މަޖިލީހުގައި ޤުރުއާން ނުކިޔެވުމަށް އެންގުމަކީ ލާދީނީ މީހުންނަށް ލިބޭ ހިތްވަރެއް: ޑރ.ޖަމީލް

ރައްޔިތުންގެ މަޖިލީހުގައި ޤުރުއާނުގެ އާޔަތްތައް ވިދާޅުނުވުމަށް މަޖިލީހުގެ ރައީސް އެންގެވުމަކީ ލާދީނީ ފަރާތްތަކަށް ހިތްވަރު ލިބޭކަމެއްކަމަށް ކުރީގެ ނާއިބު ރައީސް ޑރ.މުޙައްމަދު ޖަމީލް އަހްމަދު ވިދާޅުވެއްޖެއެވެ.

ރައްޔިތުންގެ މަޖިލީހުގެ ޖަލްސާތަކުގައި މެމްބަރުން ވާހަކަފުޅު ދައްކަވާއިރު ޤުރުއާނުގެ އާޔަތްތަކާއި، އޭގެ މާނަ ވިދާޅުނުވުމަށް މަޖިލިސް ރައީސް މުހައްމަދު ނަޝީދު އިއްޔެ އެދިވަޑައިގަތުމާއި ގުލިގެން، ކުރީގެ ނާއިބު ރައީސް ޑރ.ޖަމީލް ވިދާޅުވީ، ކީރިތި ޤުރުއާނަކީ މުސްލިމުންނަށް އެންމެ ޞައްޙަ ގައިޑް އަދި ޝަރީޢަތުގެ އެންމެ ފުރަތަމަ މަޞްދަރުކަމަށެވެ. އަދި މަޖިލިސް ރައީސްގެ އެންގެވުން ޤާނޫނާ ޚިލާފުކަމަށާއި، އެކަމުން  ލާދީނީ ފަރާތްތަކަށް ހިތްވަރުލިބޭކަމަށްވެސް ޑރ.ޖަމީލް ވިދާޅުވިއެވެ.

114 ޞޫރަތް، 6235 ޢާޔަތް ހިމެނޭ ކީރިތި ޤުރުއާނަކީ މުސްލިމުންނަށް އެންމެ ޞައްޙަ ގައިޑް އަދި ޝަރީޢަތުގެ އެންމެ ފުރަތަމަ މަޞްދަރު. ޤއ ގެ 10 ވަނަ މާއްދާ އިން ޝަރީއަތް ލާޒިމް. މަޖިލިސް ރައީސްގެ އެންގެވުން ޤާނޫނާ ޚިލާފް އަދި ލާދީނީ ފަރާތްތަކަށް ހިތްވަރުލިބޭ. މަޢާފަށް އެދެންޖެހޭ

-ކުރީގެ ނާއިބު ރައީސް ޑރ.މުހައްމަދު ޖަމީލް އަޙްމަދު

ރައްޔިތުންގެ މަޖިލީހުގެ އިއްޔެގެ ޖަލްސާގައި ހޯމް މިނިސްޓްރ އިމްރާން އަބްދުﷲގެ އިތުބާރު ނެތްކަމުގެ މައްސަލާގައި މަޖިލީހުގެ މައިނޯރިޓީ ލީޑަރު އޭދަފުށީ ދާއިރާގެ މެމްބަރު އަހުމަދު ސަލީމް ވާހަކަދައްކަވަމުން ކީރިތިގުރުއާން ވިދާޅުވެ އޭގެ މާނަ ވިދާޅުވާން ފެއްޓެވުމުން މަޖިލިސް ރައީސް ވަނީ ސަލީމް ހުއްޓުވައި މަޖިލީހުގައި ޤުރުއާންނުގެ އާޔަތް ވިދާޅުވެ މާނަ ނުކިޔުމަށް އެދިވަޑައިގެންފައެވެ. މަޖިލިސް ރައީސް ވިދާޅުވީ މިގޮތަށް މިކަން ކުރަންޖެހެނީ އެމަނިކުފާނަކީ ޤުރުއާން ހިތުދަސް ބޭފުޅަކަށް ނުވެފައި، މަޖިލީހުގައިވެސް ތިއްބެވީ ޤުރުއާން ހިތުދަސް ޝައިހުންނަށް ނުވުމުން ޤުރުއާން ވިދާޅުވެ މާނަ ވިދާޅުވުމުން އޭގެ ސައްޚަކަން ކަށަވަރު ކުރެވޭނެ ގޮތެއް ނެތްކަމަށެވެ. އެހެންވުމުން އެންމެ ރަނގަޅު ގޮތަކީ މަޖިލީހުގައި މެމްބަރުން ވާހަކަ ދައްކަވާއިރު ޤުރުއާނާއި އޭގެ މާނަ ވިދާޅު ނުވުންކަމަށް މަޖިލިސް ރައީސް ވިދާޅުވިއެވެ.

ސަލީމް ވަނީ މަޖިލިސް ރައީސް މިހެން ވިދާޅުވީ އެމަނިކުފާނުގެ ހިތް ޕުޅުގައި ޤުރުއާނާއިމެދު އޮންނަ ޚިލާފްތަކެއްގެ ސަބަބުންކަމަށް ވިދާޅުވެފައެވެ. ސަލީމް މިހެން ވިދާޅުވުމާއިއެކު ވަރަށްބޮޑަށް ކޯފާ އިސްކުރައްވައި މަޖިލިސް ރައީސް ވަނީ އެހެން ވިދާޅުވީ ޤުރުއާނާއިމެދު އޮންނަ ލޯތްބާއި ގަދަރެއްގެ ބޮޑުކަމުން ކަމަށް ވިދާޅުވެފައެވެ. ޤުރުއާނުގެ މާނަ ނޭގި އަދި ޤުރުއާން ހިތުދަސް މީހަކު ނެތްއިރު ނުބައިކޮށް ޤުރުއާން ކިޔެވުމަކީ އޭގެ އެންމެ ރަނގަޅު ގޮތް ނޫންކަމަށް މަޖިލިސް ރައީސް ވިދާޅުވިއެވެ.

ސަލީމް ވިދާޅުވީ މަޖިލިސް ރައީސްއައް މިކަމުގައި އަމަލުކުރެއްވެން އޮތް އެންމެ ރަނގަޅު ރަނގަޅު ގޮތަކީ ޤުރުއާނުގެ މަނަ އެކުލެވޭ ފޮތެއް ކައިރީގައި ބައިންދަވައިންގެން އިންނެވުންކަމަށެވެ.