ރިޔާސީ އިންތިޚާބަށް ވެވަޑައިގެންނެވި ވައުދުތައް ހަމަ އެކަނި އޮތީ ލިޔުމާއި ވާހަކައިގެ ތެރޭގައި ނޫންކަމަށާއި، ރިޔާސީ އިންތިޚާބަށް އަމާޒުކޮށް ވީ ވައުދުތައް ފުއްދަވާ ދެއްވަމުން ގެންދަވާ ކަމުގައި ރައީސް ސާލިހު ވިދާޅުވެއްޖެއެވެ.
ކުރިޔަށްދާ އެމްޑީޕީގެ ރިޔާސީ ކެމްޕޭންގައި އުތުރުގެ ރަށްތަަކަށް ކުރައްވާ ދަތުރުފުޅެއްގައި މިއަދު ހޯރަފުއްޓަށް ވަޑައިގެން އެމްޑީޕީގެ މެމްބަރުންނާ މުޚާތަބްކޮށް ވާހަކަ ދައްކަވަމުން ރައީސް ސާލިހު ވިދާޅުވީ ހޯރަފުށީ ރައްޔިތުންނަކީ އެންމެ ކުރިއްސުރެވެސް ތަރައްގީއަށް އުއްމީދުތަކެއް ކުރަމުން އައި ބައެއް ކަމަށެވެ. ރައީސް ވިދާޅުވީ ހޯރަފުށީ ދާއިރާއަށް ސަރުކާރުން ގެނެސްދޭ ތަރައްގީގައި އެ ދާއިރާގެ އުލިގަމާއި ތުރާކުނުވެސް ބާކީ ނުކުރައްވާނެ ކަމުގައެވެ.
އެކަންތައް އެއީ ލިޔުމާއި ވާހަކައިގެ ތެރޭގައި މީގެ ކުރިން އޮތް ކަންތައްތައް. އަޅުގަނޑުމެން ރިޔާސީ އިންތިހާބުގައިވީ ވައުދުތަކާއި އެއްގޮތަށް އަޅުގަނޑުމެން މި ދަނީ ކަންތައްތައް ފުރިހަމަ ކުރަމުން.
ކެމްޕޭނަށް ހޯރަފުއްޓަށް ވަޑައިގެން ހޯރަފުށީ އެއަރޕޯޓުގައި އެމްޑީޕީގެ މެމްބަރުންނާ ވާހަކަ ދައްކަވަމުން ރައީސް ސާލިހު ވިދާޅުވިއެވެ.
ރައީސް ވާހަކަފުޅުގައިވަނީ ހޯރަފުއްޓަށް މި ސަރުކާރުން ގެނެސްދީފައިވާ ތަރައްގީއަށް ބައްލަވާލައްވާފައެވެ. އޭގެ ތެރޭގައި ހޯރަފުށީ އެއަރޕޯޓު ނިންމާލެވި، ގޮނޑުދޮށް ހިމާޔަތް ކުރުމާއި، އައިސްޕްލާންޓު ބެހެއްޓުމާއި އަދި އޭގެ އިތުރުން ހޯރަފުށީ ފުޓުބޯޅަ ދަނޑުގެ މަސައްކަތްވެސް ނިންމާލެވިފައިވާކަން ފާހަގަ ކުރެއްވިއެވެ.
އޭގެ އިތުރުންވެސް ހޯރަފުށީގައި ހަދަމުންދާ ފެން ބަންދުކުރާ ކާރުޚާނާގެ މަސައްކަތް މިހާރު ނިމުމަކާއި ހަމައަށް ގޮސްފައިވާކަން ރައީސް ސާލިހު ފާހަގަ ކުރެއްވިއެވެ. އަދި ހޯރަފުށިގައި އަޅަމުންދާ ކައުންސިލް އޮފީހުގެ މަސައްކަތުގެ އިތުރުން އެރަށުގެ މަގު ހެދުމުގެ މަސައްކަތާއި ވޮލީ ކޯޓާއި ޖުވެނައިލް ޖަސްޓިސް އިމާރާތުގެ މަސައްކަތްވެސް ކުރިޔަށްދާކަމަށް ރައީސް ސާލިހު ވިދާޅުވިއެވެ. އަދި ހޯރަފުށީގައި އިމާރާތްކުރާ ހޮސްޕިޓަލް އެޅުމުގެ މަސައްކަތް ބަޔަކާއި ހަވާލުކުރުމުގެ މަސައްކަތްވެސް ކުރިޔަށްދާކަމަށް ރައީސް ވިދާޅުވިއެވެ.
ރައީސް ސާލިހު ވިދާޅުވީ ހޯރަފުއްޓަށް ދެން އެމަނިކްފާނު ވަޑައިގަންނަވާނީ އެރަށުގައި އަޅާ ހޮސްޕިޓަލްގެ މަސައްކަތް ނިންމުމަށް ފަހުގައި ކަމުގައެވެ.
މިހާރު ކުރިޔަށްދާ އެމްޑީޕީގެ ރިޔާސީ ޕްރައިމަރީއަށް ރާއްޖޭގެ އުތުރުގެ ބައެއް ރަށްތަކަށް ކުރައްވާ ދަތުރުފުޅެއް ރައީސް ސާލިހު ފައްޓަވާފައިވަނީ މިއަދުއެވެ.
މި ދަތުރުފުޅުގައި ހޯރަފުއްޓަށް ވަޑައިގަތުމަށްފަހު ވަނީ ހއ. އިހަވަންދޫއަށް ވަޑައިގެންފައެވެ.
ރައީސްގެ މި ދަތުރުފުޅުގައި ހއ. އަތޮޅު، ހދ. އަތޮޅު، އަދި ށ. އަތޮޅުގެ ގިނަ ރަށްތަކަކަށް ވަޑައިގަންނަވާ ގޮތަށް ވަނީ ހަމަޖެހިފައެވެ. ރައީސްގެ މި ދަތުރުފުޅުގައި ހދ. ހަނިމާދޫ އިންޓަނޭޝަނަލް އެއާޕޯޓް ތަރައްގީ ކުރުމުގެ މަޝްރޫއުގެ މަސައްކަތް ފައްޓަވާ ދެއްވާ ގޮތަށް ވަނީ ހަމަޖެހިފައެވެ.
މައުލޫމާތު ލިބިފައިވާ ގޮތުގައި މި މަޝްރޫޢު ފެށުމުގެ ރަސްމިއްޔާތު ބޭއްވުމަށް ހަމަޖެހިފައިވަނީ މާދަމާއެވެ. އަދި މި ރަސްމިއްޔާތުގައި އިންޑިއާގެ ފޮރިން ސެކެޓްރީ ޖައިޝަންކަރު ބައިވެރިވެވަޑައިގަތުމަށް ހަމަޖެހިފައިވާކަމަށްވެސް ވަނީ މައުލޫމާތު ލިބިފައެވެ.
ރައީސް ސާލިހުވަނީ ވަނީ ކެމްޕޭން ދަތުރުތަކުގައި ރ، ނ، ޅ އަދި ބ. އަތޮޅަށް ވަޑައިގެންފައެވެ.
