އަމާޒަކީ ތައުލީމުން، އަތޮޅެއްވެސް، ރަށެއްވެސް، އަދި އެންމެ ފަރުދަކު ވިޔަސް ބާކީ ނުކުރުން: ރައީސް

ސަރުކާރުގެ އަމާޒަކީ ކުދިންނަށް ތަޢުލީމު ދިނުމުގައިވެސް އެއްވެސް އަތޮޅެއް، ރަށެއް އަދި ފަރުދެއްވެސް ބާކީ ނުކުރުންކަމުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

ރައީސުލްޖުމްހޫރިއްޔާ މިހެން ވިދާޅުވީ އައްޑޫސިޓީގެ ފެދޫ ސްކޫލަށް 50 އަހަރުފުރޭ މުނާޞަބާ ފާހަގަކުރުމުގެ ގޮތުން ރޭ ފޭދޫ ސްކޫލުގައި ބޭއްވި ޖަލްސާގައި ވާހަކަފުޅު ދައްކަވަމުންނެވެ.

މި ޖަލްސާގައި، ފާއިތުވެދިޔަ އަހަރުތަކުގައި ތައުލީމީގޮތުން ހޯދިފައިވާ ކާމިޔާބީތަކުގެ މައްޗަށް ބައްލަވާލައްވަމުން ރައީސް ސާލުހު ވިދާޅުވީ މިދިޔަ އަހަރަކީ، ރާއްޖޭގެ ތަޢުލީމީ ޙަޔާތުގައި ވަރަށް ތާރީޚީ ކާމިޔާބެއް ޙާޞިލުކުރެވުނު އަހަރެއް ކަމުގައެވެ. އެގޮތުން، ވ. އަތޮޅަކީ ރާއްޖޭގެ އެންމެ ކުޑަ އަދި އާބާދީވެސް އެންމެ ކުޑަ އަތޮޅުކަން ފާހަގަ ކުރައްވަމުން ރައީސް ވިދާޅުވީ މިދިޔަ އަހަރާ ޖެހެންދެން ވެސް، މަތީ ސާނަވީއަށް ކިޔަވައިދޭ ސްކޫލެއް އެ އަތޮޅަކު ނެތްކަމަށާއި، އެހެންނަމަވެސް އެ އަތޮޅުގައި މުޅިން އަލަށް މަތީ ސާނަވީއަށް ކިޔަވައިދޭން ފެށްޓީ މި ސަރުކާރުން ކަމުގެވެ.

އެއާއެކު، ރާއްޖޭގެ ހުރިހާ އަތޮޅެއްގައި މަތީ ސާނަވީއަށް ކިޔަވައިދޭ ސްކޫލްތައް މިހާރު ހުންނާނެ. އަމާޒަކީ، ކުދިންނަށް ކިޔަވައިދިނުމުގައިވެސް، އެންމެ އަތޮޅެއްވެސް، އެންމެ ރަށެއްވެސް، އަދި އެންމެ ފަރުދަކު ވިޔަސް ބާކީ ނުކުރުން.

ފޭދޫ ސުކޫލުގައި ބޭއްވުނު ޖަލްސާގައި ވާހަކަ ދައްކަވަމުން ރައީސް ވިދާޅުވިއެވެ.

ފާއިތުވެދިޔަ އަހަރު ތައުލީމީ ދާއިރާއަށް ސަރުކާރުން ގެނެސްދިން ކުރިއެރުންތަކުގެ މައްޗަށް ބައްލަވާލައްވަމުން ރައީސް ސާލިހު ވިދާޅުވީ ތައުލީމީ ދާއިރާގައި އުޅޭ ޓީޗަރުން އެ އަދާކުރައްވަނީ ހަމައެކަނި ވަޒީފާއެއް ކަމުގައި ސަރުކާރުން ނުދެކޭ ކަމުގައެވެ. އެގޮތުން ދަރިންނަށް އުނގަންނައިދިނުމުގެ މަސައްކަތުގައި ޓީޗަރުން ވެވަޑައިގަންނަވާ މަތިވެރި ޤުރުބާނީއަކީ، މާއްދީ ބަދަލަކުން އަގުކުރެވޭނެ ކަމެއް ނޫންކަންވެސް ރައީސް ފާހަގަ ކުރެއްވިއެވެ.

އެހެން ނަމަވެސް، ޕްރިންސިޕަލުންނާއި، ޑެޕިޔުޓީ ޕްރިންސިޕަލުންނާއި، ޓީޗަރުން، އަދި އެޑިޔުކޭޝަން ޑިވެލޮޕްމަންޓް އޮފިސަރުންގެ މުސާރައަށްވެސް، މިދިޔަ އަހަރުގެ މޭ މަހުން ފެށިގެން ވަނީ ހެޔޮ ބަދަލެއް ގެނެވިފައިކަން ފާހަގަ ކުރައްވަމުން ރައީސް ސާލިހު ވިދާޅުވީ ތަޢުލީމީ ދާއިރާގެ އެހެނިހެން މުވައްޒަފުންނަށް، އަސާސީ މުސާރައިގެ 35 އިންސައްތަ، ސްޕެޝަލް ޑިއުޓީ އެލަވަންސްގެ ގޮތުގައި ހަމަޖައްސައި ދެވިފައިވާކަމަށް ރައީސް ސާލިހި ވިދާޅުވިއެވެ.

ހަމައެކަނި މާލީ ޢިނާޔަތެއް ނޫން. ފަންނީ ތަމްރީނަކީ ވެސް ޒަމާނީ ތަޢުލީމު ފެތުރުމަށްޓަކައި ކޮންމެހެން ބޭނުންވާ ކަމެއް. ޕްރިންސިޕަލުން ތަމްރީނު ކުރުމަށް، މާސްޓަރ އޮފް އެޑިޔުކޭޝަނަލް މެނޭޖްމަންޓްގެ 20 ސްކޮލަރޝިޕް ފުރުޞަތު މިދިޔަ އަހަރު ވަނީ ހުޅުވާލެވިފައި. އެ ފުރުޞަތުގެ ބޭނުން ހިއްޕެވި 18 ޕްރިންސިޕަލުން މިހާރު އަންނަނީ ތަމްރީނުތައް ފުރިހަމަކުރަމުން.

ތައުލީމީ ދާއިރާގައި މަސައްކަތް ކުރައްވާ މުވައްޒަފުންގެ މުސާރައަށް މި ސަރުކާރުން ގެނެސް ދެއްވާފައިވާ ކުރިއެރުންތަކުގެ މައްޗަށް އަލި އަޅުވާލައްވަމުން ރައީސް ސާލިހު ވިދާޅުވިއެވެ.

މި ޖަލްސާގައި ރައީސުލްޖުމްހޫރިއްޔާ ވަނީ ފޭދޫ ސްކޫލުގެ މުވައްޒަފުންގެ ތެރެއިން މެދުނުކެނޑި 15 އަހަރު ޚިދުމަތުގައި ދެމިތިބި މުވައްޒަފުންނަށް ރަންޔޫބީލްގެ ފިލާ ހަވާލުކޮށްދެއްވާފައެވެ.