މޯލްޑިވްސް ޕޯޓްސް ލިމިޓެޑްގެ ޑީއެމްޑީގެ މަގާމަށް ރައީސް ސާލިހު އައްޔަން ކުރައްވާފައިވާ، އެމްޑީޕީގެ އެކްޓިވިސްޓެއް ކަމުގައިވާ އަޙްމަދު އަދުހަމް، ކުރިޔަށް އޮތް އެމްޑީޕީގެ ރިޔާސީ ޕްރައިމަރީގައި ނަޝީދަށް ތާއިދު ކުރައްވާކަން ހާމަކޮށްފިއެވެ.
މިގޮތުން މިހާރު ކުރިޔަށްދާ އެމްޑީޕީގެ ޕްރައިމަރީގައި ރައީސް ސާލިހާއި ވާދަ ކުރައްވަމުން ގެންދަވާ، އެޕާޓީގެ ރައީސް މުހައްމަދު ނަޝީދަށް ތާއީދުކުރައްވާކަން އަދުހަމް އާންމު ކޮށްފައިވަނީ ނަޝީދުގެ ކެމްޕޭނުން އާންމުކުރި ވީއޯ މެސެޖެއްގައެވެ.
މި ވީޑިއޯ މެސެޖުގައި އޭނާ ވިދުވެފައިވަނީ އޭނާ ނަޝީދަށް ތާއީދުކުރަން ނިންމެވީ، ފެށުނީއްސުރެ އެމްޑީޕީގެ އަސާސްތަކަކީ އޭނާ ގަބޫލުކުރާ އަސާސްތަކަކަށް ވާތީކަމުގައެވެ. އޭނާ ވިދާޅުވީ އެމްޑީޕީގައި އޭނާ ހުރީ މަގާމާއި ޖާހަތާއި އިއްޒަތް ބޭނުން ވެގެން ނޫންކަމުއެވެ.
އަދި އޭނާ ވިދާޅުވީ މިހާރަކަށް އައިސް އެމްޑީޕީގެ އަސާސްތައް ފުޑިގެންދާތަން ފެންނާތީ ފުނޑެމުންދާ އެމްޑީޕީގެ އަސާސްތައް ދިރުވޭނެކަމަށް އޭނާއަށް ފެންނާން އޮތީ ނަޝީދަށް ތާއީދުކޮށްގެން ކަމަށްވާތީ، މި ކެމްޕޭންގައި ނަޝީދަށް ފުރިހަމަޔަށް ތާއީދު ކުރާ ކަމުގައެވެ.
މޯލްޑިވްސް ޕޯޓުސް ލިމިޓެޓްގެ ޑިއެމްޑީ ނަޝީދަށް ތާއީދު ކުރައްވާކަން ހާމަކުރައްވާފައިވާއިރު، ސަރުކާރުން ކުންފުނިތަކުގެ އިސް މަގާމްތަކުގައި ތިއްބެވި ގިނަ ބޭފުޅުން ތާއީދުކުރައްވަމުން ގެންދަވަނީ ރައީސް ސާލިހަށްކަން ފާހަގަ ކޮށްލެވެއެވެ. މީގެ ތެރޭގައި ގިނަ ކުންފުނިތަކުގެ އެމްޑީންނާއި ޑީއެމްޑީންވެސް ހިމެނެއެވެ.
އަދި ރައީސް ސާލިހު ދެއްވާފައިވާ ސިޔާސީ މަގާމްތަކުގައި ތިއްބެވި ގިނަ ފަރާތްތަކުންވެސް ތާއީދުކުރަމުން ގެންދަނީ ރައީސް ސާލިހަށެވެ.
އަދުހަމް ޕޯސްޓު ލިމިޓެޑްގެ ޑިއެމްޑީގެ މަގަމަށް އައްޔަ ކޮށްފައިވަނީ 2020 ވަނަ އަހަރުގެ އޮގްސްޓުމަހުގެ 9 ވަނަ ދުވަހުއެވެ. އަދި އޭނާވަނީ ފާއިތުވެދުޔަ ކައުންިސިލް އިންތިޚާބުގައި އެމްޑީޕީގެ މޭޔަރުކަމުގެ ޓިކެޓު ހޯދުމަށް މިހާރުގެ މޭޔަރު އަލީ ނިޒާރުއާއި ވާދަކޮށް ބަލިވެފައެވެ.
މިހާރު ކުރިޔަށް އެމްޑީޕީގެ ރިޔާސީ ޕްރައިމަރީގައި ވާދަކުރައްވަމުން ގެންދަވަނީ އެމްޑީޕީގެ އެންމެ އިސް ދެ ލީޑަރުންކަމަށްވާ އެޕާޓީގެ އިސްލީޑަރު ރައީސް ސާލިހާއި، އެޕާޓީގެ ރައީސް މުހައްމަދު ނަޝީދެވެ.
އެމްޑީޕީގެ ރިޔާސީ ޕްރައިމަރީ ބޭއްވުމަށް ހަމަޖެހިފައިވަނި މިމަހުގެ 28ވަނަ ދުވަހުއެވެ.
