މިމަހު 28 ގައި ބޭއްވުމަށް ހަމަޖެހިފައިވާ އެމްޑީޕީގެ ރިޔާސީ ޕްރައިމަރީގެ ކެމްޕޭންގައި ރައީސް ސާލިހު، އަމިއްލަފުޅު އުފަން ރަށް ކަމުގައިވާ ހިންނަވަރަށް ވަޑައިގަތުމުން، ރަށުގެ ކުދި ބޮޑު ގިނައަދަދެއްގެ ބަޔަކު އެނަނިކްފާނަށް މަރުހަބާ ދެންނެވުމަށް އެއްވެއްޖެއެވެ.
ރައީސް ސާލިހު ހިންނަވަރަށް މިރޭ ވަޑައިގެންފައި މިވަނީ، މިހާރު ކުރައްވަމުން ގެންދަވާ ކެމްޕޭން ދަތުރުފުޅުގައި، ޅ. އަތޮޅުގެ ބައެއް ރަށްތަކަށް މިއަދު ވަޑައިގެންނެވުމަށް ފަހުފައެވެ.
އެމްޑީޕީގެ އިސް ލީޑަރު، ރައީސް @ibusolih އެމަނިކުފާނު ނިސްބަތްވެވަޑައިގަންނަވާ ޅ.ހިންނަވަރަށް ވަޑައިގެންނެވުމުން ގިނަ އަދަދެއްގެ ރައްޔިތުން ނިކުމެ ހޫނު މަރުހަބާއެއް ކިޔައިފި
ހުއްޓި ހުރުވޭކަށް ނެތް
#MDPKuriah
#Ibu2023 pic.twitter.com/LMOTXkuMvW— MDP Kuriah (@MDPKuriah) January 8, 2023
މިގޮތުން ރޭ ނ. ވެލިދޫގައި ބޭއްވި ޖަލްސާއަށްފަހު މިއަދު ރައީސް ސާލިހު އެންމެ ފުރަތަމަ ވަޑައިގެންފައިވަނީ ޅ. ކުރެންދޫއަށެވެ. ޅ. ކުރެންދޫއިން ރައީސް ސާލިހަށް ހޫނު މަރުހަބާއެއް ކިޔާފައި ވެއެވެ. ކުރެންދޫއަށް ރައީސް ސާލިހު ވަޑައިގަތީ ނ. މިލަދޫއަށް ކުރެއްވި ދަތުރުފުޅަށްފަހުއެވެ.
އެއަށްފަހު، މިއަދު ޅ. އަތޮޅުގެ ދެވަނަ މަންޒިލެއްގެ ގޮތުގައި ރައީސް ސާލިހު ވަޑައިގެންފައިވަނީ ޅ. އޮޅުވެލިފުއްޓަށެވެ. އޮޅުވެލިފުށިގައިވެސް ރައީސް ސާލިހުވަނީ އެމްޑީޕީގެ މެމްބަރުންނާއި ބައްދަލުކޮށް ކެމްޕޭން ކުރައްވާފައެވެ.
ރައީސް ސާލިހު ނ. އަތޮޅާއި ޅ. އަތޮޅަށް ވަޑައިގަތީ ރ. އަތޮޅުގެ ގިނަ ރަށްތަކަށް ވަޑައިގަތުމަށްފަހުއެވެ.
ކެމްޕޭންގައި، ނ. ވެލިދޫގައި ރޭ ބޭއްވި ޖަލްސާގައި ވާހަކަ ދައްކަވަމުން ރައިސް ސާލިހު ވިދާޅުވީ އެމްޑީޕީގެ ޕްރައިމަރީގައި މިހާރު ވާދަކުރަމުންދާ ދެ ކެނޑިޑޭޓުންގެ ތެރެއިން، ތަފާތު ފިކުރުގެ ސަރުކާރެއް އުފެއްދޭވަރުގެ ތާއީދެއްވެސް، އަދި އެކަމުގެ ވިސްނުމާއި ފިކުރުވެސް ހުއީ އެމަނިކްފާނުގެ ކިބައިގައިކަމުގައެވެ.
މި ޖަލްސާގައި ވާހަކަ ދައްކަވަމުން ރައީސް ސާލިހު ވިދާޅުވީ، މިއަދު ވިސްނާ ފިކުރު ކުރާން ޖެހިފައި އޮތީ 2012 ވަނަ އަހަރު ސަރުކާރު ބަދަލުވެގެން ދިއުމަށްފަހު ކުރިމަތިވި އަނިޔާތަކާއި، ބިރުވެރިކަމާއި ނާމާންކަމުގައި ދެމި ތިބެންވީތޯ ނުވަތަ، މިއަދު މިއޮތް ސުލްހަވެރިކަމާއި އަމާންކަމާއެކީ ގައުމާއިގެން ކުރިޔަށްދާނީތޯ ކަމުގައެވެ.
އަދި ރައީސް ސާލިހު ވިދާޅުވީ އެ އަނިޔާވެރިކަން ދެވަނަ ފަހަރަށް ދެކޭކަށް އެއްވެސް މީހަކު ނޭދޭނެ ކަމަށާއި، އެ ބިރުވެރިކަމުގެ ތެރޭގައި ދިރިއުޅެން އެއްވެސް މީހަކު ބޭނުން ނުވާނެ ކަމުގައެވެ.
ކުރިޔަށްދާ ކެމްޕޭން ދަތުރުގައި މާދަމާ ރައީސް ސާލިހު ވަޑައިގަތުމަށް ހަމަޖެހިފައިވަނީ ބ. އޭދަފުއްޓަށާއި ބ. ދަރަވަންދޫއަށެވެ.
އެމްޑީޕީގެ ރިޔާސީ ޕްރައިމަރީ ބޭއްވުމަށް ހަމަޖެހިފައިވަނީ މިމަހުގެ 28 ވަނަ ދުވަހުއެވެ.
