ސުވާދީބުގެ ވިސްނުމަކީ ޕްރޮގްރެސިވް ޚިޔާލެއް ކަމަށާއި އެ ވިސްނުމާ ދިމާލަށް މިސްރާބު ހިފުމަކީ ބޭނުންތެރިކަމެއް ކަމުގައި ދެކެވަޑައިގަންނަވާކަމަށް، އެމްޑީޕީގެ ޕްރައިމަރީގައި މިހާރު ވާދަ ކުރައްވަމުން ގެންދަވާ އެޕާޓީގެ ރައީސް މުހައްމަދު ނަޝީދު ވިދާޅުވެއްޖެއެވެ.

މިހާރު ކުރިޔަށްދާ އަމިއްލަފުޅު ކެޕްމޭން ހަރަކާތްތަކާއި ގުޅޭގޮތުން މިއަދު ނޫސްވެރިންނާއި ބައްދަލުކޮށް ވާހަކަ ދައްކަވަމުން ނަޝީދު ވިދާޅުވީ ލާމަރުކަޒު ކުރުމުގެ އެންމެ ފަހުން އައިސް ދާން އޮތް މަރުހަލާއަކީ އެއީ ކަމުގައެވެ. އަދި ވިދާޅުވީ "ރީޖަނަލް އެސްޕިރޭޝަން" (ސަރަހައްދީ އުއްދީމަށް) ޖާގަދިނުމަކީ މުހިންމު ކަމެއް ކަމަށެވެ.

އަޅުގަޑު ވަރަށް ބޮޑަށް އަނެއްހެން.. އަޅުގަޑު ދެކޭގޮތުގަ ޕްރޮގްރެސިވް ޚިޔާލެއް ސުވާދީބުގެ ވިސްނުމަކީ، އެ ވިސްނުމާއި ދިމާލަށް މިސްރާބު ހިފުން އެއީ އަޅުގަޑު ދެކޭ ގޮތުގައި ބޭނުންތެރިކަމެއް. އެއީ ލާމަޒުކަޒު ކުރުމުގެ އެންމެ ފަހުން އައިސް އަޅުގަޑުމެންނަށް ދާން އޮތް މަރުހަލާއަކީ.

ނަޝީދު ވިދާޅުވިއެވެ.

މި ނޫސްވެރިންގެ ބައްދަލުވުމުގައި ސުވަދީބުގެ ވިސްނުމަށް ދާން ތާއީދު ކުރައްވާކަމަށް ވިދާޅުވި ސަބަބާއި ގުޅޭގޮތުން ނޫސްވެރިޔަކު ކުރި ސުވާލަށް ޖަވާބު ދެއްވަމުން ނަޝީދު ވިދާޅުވީ ސުވާދީބު ވަކިދައުލަތެއްގެ ގޮތުގައި އުފެއްދުމަށް ބާރު އަޅާނެ ވާހަކަ ނުދަންނަވާކަމުގައެވެ.

އަދި ވިދާޅުވީ، އެހެންނަމަވެސް ދެކުނުގެ ރައްޔިތުންގެ "ސަދަން އެސްޕިރޭޝަންއެއް' ނުވަތަ ރައްޔިތުންގެ އުއްމީދުތަކެއް އެބަހުރި ކަމުގައެވެ. ނަޝީދުވިދާޅުވީ އެ އުއްމީދުތައް ވަރަށް ބޮޑަށް ގުޅިފައި އޮތީ އަމިއްލަވަންތަކަމާ ކަމުގައެވެ. އެއީ އެބޭފުޅުންނަށް އެމީހުންގެ ކަންތައްތައް ހިންގޭނެ ގޮތަކަށް ކަންކަން ރޭވުންކަމުގައިވެސް ނަޝީދު ވިދާޅުވިއެވެ.

ނަޝީދު ވިދާޅުވީ އެމަނިކްފާނަށް ސުވާދީބް ފެންނަނީ އިންޑިއާ ކަނޑުގެ މެދުގައި އޮތް ސަރަހައްދެއްގެ ގޮތުގައި ކަމުގައެވެ.

އެއީ ދިވެހިރާއްޖޭގެ ބައެއް. އެހެންނަމަވެސް ހަމަ ފޯޅަވައްސާއި، ސޭޝެލްސްއާއި މޮރިޝަސްއާއި ޑިއޯގޭ ގާސިއާއާއި އަދި ގޮސް ލާރި ޔޫނިއަންއާއި، މިއީ އިންޑިއަން އޯޝަންގެ ކަނޑުގެ ތެރޭ އެބަހުރި ބައިވަރު ޖަޒީރާ ރަށްތަކެއް. އެރައްތަކުގެ އެންމެ ޑިވެލޮޕްތަނަކީ އައްޑޫ. އެހެންވީމަ އަައްޑޫއަށް މިސްރާބު ޖެހޭނެ ދެކުނު އިންޑިއާ ކަނޑުގެ ބޮޑު ރަށަށް ވުމަށް. ދެން އޭގެ މާނައެއް ނޫން އެއީކީއެއް އަޅުގަޑުމެންނާ އައްޑުއާ.. އަޅުގަޑަށް ޔަގީން އައްޑޫ އެއްވެސް ރައްޔިތެއް ނޭދޭނެ ވަކިވެގަންނާކަށް، އަދި އަޅުގަޑުމެންނާ ދުރުގަ އުޅޭކަށް، އަޅުގަޑުވެސް ނޭދެން އެމީހުންނާ ދުރުގަ އުޅެން، ނުވެސް އުޅެވޭނެ، އަދި އަޅުގަޑުމެންގެ ގައުމުގެ ޔުނިޓް، މި އާބާދީގެ އަދަދަކީ އެހެން އެހާ ބޮޑު އަދަދެއް ނޫން، އެހެންވީމަ ސްކޭލް ވަރަށް ބޮޑަށް ވިސްނަންޖެހޭ، ވިސްނާއިރުގަ އަޅުގަޑުމެންނަށް ބޮޑަށް ރަގަޅުވާނީ ބޯޑަރެއް ނެތި އައްޑުއާ މާލެއާ ދޭތެރޭގަ ހުރިހާކަމެއްވެސް އަދި ސުވާދީބާ އުތުރާ ދޭތެރޭގަ ހުރިހާ މުއާމަލާތެއް ހިގަމުން ދެވޭގޮތް ވުން. އެއީ އަޅުގަޑު ދެކޭގޮތުގައި އެންމެންނަށްވެސް ފައިދާހުރި ގޮތް.

ނަޝީދު ވިދާޅުވިއެވެ.

މި ނޫސްވެރިންގެ ބައްދަލުވުމުގައި ނަޝީދު އިތުރަށް ވިދާޅުވީ އައްޑޫއަށް އަންނާންޖެހޭ ތަރައްގީގެ ގިނަ މަޝްރޫއުތަކެއް ވާކަމުގައެވެ. އޭގެ ތެރޭގައި ނަޝީދު ފާހަގަ ކުރެއްވީ އައްޑޫ އެއަރޕޯޓު ތަރައްގީ ކުރުމާއި، އައްޑުއަށް އައްސޭރި ޓުއަރިޒަމް ގެނައުމާއި އައްޑޫގައި މަސް ބަންދުކުރެވޭނެ ގޮތް ހެދުމުގެ ވާހަކަ ތަކެވެ. އަދި ބޭރުގެ ބަނދަރުތަކާއި އައްޑުއާއި ގުޅާލުމަށްޓަކާ އައްޑޫ ބަނދަރު ތަރައްގީ ކުރާންޖެހޭ ކަމުގައިވެސް ނަޝީދު ވިދާޅުވިއެވެ.

ނަޝީދު ވިދާޅުވީ އެމްޑީޕީގެ ރައްޔިތުންނާއި ސަރުކާރާއި ފުށުއަރަން މެދުވެރިވާ ސަބަބުތަކަކީ މި މަޝްރޫއުތައް ކުރިޔަށް ނުދާތީ ކަމުގައެވެ.