ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު މަސައްކަތް ކުރައްވަމުންދަނީ އެއްވެސް ވިސްނުމެއް ތަސައްވަރެއް ހުރެގެން ނޫންކަމަށާއި، ރައީސް ޞާލިހަށް ވޯޓު ހޯދުމަށް ދެން ނާންނަން އެމްޑީޕީގެ އާންމު މެމްބަރުން އެދެމުންދާކަމުގައި އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.

އެމްޑީޕީގެ ޕްރައިމަރީ ކެމްޕެއިންގައި ހަފްތާ ބަންދުގައި ހަތަރު އަތޮޅަކަށް ކުރެއްވި ދަތުރުފުޅު ނިންވާލުމަށްފަހު ނޫސްވެރިންނާއި މިއަދު ބައްދަލު ކުރައްވައި ނަޝީދު ވަނީ ރައީސް ޞާލިހަށާއި މިސަރުކާރަށް ވަރަށް ބޮޑަށް ފާޑު ވިދާޅުވެފައެވެ. ނަޝީދު ވިދާޅުވީ އެމްޑީޕީގެ ރިޔާސީ ޕްރައިމަރީގެ ކެމްޕެއިނަށް ކޮންމެ ރަށަކަށް ދިއުމުން ވެސް އެ ރަށުގެ ރައްޔިތުން ބުނަނީ ރައީސް އިބްރާހިމް މުހައްމަދު ސޯލިހަށް ވޯޓު ދޭން ނޭދުމަށްކަމަށެވެ.

ރައީސް ޞާލިހުގެ ފާއިތުވެދިޔަ ފަސް އަހަރު ފެނިގެން ދަނީ ރައްޔިތުންނާއި ބީރައްޓިހި އެމްޑީޕީގެ ސިޔާސަތުތަކާއި ދިމާ އިދިކޮޅަށް މަައްކަތް ކުރާތަންކަމަށެވެ. ސަރުކާރުން ވެފައިވާ ވައުދުތަކުގެ ތެރެއިން އެމްޑީޕީގެ މެނިފެސްޓީގައި ހިމެނޭ ގިނަ ވައުދުތައް ނުފުއްދި ރައްޔިތުންގެ ކަންބޮޑުވުން އޮތް ނަމަވެސް އެކަންކަމާއި ސަރުކާރުން އަޅާލައި ވިސްނަމުންދާތަން ނުފެންކަމަށް ރައީސް ނަޝީދު ވިދާޅުވިއެވެ.

ކުރިއަށް އޮތް ޕްރައިމަރީން ބަލިވެއްޖެ ކަމުގައިވާނަމަ އަމިއްލަ ގޮތުން ވެރިކަމަށް ކުރިމަތި ލައްވާނަންތޯ ނޫސްވެރިއަކު ސުވާލު ކުރުމުން ރައީސް ނަޝީދު ވިދާޅުވީ މިއިންތިޚާބު ކާމިޔާބްކޮށް އެމްޑީޕީގެ ޓިކެޓްގައި ރިޔާސީ އިންތިޚާބުގައި ވާދަކުރާނީ އެމަނިކުފާނުކަން 100 ޕަސެންޓް ޔަގީން ވާކަމަށެވެ. އެއްވެސް ހާލަތެއްގައި އަމިއްލަ ގޮތުން ވަދަކުރާނެ ހާލަތެއް ނާންނާނެކަމަށާއި، އެމްޑީޕީ ޓިކެޓްގައި ވާދަކުރާނީ އެމަނިކުފާނުކަމަށް ނަޝީދު ތަކުރާރުކޮށް ވިދާޅުވިއެވެ.

ސަރުކާރުގެ ދުވެލި މަޑު ކަން ފާހަގަކުރައްވާ ރައީސް ނަޝީދު ވިދާޅުވީ ކުދި ރަށްރަށް ރައީސް ސޯލިހް މަސައްކަތްތައް މާބޮޑަށް ހާއްސަ ކުރައްވާ ކަމަށެވެ. މިސާލު ދައްކަވަމުން ރައީސް ނަޝީދު ވިދާޅުވީ ކުޅުދުއްފުއްޓަށް އެމަނިކުފާނުގެ ވަރަށް ބޮޑު އުއްމީދެއް އޮންނަ ކަމަށާއި އެ ތަންތަނަށް ބޮޑު އަހަމިއްޔަތު ކަމެއް ދީގެން ބާރަށް މަސައްކަތް ކުރިއަށް ގެންދަން ބޭނުންވ ާ ކަމަށެވެ. އެކަމާމެދު ބޭފުޅުން ހިތްހަމަނުޖެހުނަސް އެކަން އޮތީ އެހެން ކަމަށް ނަޝީދު ވިދާޅުވިއެވެ.

ރައީސުލްޖުމްހޫރިއްޔާގެ ތަސައްވަރެއް ނެތް، ވިޝަންއެއް ނެތް. ކިހިނެތްތޯ މިރާއްޖެއަށް ހައްދަވަން ތިއުޅުއްވަނީ.

– ނަޝީދު ވިދާޅުވިއެވެ.

ނަޝީދު ވިދާޅުވީ އެމަނިކުފާނުގެ އަބަދުވެސް އަމާޒަކީ އެމްޑީޕީއަކީ ރާއްޖޭގައި އޮތް އެންމެ ބޮޑު ޕާޓީއަށް ހެދުން ކަމަށެވެ. އެމަނިކުފާނުގެ ވެރިކަން ފެބްރުއަރީ 7، 2012 ގައި ބަދަލުވީ ދުވަހު، އިސްތިއުފާ ނުދެއްވި ނަމަ އެމްޑީޕީއަށް އިންތިހާބުތަކުގައި ވޯޓެއް ނުލިބުނީސް ކަމަށް ނަޝީދު ވިދާޅުވިއެވެ. ނަމަވެސް އެކަން ކުރުމަށް އޮތް އެންމެ ރަނގަޅު ގޮތަކީ ރައްޔިތުންގެ ގަޔަށް ބަޑި ޖަހައި ވެރިކަން ދިފާއު ކުރުން ކަމަށް ދެކެވަޑައިނުގަންނަވާ ކަމަށް އެމަނިކުފާނު ވިދާޅުވިއެވެ.

ނަޝީދު އެ ވިދާޅުވީ ޕްރައިމަރީން އެ މަނިކުފާނު ބަލިވާ ހާލަތެއްގައި ރައީސް ސޯލިހާ އެކީގައި ނުހުންނަވާނެ ކަމަށްތޯ އަނެއްކާވެސް އެހުމުން ނަޝީދު ތަކުރާރުކޮށް ވިދާޅުވީ، ރައީސް ސޯލިހްގެ ފަހަތަށް އެމްޑީޕީގެ މެންބަރުން ނާރާނެ ކަމަށެވެ.