އެމްޑީޕީގެ މާޒީގައި، އެންމެ ފުރަތަމަ ވެރިކަމަށް އައިސްވެސް ކުރީ މުޒާހިރާ ކަމަށާއި، އިދިކޮޅުގަ ތިބެގެންވެސް ކުރީ މުޒާހަރާ ކަމަށާއި އެހެންނަމަވެސް ދެން އެދުވަސް އިއާދަވާން ނޭދޭ ކަމުގައި ރައީސް ސާލިހު ވިދާޅުވެއްޖެއެވެ.
މިހާރު ކުރިޔަށްދާ އެމްޑީޕީގެ ރިޔާސީ ޕްރައިމަރީގެ ކެމްޕޭންގައި، އެޕާޓީގެ މާލޭ ދާއިރާގެ މެމްބަރުންނާއި އަދި އޭގެ އިތުރުން ކެމްޕޭން ޓީމުތަކާއި ބައްދަލުކުރުމަށް ރޭ ދަރުބާރުގޭގައި އޮތް ބައްދަލުވުމުގައި ވާހަކަ ދައްކަވަމުން ރައީސް ސާލިހު ވިދާޅުވީ ޚިޔާލު ފާޅުކުރުމާއި މުޒާހިރާކުރުމަކީ ލިބިދީފައި އޮތް ހައްގެއް ކަމަށާއި، އެހެންނަމަވެސް އެކަމުވެސް ކޮންމެވެސް ހަމަޔަކާއި އުސޫލެއް އޮންނާން ޖެހޭ ކަމުގައެވެ.
އެހެންނަމަވެސް އަޅުގަނޑުމެންގެ އެ ދުވަހުގެ ހާލަތަކީ ވެރިކަމުގައި ތިބިއިރު ވެސް މުޒާހަރާ، އިދިކޮޅުގައި ތިބިއިރު ވެސް މުޒާހަރާ. ކޮންމެވެސް ހަމައެއް އޮންނަން ޖެހޭނެ ނޫންތޯ. ކޮންމެވެސް އުސޫލެއް އޮންނަން ޖެހޭނެ ނޫންތޯ. އަޅުގަނޑަކަށް ނުފެނޭ ވެރިކަމުގައި ތިބެގެން މުޒާހަރާ ކުރަންޖެހޭ ސަބަބެއް. ސަރުކާރު ބަދަލުވީމާ އަޑު އުފުލެން އޮތް ގޮތަކަށް އުފުލާނީ. މިއަދު އަޅުގަނޑުމެން ވިސްނަންވީ އެ ދުވަހަށް އެނބުރި ދާންވީތޯ. މިއީ އަޅުގަނޑުމެންގެ ކުރިމަތީގައި އޮތް ސުވާލެއް.
ނަޝީދުގެ ވެރިކަމުގައާއި އަަދި އޭގެފަހުން އެމްޑީޕީ އިދިކޮޅުގައި އޮތް އިރު އެޕާޓީންގެ ގެންގުޅުނު ބައެއް ސިޔާސަތުތަކަށް ފާޑު ވިދާޅުވަމުން ރޭގެ ބައްދަލުވުމުގައި ރައީސް ސާލިހު ވިދާޅުވިއެވެ.
އެމްޑީޕީގެ މާލޭ ދާއިރާގެ ގިނަ އަދަދެއްގެ އާންމު މެމްބަރުންވެސް ބައިވެރިވި މި ޖަލްސާގައި ވާހަކަ ދައްކަވަމުން ރައީސް ސާލިހު ވިދާޅުވީ ގިނަބައެއްގެ މިންނެތް މަސައްކަތުން ރާއްޖޭގައި އޭރު އޮތް އަނިޔާވެރި ވެރިކަން ބަދަލުކުރެވި، މިހާރު ގައުމަށް ހަމަޖެހުން ގެނެވިފައި ވާކަމުގައެވެ. އަދި ރައީސް އެދިވަޑައިގަތީ އެމަނިކްފާނުގެ ވެރިކަމުގެ ފާއިތުވި 4 އަހަރާއި އޭގެ ކުރިން ރާއްޖޭގަ އޮތް ހާލަތާއި ކޮންމެ ބޭފުޅަކުވެސް އަމިއްލަފުޅަށް ވަޒަން ކޮށްލުމަށެވެ.
އަމިއްލަ އަށް ވިސްނަވާ މިކަންތައްތަކާއި ދޭތެރޭ. ވެރިކަމަށް ގޮސް މުޒާހަރާ ކުރާނީތޯ މަގުމަތީގައި ތިބެގެން މުޒާހަރާ ކުރާނީތޯ ނޫނިއްޔާ މިގޮތަށް ހަމަޖެހިގެން އަޅުގަނޑުމެންގެ އާއްމު ދިރިއުޅުމައިގެން އާއިލާތަކުގައި ކުރިޔަށް ދާނީތޯ.
ރައީސް ސާލިހު ވިދާޅުވިއެވެ.
ރައީސް ސާލިހު ވިދާޅުވީ މިހާރު ކުރިޔަށްދާ ޕްރައިމަރީ ކެމްޕޭންގައިވެސް އެމަނިކްފާނާއި ބައްދަލުވާ ބައެއް މީހުންގެ އެންމެ ބޮޑު އެއް ކަންބޮޑުވުމަކީ ގައުމު ހަލަބޮލިވެގެން ދިއުންކަމުގައެވެ. މިގޮތުން، ކެމްޕޭންގައި ދިމާވާ ވިޔފާރަވެރިންވެސް، އެމީހުންގެ ވިޔަފާރިތައް ބަންދުވެ، ހަމަޖެހިލައިގެން އުޅެވޭނެ މާހައުލެއް ނެތިދާކަށް ބޭނުން ނުވާކަމަށް ވިދާޅުވާ ކަމުގައި ވިދާޅުވިއެވެ. އެހެންކަމުން ދެން އެދުވަސް އިއާދަކުރަން ބޭނުންނުވާ އެތައް ރައްޔިތުންނެއް މިއަދު ތިބިމަކަށް ރައީސް ސާލިހު ވިދާޅުވިއެވެ.
އަމިއްލަ އަށް ވަޑައިިގެން ވިދާޅުވީ ތިމަންނާ މިއައީ ރައީސް އަށް ތާއީދު ކުރަންވެގެންނޭ. ތިމަންނަ އަށް ކުރެވެން އޮތް ހުރިހާ ކަމެއް ޖާނާ މާލުން ކޮށްދެން ތައްޔާރަށޭ މިހުރީ. ތިމަންނަ ބޭނުމެއް ނުވެއޭ ތިމަންނަގެ ވިޔަފާރި ބަންދުވެފައި ހުންނާކަށެއް. ތަޖުރިބާ ކޮށްފީމޭ. ރޭގަނޑު ފިހާރަ ހުޅުވާލެވެނީއެކޭ ނޫނޭ. އެހެންނަމަވެސް މިހާރު ރޭގަނޑު ފިހާރަ ހުޅުވާލައިގެން ވިޔަފާރި ކުރެވެއޭ. ދެމަފިރިން އެކީގައި ބޭރަށް ގޮސްލެވޭ. އެހެންވީމަ މިކަން ދަމަހައްޓަން ތިމަންނާ ބޭނުމޭ. އެނބުރި އެ ދުވަހަކަށް ދާކަށް ތިމަންނާ ބޭނުމެއް ނޫނޭ.
ޕްރައިމަރީ ކެމްޕޭންގައި އެމަނިކްފާނާއި ބައްދަލުވި މީހެއްގެ ޝުއޫރު ހިއްސާ ކުރައްވަމުން ރައީސް ސާލިހު ވިދާޅުވިއެވެ.
ރޭގެ ބައްދަލުވުމުގައި ރައީސް ސާލިހު ވިދާޅުވީ މި ސަރުކާރުން އަޅާންފެށި ފްލެޓްތައް ނިންމާ އެ ފްލެޓްތަކަށް މިއަހަރު މެދެއްހާ ހިސާބުގައި މީހުންނަށް ވަދެވޭނަކަމަށެވެ.
ރައީސް ވިދާޅުވީ ގޯއްޗާއި ފްލެޓް ދިނުމަށް މިހާރު ކުރަމުންދާ މަސައްކަތްތަކަކީ އިވޭލުއޭޝަންގެ މަސައްކަތްތައް ކަމަށާއި، އެމަސައްކަތް ސަރުކާރުން ވީހާވެސް އިންސާފުވެރިކޮށް ހާމަކަން ބޮޑު ގޮތެއްގައި ކުރައްވާއްނެކަމުގައެވެ.
ކޮމެންޓު ފޮނުވާ