ޕީޕީއެމާއި ޔާމީނާ މެދު އެއްވެސް ރުޅިވެރިކަމެއް އެ މަނިކުފާނުގެ ނެތްކަމަށް އެމްޑީޕީގެ ޕްރައިމަރީގައި ވާދަކުރައްވާ އެޕާޓީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އެމްޑީޕީ ރިޔާސީ ޕްރައިމަރީގައި ވާދަކުރައްވާ ނަޝީދު މިއަދު ބޭއްވި ނޫސްވެރިންގެ ބައްދަލުވުމެއްގައި ވިދާޅުވީ ޔާމީނަކީ ކިޔަވައިގެން ހުންނެވި ވަރަށް ތަންދޮރު ދަންނަ ބޭފުޅެއް ކަމަށެވެ.
ރައީސް ޔާމީނަކީ އިންޓަލެކްޗުއަލް ބޭފުޅެއް، އެކަޑެމިކް ބޭފުޅެއް، ތަންދޮރު އިނގިވަޑައިގަންނަވާ ވިޝަންއެއް ހުރި ބޭފުޅެއް، އަޅުގަނޑު ނުދެކެން އެއީ އެހާ ތަފާތު ބޭފުޅެއްގެ ގޮތުގައެއް.
– ނަޝީދު ޔާމީނަށް ތައުރީފް ކުރައްވަމުން ނަޝީދު ވިދާޅުވިއެވެ.
"އިންޑިއާ އައުޓް" ގެ މައްސަލާގައި ނަޝީދު ވިދާޅުވީ އެކަން އެގޮތަށް ނުކުރައްވަން ޔާމީނަށް ގުޅުއްވައި ތަކުރާރުކޮށް އެދިވަޑައިގެންފައި ވާނެ ކަމަށެވެ. އެކަމާ މެދު ޔާމީން ވިސްނަވައި، އެ ހިޔާލު ދޫކޮށްލެއްވުމަށް ވެސް ނަޝީދު އެދިވަޑައިގަތެވެ.
އެ މަނިކުފާނު ވިދާޅުވީ ޕީޕީއެމާއި ޔާމީނާ މެދު އެއްވެސް ރުޅިވެރިކަމެއް އެ މަނިކުފާނުގެ ނެތް ކަމަށެވެ. އެމްޑީޕީގެ ޕްރައިމަރީގެ ކެމްޕެއިނަށް ރަށްރަށަށް ވަޑައިގަތުމުން ޕީޕީއެމްގެ މެންބަރުން ވެސް އެ މަނިކުފާނަށް މަރުހަބާ ދެންނެވި ކަމަށް ނަޝީދު ވިދާޅުވިއެވެ.
މިއަދުގެ ނޫސްވެރިންގެ ބައްދަލުވުމުގައި ނަޝީދު ވަނީ މި ސަރުކާރުގެ މަސައްކަތްތަކަށް ވަރަށް ބޮޑަށް ފާޑުވިދާޅުވެފައެވެ. ފަސް އަހަރު ނިމިގެންދާއިރު، މި ސަރުކާރުގެ ގިނަ މަޝްރޫއުތަށް އަދިވެސް ނުނިމި އެބައޮތް ކަމަށާއި އެއީ ނާގާބިލު ބަޔަކު ގައުމު ހިންގަން ތިބުމުން ކަމަށް އެ މަނިކުފާނު ވިދާޅުވިއެވެ.
އެމްޑީޕީގެ ޕްރައިމަރީގެ ކެމްޕެއިނަށް ރަށްރަށަށް ވަޑައިގަތުމުން ޕީޕީއެމްގެ މެންބަރުން ދެއްވާ ތަރުހީބަށް ވަރަށް ބޮޑަށް ނަޝީދު ޝުކުރު އަދާކުރެއްވިއެެވެ. މި މަހުގެ 28 ވަނަ ދުވަހު އޮންނަ އެމްޑީޕީ ޕްރައިމަރީގައި ނަޝީދާ ވާދަކުރައްވާނީ މިހާރު ވެރިކަމުގައި ހުންނެވީ ރައީސް ސޯލިހެވެ.
