2018 ވަނަ އަހަރު ރައީސް ސާލިހު ވެރިކަމަށް ގެނައީ 18 މަސް ދުވަހަށް ކަމަށާއި، އެމްޑީޕީގެ މެނިފެސްޓޯގަވެސް އެވާހަކަ އޮންނާނެ ކަމުގައި، އެމްޑީޕީގެ ޕްރައިމަރީއަށް ކެމްޕޭން ކުރައްވަމުން ގެންދަވާ، އެޕާޓީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އަދި ނަޝީދު ވިދާޅުވީ ރައީސް ސާލިހު ވެރިކަމަށް ގެނައީވެސް އެމަނިކްފާނު ކަމަށާއި މިހާރު ނިކުމެ ހުންނެވީ ރައީސް ސާލިހު ވެރިކަމުން ބޭލުމަށް ކަަމަށެވެ.
އެމްޑީޕީގެ ކުރިއަށް އޮތް ރިޔާސީ ކެމްޕޭނަށް ބ. އަތޮޅަށް މިހާރު ކުރައްވަމުން ގެންދަވާ ދަތުރުފުޅުގައި އެ އަތޮޅު ހިތާދޫގައި ހުންނަވާ ވާހަކަ ދައްކަވަމުން ނަޝީދު ވިދާޅުވީ 2018ގެ އިންތިޚާބާއި ހަމައަށް އައިއިރު އޭރު އިދިކޮޅުގައި ތިއްބެވި އެއްވެސް ސިޔާސީ ލީޑަރަކަށް ވެރިކަމަށް ކުރިމަތި ލެއްވޭނެ އެއްވެސް ގޮތެއް ނެތްކަމަށެވެ. އަދި ރައީސް ސާލިހު އިންތިޚާބަށް ނެރެންޖެހުނު ސަބަބަކީވެސް އެއީކަމުގައި ނަޝީދު ވިދާޅުވިއެވެ.
އެހެންވެ، އެއްވެސް މީހަކަށް ނެތް 2018 ގައި ނުކުމެ، އިންތިހާބުގައި ބައިވެރިވެވޭކަށް. ހުރިހާ އެންމެން އެކުގައި ނިންމީ ރައީސް ސޯލިހް އަޅުގަނޑުމެން ނެރުމަށް.
ހިތާދޫގައި ތިބި ނަޝީދުގެ ސަޕޯޓަރުންނާއި ވާހަކަ ދައްކަވަމުން ނަޝީދު ވިދާޅުވިއެވެ.
މި ބައްދަލުވުމުގައި ނަޝީދު އިތުރަށް ވިދާޅުވީ ރައީސް ސާލިހު ވެރިކަމަށް ގެނައީވެސް އެމަނިކްފާނު ކަމަށާއި އަދި މިހާރު ކުރައްވަމުން ގެންދަވާ މަސައްކަތަކީ ރައީސް ސާލިހު ވެރިކަމުން ބޭއްލުއްވުމުގެ މަސައްކަތް ކަމުގައެވެ. އަދި އެކަން ކުރައްވާނެކަމަށް ވިދާޅުވަމުން ނަޝީދު ވިދާޅުވީ އެމްޑީޕީގެ ޓިކެޓާއެކު އަލުން ހިތާދޫއަށް ވަޑައިގަންނަވާނޭ ކަމުގައެވެ.
ރައީސް ވެރިކަމަށް ގެނައީ އަޅުގަނޑު، އެމަނިކުފާނު ވެރިކަމުން ބާލާނީ ވެސް ހަމަ އަޅުގަނޑު، އިރާދަކުރެއްވިއްޔާ އަޅުގަނޑުމެން އެކަން ކުރާނަން. އަޅުގަނޑުމެން އިންތިހާބު ކާމިޔާބު ކުރާނަން. ރާއްޖޭގެ ރައީސުލްޖުމްހޫރިއްޔާގެ ގޮތުގައި ވެސް އެމްޑީޕީގެ ޓިކެޓު ހިފައިގެން އަޅުގަނޑު ހިތާދޫ އަށް އަންނާނަން.
ކުރައްވަމުން ގެންދަވަނީ ރައީސް ސާލިހުގެ ސަރުކާރު ނިމުމަކަށް ގެނައުމުގެ މަސައްކަތްކަން ހާމަ ކުރައްވަމުން ނަޝީދު ވިދާޅުވިއެވެ.
މި ބައްދަލުވުމުގައި ނަޝީދުވަނީ، އެމްޑީޕީގެ ދަފްތަރުން އެމަނިކްފާނަށް ތާއީދުކުރާ 39،000 މެމްބަރުން އުނިކޮށްފައިވާކަމަށް ކުރައްވަމުން ގެންދަވާ ތުހުމަތުތައް ތަކުރާރު ކުރައްވާފައެވެ. އަދި ވިދާޅުވީ އެ 39،000 މެމްބަރުންގެ ވޯޓާ ނުލާ ރައީސް ސާލިހަށް ކުރިޔަށް އޮތް ރިޔާސީ އިންތިޚާބު ކާމިޔާބު ނުކުރެއްވޭނެ ކަމުގައެވެ.
39،000 މީހުން ޕާޓީގެ ދަފްތަރުން މި ކަނޑާލީ އެތެރޭގެ އިންތިހާބު ހަލުވަންވެގެން. އަޅުގަނޑަށް ވޯޓު ދީފާނެ ކަމަށް ފެންނަ މީހުން އެ ލިސްޓުން އުނި ކުރަންވެގެން.
ނަޝީދު ވިދާޅުވިއެވެ.
ނަޝީދު ވިދާޅުވީ ކުރިޔަށް އޮތް ރިޔާސީ އިންތިޚާބުގައި އެމަނިކްފާނު ވިދާޅުވިއަސް ރައްޔިތުން ތިބީ ރައީސް ސާލިހަށް ވޯޓުދޭން ނޫންކަމުގައެވެ.
