ފުލުހުންގެ ޚިދުމަތް އިތުރަށް ހަރުދަނާކޮށް، ދިރާސާތަކާއި އާ ހޯދުންތަކުގެ އަލީގައި ޚިދުމަތް އިތުރަށް ތަރައްގީކުރުމަށް އަމާޒު ކޮށްގެން ކޮންމެ އަހަރަކުވެސް ޚާއްސަ ކޮންފަރެސް ބޭއްވުމަށް ފުލުހުން ނިންމައިފިއެވެ.
"ޕޮލިސް އިނޮވޭޝަން އެންޑް ރިސާޗު ކޮންފަރެންސް" ގެ ނަމުގައި ބާއްވާ މި ކޮންފަރެންސްގެ ފުރަތަމަ މަހާސިންތާ ބޭއްވުމަށް ހަމަޖައްސާފައިވަނީ އަންނަ މާޗު މަހުގެ 18 އިން ފެށިގެން 20 ވަނަ ދުވަހުގެ ނިޔަލަށެވެ.
ފުލުހުންގެ އިސްކަންދަރު ކޮށީގައި މިއަދު ބޭއްވި ނޫސްވެރިންގެ ބައްދަލުވުމުގައި، މި ކޮންފަރެންސާއި ގުޅޭ މައުލޫމާތު ނޫސްވެރިންނަށް ދެއްވަމުން ހޯމް މިނިސްޓަރު އިމްރާން އަބްދުﷲ ވިދާޅުވީ އެ ކޮންފަރެންސް ބާއްވަން ނިންމަވާފައިވަނީ، ފުލުހުންގެ މަސައްކަތް އިތުރަށް ހަރުދަނާކޮށް ކުރިއެރުވުމުގައި ރައްޔިތުންގެ ޚިޔާލާއި ބައިވެރިވުމާއެކު ފުލުހުންގެ ޚިދުމަތުގެ ފެންވަރު ރަނގަޅު ކުރާނެ ގޮތްތައް ހޯދާބަލާ އެކަމަށްޓަކާ ޕޮލިސް ބޯޑުން ކުރި މަސައްކަތްތަކުގެ ނަތީޖާއެއްގެ ގޮތުން ކަމުގައެވެ.
އިމްރާން ވިދާޅުވި ގޮތުގައި މި ކޮންފަރެންސްގެ މަގްސަދަކީ ކުށްތައް ހުއްޓުވުމުގެ ގޮތުން އަޅަން ޖެހޭ ފިޔަވަޅުތައް ދެނެގަތުމެވެ. އަދި މި ކޮންފަރެންސްގައި ހޯދޭ މައުލޫމާތުގެ އަލީގައި ފުލުހުންގެ ޚިދުމަތް އިތުރަށް ތަރައްގީ ކުރުމަށް ކުރާންޖެހިފައިވާ މަސައްކަތްތައްވެސް ދެނެގަނެވޭނެ ކަމުގައި އިމްރާން ވިދާޅުވިއެވެ.
އިމްރާން ވިދާޅުވީ މި ކޮންފަރެންސްގައި ގާނޫނު ތަންފީޒުކުރާ އިދާރާތަކާއި ޔުނިވަސިޓީ/ކޮލެޖްތަކާއި މަދަނީ ޖަމިއްޔާތަކުން ބައިވެރި ވާނެކަމުގައެވެ. އޭގެ އިތުރުންވެސް އަމިއްލަ ފަރުދުންގެ ތެރެއިން ސަލާމަތާއި ރައްކާތެރިކަމުގެ ދާއިރާތަކާއި ގުޅޭގޮތުން ކޮށްފައި ހުންނަ ދިރާސާތަކާއި ފަންނީ އުފެއްދުންތަކާއި އީޖާދުކުރާ ޒަމާނީ ވަސީލަތްތައްވެސް މި ކޮންފަރެންސަށް ހުށަހެޅުމުގެ ފުރުސަތު ލިބިގެން ދާނެކަމަށްވެސް ނޫސްވެރިންގެ ބައްދަލުވުމުގައި ނޫސްވެރިންނަށް މައުލޫމާތު ދެއްވަމުން އިމްރާނު ވިދާޅުވެފައި ވެއެވެ.
މިގޮތުން ހުށަހަޅާ ހުށަހެޅުންތައް ވަނީ 4 ބަޔަކަށް ބަހާލެވިފައެވެ. އެ ބައިތަކަކީ މަދަނީ ޖަމިއްޔާތަކާއި ޖަމާއަތްތަކާއި، ދިވެހި ފުލުހުންގެ ހިދުމަތުގެ ކޮމާންޑް/ޑައިރެކްޓަރޭޓްތަކާއި، ޔުނިވަސިޓީ/ކޮލެޖްތަކުގެ އިތުރުން އަދި އަމިއްލަ ފަރުދުންނަށެވެ. މީގެތެރެއިން އެންމެ ރަގަޅު ހުށަހެޅުންތަކެއް ހުށަހަޅާ ފަރާތެއް ހޮވާގޮތަށްވެސް ވަނީ ހަމަޖައްސާފައެވެ.
މިއަހަރު ބާއްވާ ކޮންފަރެންސަށް އަމާޒުކޮށް ހުށަހަޅުހުންތައް ހުށަހެޅުމުގެ ފުރުސަތުވެސް ފުލުހުންގެ މުވައްސަސާއިން މިހާރުވަނީ ހުޅުވާލާފައެވެ. މިގޮތުން މިއަހަރުގެ ހުށަހެޅުންތައް ހުށަހެޅުމަށް ހުޅުވާލާފައިވާ ދާއިރާތަކަކީ:
• ކްރައިމް ޕްރިވެންޝަން
• ސެކިއުރިޓީ އާއި ކައުންޓާ ޓެރަރިޒަމް
• ފައިނޭންޝަލް ކްރައިމް އެންޑް އެންޓި-މަނީލޯންޑަރިން
• ފޮރެންސިކް ސައިންސް
• ލީޑާޝިޕް އޮގަނައިޒޭޝަނަލް ރެޒިލިއަންސް އަދި އޮފިސާ ވެލްބީން
• އިނޮވޭޝަން އެންޑް ޓެކްނޮލޮޖީ
• ސައިބާ ކްރައިމް
• ރޯޑް ސޭފްޓީ
• މެރިޓައިމް ޕޮލީސިން
• އެފިޝަންސީ އެންޑް އިފެކްޓިވްނެސް.
މި ކޮންފަރެސްސަށް ހުށަހަޅާ ރިސާޗް ޕޭޕަރުތަކާއި ގުޅޭގޮތުން މަޝްވަރާކޮށް ބަހުސްކޮށް، ނިކުންނަ ނަތީޖާތައް ރިޕޯޓެއްގެ ސިފައިގައި އެކުލަވާލާ އާންމުކުރުމަށްވެސް ވަނީ ނިންމާފައެވެ.
ކޮމެންޓު ފޮނުވާ