މިއަހަރުގެ ރިޔާސީ އިންތިޚާބު އޮންނަ ތާރީޚު އިއުލާން ކުރުމާއެކު، އަންނަ ފެބްރުއަރީމަހު ރިޔާސީ ކެމްޕޭން ފެއްޓެވުމަށް ނިންމަވާފައިވާ ކަމުގައި، އަމިއްލަ ގޮތުން ރިޔާސީ އިންތިޚާބުގައި ވާދަކުރައްވާނޭކަން ކުރިންވެސް އިއުލާން ކޮށްފައިވާ، ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެއެވެ.
އުމަރު ނަސީރު މިއަދު ކުރެއްވި ސޯޝަލް މީޑިއާ ޕޯސްޓެއްގައި ވިދާޅުވީ، ރިޔާސީ އިންތިޚާބު ބޭއްވުމަށް ހަމަޖެހިފައިވާ ތާރީޚު އިޢުލާން ކުރުމާ ގުޅިގެން، އާނާގެ ރިޔާސީ ކެމްޕޭން ފެށުމުގެ ފުރަތަމަ ޖަލްސާ އަންނަ ފެބްރުއަރީ 3 ވާ ހުކުރު ދުވަހުގެރޭ 9:00ގައި، ސަލްޓަންޕާރކް ގައި ބޭއްވުމަށް ހަމަޖެހިފައިވާ ކަމުގައެވެ.
މީގެ ކުރިންވެސް ރިޔާސީ އިންތިޚާބުގައި ވާދަ ކުރައްވާފައިވާ އުމަރު ނަސީރު ސޯޝަލް މީޑިއާގައި ކުރެއްވި ޕޯސްޓުގައިވަނީ، ރާއްޖެއަށް ދިމާވެފަހުރި ބޮޑެތި މައްސަލަތައް ޙައްލުކޮށް، ދިވެހިރާއްޖެ މުޅިން އާމިސްރާބަކަށް ގެންދިއުމަށް އޭނާއާއެކު ކުރިޔަށް ވަޑައިގަތުމަށް އެދިވަޑައިގެންފައެވެ. އޭނާ ވިދާޅުވީ އެހެންނޫނީ ދެންވެސް ރާއްޖެ ދާނީ ހަމަކުރިންވެސް ދިޔަގޮތަށް ކަމަށެވެ.
އުމަރު ނަސީރުވަނީ މީގެ ކުރިންވެސް ރިޔާސީ އިންތިޚާބުގައި ވާދަ ކުރައްވާފައެވެ. އަދި ފާއިތުވެދިޔަ 2018ގެ ރިޔާސީ އިންތިޚާބުގެ ކުރިންވެސް އެ އިންތިޚާބުގައި ވާދަކުރައްވާނޭކަމަށް ވިދާޅުވެ ފޯމު ހުށަހެޅުމަށް އޭނާ ތާއީދު ފޯމަށް ސޮއިވެސް ހޯއްދަވާފައި ވެއެވެ. އެހެންނަމަވެސް އެ އިންތިޚާބުގައި އޭނާ ވާދަ ކުރައްވާފައެއް ނުވެއެވެ.
އެއަށްފަހު މި ދައުރުގައި އުމަރުވަނީ ދިވެހި ނެޝެނަލް އެކްޝަން، (ޑީއެންއޭ) ނަމުގައި ސިޔާސީ ހަރަކާތެއް ފައްޓަވާފައެވެ. އެހަރަކާތް އިފްތިތާހު ކޮށްފައިވަނީ 2012ވަނަ އަހަރުގެ މާރޗްމަހުގެ 3 ވަނަ ދުވަހުއެވެ. މި ހަރަކާތް ފައްޓަވަމުން 2021 ވަނަ އަަހަރު އުމަރު ވިދާޅުވީ ކުރިޔަށް އޮތް ރިޔާސީ އިންތިޚާބަށް އެ ހަރަކާތުން ރިޔާސީ ކެނޑިޑޭޓަކު ނެރޭނެ ކަމަށެވެ.
އެހެންނަމަވެސް އޭގެފަހުން އެހަރަކާތް ކުރިޔަށް ގޮސްފައެއް ނުވެއެވެ. އެހަރަކާތުން އޭރު އިސްކޮށް ފެނުނު، ރައީސް މައުމޫންގެ ދަރިކަނބަލުން ދުންޔާ މައުމޫން ފަހުންވަނީ، ދާދިފަހުން އުފެއްދި އެމްއެންޕީއާއި ގުޅިވަޑައިގެންފައެވެ.
އިލެކްޝަންސް ކޮމިޝަނުން މިއަދު އިއުލާން ކޮށްފައިވަނީ މިހާރު ތާވަލްކޮށްފައިވާގޮތުން މިއަހަރުގެ ރިޔާސީ އިންތިޚާބު ބާއްވާނީ، އަންނަ ސެޕްޓެމްބަރު މަހުގެ 9 ވާ ހޮނިހިރު ދުވަހުކަމަށެވެ. އަދި އިންތިޚާބުގެ ދެވަނަ ބުރެއް ބާއްވަން ޖެހިއްޖެނަމަ، އޭގެ 21 ދުވަސްފަހުން 30 ސެޕްޓެމްބަރު ގައި ބާއްވަން ނިންމަވާފައިވާކަންވެސް ކޮމިޝަނުން މިއަދު އިއުލާން ކޮށްފައި ވެއެވެ.
އިލެކްޝަންސް ކޮމިޝަންގެ ރައީސް ފުވާދު ތައުފީގު މިއަދު ވިދާޅުވީ ރިޔާސީ އިންތިޚާބަށް ކުރިމަތިލާން ބޭނުންވާ ބޭފުޅުންނަށް އިންތިޚާބަށް ކުރިމަތިލެއްވުމަށް އަންނަ ޖުލައި މަހުގެ 3ވަނަ ދުވަހު ހުޅުވާލާނެ ކަމަށެވެ. މިއަހަރުގެ ރިޔާސީ އިންތިޚާބުގެ ޝިޢާރަކަށް އިލެކްޝަންސް ކޮމިޝަނުން ކަނޑައަޅުއްވާފައިވަނީ "މަގޭ ވިސްނުން، މަގޭ ވޯޓު" އެވެ.
މިއަދުގެ ނޫސްވެރިންގެ ބައްދަލުވުމުގައި އިލެކްޝަންސް ކޮމިޝަނުން ހާމަކޮށްފައި ވާގޮތުގައި މި އިންތިޚާބުގެ ވޯޓުލެވޭ މީހުންގެ ރަޖިސްޓްރީ އަންނަ މެއި މަހުގެ 2ވަނަ ދުވަހު އާންމުކުރާނެކަމަށެވެ. އަދި ވޯޓުލެވޭ މީހުންގެ ލިސްޓަށް ޝަކުވާ ހުށަހެޅުމަށް 30 ދުވަހުގެ މުއްދަތެއް ލިބޭނެކަމަށްވެސް އެކޮމިޝަނުން ވިދާޅުވެއެވެ. އަދި އެމީހަކު ރައްވެހިވެފައިވާ ތަން ފިޔަވައި އެހެންތަނެއްގައި ވޯޓުލާން ބޭނުންވާ މީހުން އަލުން ރަޖިސްޓްރީވުމަށް ޖުލައި މަހުގެ 16އިން އޮގަސްޓުމަހުގެ 5ވަނަ ދުވަށް ހުޅުވާލާނެކަމަށްވެސް އިލެކްޝަންސް ކޮމިޝަނުން ވިދާޅުވެއެވެ.
