މި ސަރުކާރުން އަޅާންފެށި ފްލެޓްތައް ނިންމާ އެ ފްލެޓްތަކަށް މިއަހަރު މެދެއްހާ ހިސާބުގަ މީހުންނަށް ވަދެވޭނަކަމަށް ރައީސް ސާލިހު ވިދާޅުވެއްޖެއެވެ.
މިހާރު ކުރިޔަށްދާ އެމްޑީޕީގެ ރިޔާސީ ޕްރައިމަރީގެ ކެމްޕޭންގައި، އެޕާޓީގެ މާލޭ ދާއިރާގެ މެމްބަރުންނާއި އަދި އޭގެ އިތުރުން ކެމްޕޭން ޓީމުތަކާއި ބައްދަލުކުރުމަށް ރޭ ދަރުބާރުގޭގައި އޮތް ބައްދަލުވުމުގައި ވާހަކަ ދައްކަވަމުން ރައީސް ސާލިހު ވިދާޅުވީ އެ ފްލެޓްތަކަށް، މާލޭ ރައްޔިތުންނަށް ނުވަތަ ފްލެޓްތަކަށް ބޭނުންވެފައި ތިބި މީހުންނަށް މިއަހަރު ތެރޭގައި އެފްލެޓްތަކަށް ވަންނަން ފެށޭވަރު ކޮށްދެއްވާނެ ކަމުގައެވެ.
ފްލެޓްތައް ނިންމާ، އެ ފްލެޓްތަކަށް މާލޭ ރައްޔިތުންނަށް، ފްލެޓަށް ބޭނުން ވެފައިތިބި ރައްޔިތުންނަށް ވަންނަން ފެށޭވަރު މިއަހަރުތެރޭގައި އަޅުގަޑުމެން ކުރާންނަ.
އެމްޑީޕީގެ މާލޭ ދާއިރާގެ ގިނަ އަދަދެއްގެ އާންމު މެމްބަރުންވެސް ބައިވެރިވި މި ޖަލްސާގައި ވާހަކަ ދައްކަވަމުން ރައީސް ސާލިހު ވިދާޅުވިއެވެ.
މި ޖަލްސާގައި ވާހަކަ ދައްކަވަމުން ރައީސް ވިދާޅުވީ، ފްލެޓްގެ ވާހަވެސް، އަދި ގޯތީގެ ވާހަކަވެސް އެހެން ބޭފުޅަކު ދައްކަވާނެކަމެއް ނެތްކަމަށާއި، މިއީ މިކަން އޮތް ގޮތް ކަމުގައެވެ.
ފްލެޓްގެ ވާހަކައެއްވެސް އެހެން ބޭފުޅަކު ދައްކަވާނެ ކަމެއް ނެތް.. ގޯތީގެ ވާހަކައެއްވެސް އެހެން ބޭފުޅަކު ދައްކަވާނެ ކަމެއްނެތް. މިއީ މިކަން އޮތްގޮތް.
މިހާރު ކުރިޔަށްދާ ކެމްޕޭންގައި ބޯހިޔާވަހިކަން ނެތް މީހުންނަށް ބޯހިޔާވަހިކަން ފޯރުކޮށްދޭނެ ކަމަށް ވިދާޅުވެ ނަޝީދު ވެވަޑައިގަންނަވަނުން ގެންދަވާ ވައުދުތަކަށް އިޝާރާތް ކުރައްވަމުން ރައީސް ސާލިހު ވިދާޅުވިއެވެ.
މި ބައްދަލުވުމުގައި އިތުރަށް ވާހަކަ ދައްވަމުން ރައީސް ސާލިހު ވިދާޅުވީ މާލޭ ސަރަހަައްދުގައި މިހާރުވެސް 16،000 އަށް ވުރެ ގިނަ ފްލެޓާއި ގޯއްޗާއި ރޯހައުސް ދިނުމުގެ މަޝްރޫއުތައް ކުރިއަށްދާ ކަމަށާއި މި ސަރުކާރުން ގޯއްޗާއި ފްލެޓު ދޭނީ އެއްވެސް ރައްޔިތަކު ބާކީ ނުކޮށް ކަމަށެވެ.
ރައީސް ވިދާޅުވީ މީގެ ކުރިން އެއްވެސް ސަރުކާރަކުން ނުހިންގާވަރުގެ ބޯހިޔާވަހިކަމުގެ މަޝްރޫއެއް މިސަރުކާރުން ކުރިޔަށް ގެންދަވާ ކަމަށާއި، މާލެއަށް އެކަނި ޚާއްސަ ކޮށްގެންވެސް 7،000 އަށްވުރެ ގިނަ ފްލެޓާއި 5،000 ގޯތި ދިނުމުގެ މަޝްރޫޢު މިހާރުވެސް ކުރިޔަަށް ދާކަމަށެވެ.
މިއީ އޮޅުވާލައިގެން ވޯޓު ހޯދަން ދައްކާ ވާހަކައެއް ނޫން. ވޯޓަކާ މިކަމަކާ ގުޅުމެއް ނެތް، މި އަހަރުގެ މެދަށް އަންނައިރުގައި އަޅުގަނޑުވީ ވައުދާ އެއްގޮތަށް މާލޭގެ ރައްޔިތުންނަށް އަޅުގަނޑުމެން ގޯތި ކަނޑައި ދޭނަން.
ބޯހިޔާވަހިކަމުގެ ވައުދުތައް ވެވަޑައިގަންނަވަނީ ވޯޓު ހޯދުމަށް އޮޅުވާލައިގެން ނޫންކަމަށް ވިދާޅުވަމުން ރައީސް ސާލިހު ވިދާޅުވިއެވެ.
ރައީސް ވިދާޅުވީ ގޯއްޗާއި ފްލެޓް ދިނުމަށް މިހާރު ކުރަމުންދާ މަސައްކަތްތަކަކީ އިވޭލުއޭޝަންގެ މަސައްކަތްތައް ކަމަށާއި، އެމަސައްކަތް ސަރުކާރުން ވީހާވެސް އިންސާފުވެރިކޮށް ހާމަކަން ބޮޑު ގޮތެއްގައި ކުރައްވާއްނެކަމުގައެވެ.
މިހާރު ހުޅުމާލޭގައި ކުރިއަށްދާ ހައުސިން މަޝްރޫއުތަކުގެ ތެރެއިން އެންމެ ބޮޑު ދެމަޝްރޫއެއް ކުރިޔަށް ގެންދަނީ އިންޑިއާގެ ދެ ކުންފުންޏަކުންނެވެ. އެއީ އިންޑިއާގެ ޖޭއެމްސީ ޕްރޮޖެކްޓްސް ލިމިޓެޑާއި ނެޝަނަލް ބިލްޑިންސް ކޮންސްޓްރަކްޝަން ކޮމްޕެނީ (އެންބީސީސީ) އިންނެވެ. މި ދެކުންފުނިންވެސް، ކޮންމެ ކުންފުންޏަކުން ހުޅުމާލޭގައި 2،000 ފްލެޓް އަޅަމުން އެބަ ގެންދެއެވެ.
އޭގެ އިތުރުން ރާއްޖޭގެ ބައެއް ކުންފުނިތަކުންވެސް ހުޅުމާލޭގައި ފްލެޓް އެޅުމުގެ މަސައްކަތް ކުރިޔަށް އެބަ ގެންދެއެވެ. އޭގެ ތެރޭގައި އެޕޯލޯ ހައުސިން މަޝްރޫޢުގެ ދަށުން ހުޅުމާލޭ ފޭސް އެކެއްގައި ކުރިޔަށް ގެންދާ މަޝްރޫއު ހިމެނެއެވެ. މި މަޝްރޫޢުގައި ހިމެނެނީ ކައުންސިލް ހައުސިން ޔުނިޓްގެ 120 ޔުނިޓާއި، މެދު ފަންތީގެ 660 ޔުނިޓެވެ. އެޕޯލޯއިން މަސައްކަތް ކުރަމުންދަނީ މި ޔުނިޓްތަކުގެ މަސައްކަތް އަންނަ މޭމަހު ނިންމާ ސަރުކާރާ ހަވާލުކުރުމަށެވެ.
