ބޮލީވުޑްގެ ތަރި ޝާހިދު ކަޕޫރްގެ ފުރަތަމަ ސީރީޒް "ފަރްޒީ" ގެ ޓްރެއިލާ މިއަދު ދައްކާލައިފި އެވެ.
މިދިއަ އަހަރުގައި ޝޫޓިން ނިންމާލި މި ވެބް ސީރީޒް ގެނެސްދޭން ހަމަޖެހިފައިވަނީ އެމެޒޯން ޕްރައިމް ވީޑިއޯ އިންނެވެ. ހުރިހާ މަސައްކަތެއް ނިންމާ އޮން އެއާ މަރުހަލާގައި އޮތް މި ވެބް ސީރީޒް އަކީ ތުރިލާ އެކެވެ. މީގައި ކިޔައިދޭނީ އާދައިގެ ކުރެހުންތެރިޔަކު ކުށުގެ ވެއްޓަށް ހުށަހެޅި އެކަމުގެ ތެރޭގައި އޭނާއަށް ކުރިމަތިލާން ޖެހޭ ކަންކަމެވެ.
"ފަރްޒީ" އަކީ އެމެޒޯން ޕްރައިމަށް އެކްޓަރު މަނޯޖް ބަޖްޕާއީއާ އެކީ "ދަ ފެމިލީ މޭން" ގެ ދެ ސީޒަން ގެނެސްދިނުމަށް ފަހު، އެއަށް މިހާރު ވަރުން ދަވަނާ އެކީ "ސިޓަޑެލް އިންޑިއާ" ހަދަން ތައްޔާރީތައް ވަމުން އަންނަ ދެ ޑައިރެކްޓަރުން ކަމަށްވާ ރާޖް އެންޑް ޑީކޭ ޑައިރެކްޓްކޮށްފައިވާ އެއްޗެކެވެ.
"ފަރްޒީ" ގެ ކާސްޓްގައި ވިޖޭ ސެތުޕަތީ، ރާޝީ ކަންނާ، ކޭކޭ މެނަން، ރެޖީނާ ކެސަންޑްރާ، ޒާކިރު ހުސައިން، ބޫވަން އަރޯރާ، ކުބްރާ ސައިތު އަދި ކުރީގެ އެކްޓަރު އަމޯލް ޕަލޭކަރް ހިމެނެ އެވެ.
ރާޖް އެންޑް ޑީކޭ ޑައިރެކްޓްކޮށްފައިވާ މި ސީރީޒް ޕްރީމިއާކުރަން ހަމަޖެހިފައި ވަނީ އަންނަ މަހުގެ 10 ގައި އެމެޒޯން ޕްރައިމް ވީޑިއޯއިންނެވެ. އެންމެ ފަހުން ޝާޙިދު ފެނިގެން ގޮސްފައިވަނީ މިދިއަ އަހަރުގެ "ޖާޒީ" އެވެ. އޭނާގެ ކުރިއަށް އޮތް ފިލްމް އަކީ އަލީ އައްބާސް ޒަފަރުގެ "ބްލަޑީ ޑެޑީ" އެވެ.
ކޮމެންޓު ފޮނުވާ