މާފަންނުގައި ހުންނަ އިންޑިއަން ރެސްޓޯރެންޓު "އީވްނިން ކެފޭ"ގައި ރޯވެ ހިނގި އަލިފާނުގެ ހާދިސާ ހިނގި ސަރަހައްދަށް ނާއިބު ރައީސް ފައިސަލް ނަސީމް ޒިޔާރަތް ކުރައްވައިފިއެވެ.
އެމްއެންޑީއެފްއިން ހާމަ ކޮށްފައިވާ ގޮތުގައި އޯކިޑް މަގުގައި ހުންނަ "އީވްނިންގ ކެފޭ" ބަދިގޭގައި އަލިފާނުގެ ޙާދިސާއެއް ހިނގައިގެން އެމްއެންޑީއެފް ފަޔަރ އެންޑް ރެސްކިއު ސަރވިސްއިން ހަރަކާތްތެރިވާން ފަށާފައިވަނީ މި ޙާދިސާގެ ރިޕޯޓް 18:12 ހާއިރު ލިބުމާއި އެކުކަމަށެވެ.
ހާދިސާ ހިނގުމާއެކު މިސަރަހައްދަށް މީހުން އެއްވުން ވަނީ މަނާ ކޮށްފައެވެ. މައުލޫމާތު ލިބިފައިވާ ގޮތުގައި މި ހާދިސާ ހިނގުމާއެކު ކާއިރި ބައެއް ގެތަކުން ވަނީ މީހުން ހުސްކޮށްފައެވެ. އަދި ދުމުގެ އަސަރު ކޮށްގެން ބައެއް މީހުން ހޮސްޕިޓަލަށްވެސް ގެންގޮސްފައި ވެއެވެ.
މިއީ ފާއިތުވި ދެފަހްތާ ތެރޭގައި ރާއްޖޭގައި ހިނގި މިފަދަ ދެވަނަ އަލިފާނުގެ ހާދިސާއެވެ. ފާއިތުވެދިޔަ ހަފްތާގައި މާލޭ ނީލަން ހިފާރަ ސަރަހައްދުގައި ރޯވެ ސަރަހައްދުވަނީ އަދާ ހުލިވެފައެވެ. އަދި ފާއިތުވެދިޔަ ހަފްތާގައި ފިޔޯރީ ސްކޫލުގެ ބާ އިމާރާތުގައި ވަރުގަދަ އަލިފާނުގެ ހާދިސާއެއް ހިނގާ އެ ސްކޫލުގެ ބާއިމާރަތްވަނީ އަނދާ ހުލިވެފައެވެ.
މި އަލިފާނުގެ ހާދިސާތަކާއި ގުޅިގެން ފުލުހުންގެ މުވައްސަސާއިން ބުނެފައިވަނީ މިހާދިސާތަކާއި ގުޅޭ ތަހުގީގެއް ފަށާފައިވާ ކަމަށާއި އަދި މި ތަހުގީގު ކުރިޔަށް ގެންދަނީ ބޭރުގެ ތަޖުރިބާކާރެއްގެ އެހީގައި ކަމަށެވެ.
