންޖެހޭ ހާލަތްތަކުގައި ރިސްކު ނަގާން ޖެހޭނީ ސަރުކާރުން ކަމުގައެވެ. އަދި އެފަދަ ހާލަތްތަކުގައި ރައްޔިތުންނަށް ތަކުލީފު ޖެއްސުމަކީ އެންމެ ރަގަޅު ގޮތް ނޫންކަމަށް ވިދާޅުވަމުން ރައީސް ވިދާޅުވީ ސަރުކާރެއްގެ ބޭނުމަކީ ދިމާވާ ދަނޑިވަޅުތަކުގައި ރައްޔިތުންނަށް އެހީތެރިކަން ފޯރުކޮށްދިނުން ކަމުގައެވެ.
ރައީސް ސާލިހު ވިދާޅުވީ އެމަނިކްފާނުގެ ދައުރުގެ ފާއިތުވެދިޔަ 4 އަހަރު ދުވަހުގައި ރާއްޖޭގެ އެކި ކަންކޮޅުތަކުގައި ތަރައްގީގެ ގިނަގުނަ މަޝްރޫއުތަކެއް ނިންމާފައިވާ ކަމަށާއި، މަޝްރޫއުތައް ނިންމާލުމަށްޓަކާ އެމަނިކްފާނު ވެރިކަމުގައި ހުންނެވުން މުހިންމު ކަމުގައެވެ.
ކުރިޔަށްދާ އެމްޑީޕީގެ ރިޔާސީ ޕްރައިމަރީއަށް ރާއްޖޭގެ އުތުރުގެ ބައެއް ރަށްތަކަށް ކުރައްވާ ދަތުރުފުޅެއް ރައީސް ސާލިހު ފައްޓަވާފައިވަނީ މިއަދުއެވެ.
ރައީސްގެ މި ދަތުރުފުޅުގައި ހއ. އަތޮޅު، ހދ. އަތޮޅު، އަދި ށ. އަތޮޅުގެ ގިނަ ރަށްތަކަކަށް ވަޑައިގަންނަވާ ގޮތަށް ވަނީ ހަމަޖެހިފައެވެ. ރައީސްގެ މި ދަތުރުފުޅުގައި ހދ. ހަނިމާދޫ އިންޓަނޭޝަނަލް އެއާޕޯޓް ތަރައްގީ ކުރުމުގެ މަޝްރޫއުގެ މަސައްކަތް ފައްޓަވާ ދެއްވާ ގޮތަށް ވަނީ ހަމަޖެހިފައެވެ.
މައުލޫމާތު ލިބިފައިވާ ގޮތުގައި މި މަޝްރޫޢު ފެށުމުގެ ރަސްމިއްޔާތު ބޭއްވުމަށް ހަމަޖެހިފައިވަނީ މާދަމާއެވެ. އަދި މި ރަސްމިއްޔާތުގައި އިންޑިއާގެ ފޮރިން ސެކެޓްރީ ޖައިޝަންކަރު ބައިވެރިވެވަޑައިގަތުމަށް ހަމަޖެހިފައިވާކަމަށްވެސް ވަނީ މައުލޫމާތު ލިބިފައެވެ.
ރައީސް ސާލިހުވަނީ ވަނީ ކެމްޕޭން ދަތުރުތަކުގައި ރ، ނ، ޅ އަދި ބ. އަތޮޅަށް ވަޑައިގެންފައެވެ.
ކޮމެންޓު ފޮނުވާ