އެމްޑީޕީގެ ޕްރައިމަރީގައި މިހާރު ވާދަކުރަމުންދާ ދެ ކެނޑިޑޭޓުންގެ ތެރެއިން، ތަފާތު ފިކުރުގެ ސަރުކާރެއް އުފެއްދޭވަރުގެ ތާއީދެއްވެސް، އަދި އެކަމުގެ ވިސްނުމާއި ފުކުރުވެސް ހުއީ އެމަނިކްފާނުގެ ކިބައިގައިކަމަށް ރައީސް ސާލިހު ވިދާޅުވިއެވެ.
މިހާރު ކުރިޔަށްދާ އެމްޑީޕީގެ ރިޔާސީ ޕްރައިމަރީ ކެމްޕޭންގައި ނ. އަތޮޅު ވެލިދޫގައި ބޭއްވުނު ޖަލްސާގައި ވާހަކަ ދައްކަވަމުން ރައީސް ސާލިހު ވިދާޅުވީ، މިއަދު ވިސްނާ ފިކުރު ކުރާން ޖެހިފައި އޮތީ 2012 ވަނަ އަހަރު ސަރުކާރު ބަދަލުވެގެން ދިއުމަށްފަހު ކުރިމަތިވި އަނިޔާތަކާއި، ބިރުވެރިކަމާއި ނާމާންކަމުގައި ދެމި ތިބެންވީތޯ ނުވަތަ، މިއަދު މިއޮތް ސުލްހަވެރިކަމާއި އަމާންކަމާއެކީ ގައުމާއިގެން ކުރިޔަށްދާނީތޯ ކަމުގައެވެ.
އަދި ރައީސް ސާލިހު ވިދާޅުވީ އެ އަނިޔާވެރިކަން ދެވަނަ ފަހަރަށް ދެކޭކަށް އެއްވެސް މީހަކު ނޭދޭނެ ކަމަށާއި، އެ ބިރުވެރިކަމުގެ ތެރޭގައި ދިރިއުޅެން އެއްވެސް މީހަކު ބޭނުން ނުވާނެ ކަމުގައެވެ.
އެދުވަހުގެ ހާލަތަކީ ސިޔާސީ މީހެއް ވިޔަސް، ރައްޔިތުންގެ މަޖިލިސްކަމަށް ވިޔަސް، ޖުޑީޝަރީ ކަމަށްވިޔަސް އޮތީ އެކެއްގެ މުށުތެރެއަށް ލާ ހިފަހައްޓާފަ. މަޖިލިހަކަށް އަޅުގަޑުމެންނަަށް ވަދެވެނީކީއެއް ނޫން. ޝަރީއަތް ކުރާކަށް ފަނޑިޔާރަކަށް ކޯޓަކަށް ވަދެވެނީކީއެއް ނޫން. ވިޔަފާރަވެރިއަކަށް ހަމަޖެހިލައިގެން ވިޔަފާރިއެއް ކުރެވެނީކިއެއް ނޫން. މިއަދު އަނެއްކާވެސް އެނބުރި އެދުވަހަށް ދާނީތޯ ނޫންތޯ މިއީ ތަކުރާރުކޮށް އަޅުގަޑުމެން ވިސްނާ ފިކުރު ކުރަންވީ ކަމަކީ.
ނ. ވެލިދޫގައި ރޭ ބޭއްވުނު ކެމްޕޭން ޖަލްސާގައި ވާހަކަ ދައްކަވަމުން ރައީސް ސާލިހު ވިދާޅުވިއެވެ.
މިޖަލްސާގައި ވާހަކަ ދައްކަވަމުން ރައީސް ސާލިހު ވިދާޅުވީ، އެދުވަސް އަނބުރާ އިއާދަ ނުވާން އޮތީ މިއަހަރު ބާއްވާ ރިޔާސީ ސިންތިޚާބު ކާމިޔާބު ކުރެވިގެން ކަމުގައެވެ. އަދި އެކަން ކުރެވެން އޮތީ ތަފާތު ފިކުރުތައް އެއްކޮށް އުފެއްދޭ ސަރުކާރެއް އުފެއްދުމުގެ ވިސްނުމާއި ފިކުރުހުރި މީހަކަށް ކަމަށާއި، އަދި އެފަދަ ތާއީދެއްވެސް އޮތް މީހަކަށްކަން ފާހަގަ ކުރައްވަމުން ރައީސް ސާލިހު ވިދާޅުވީ އެމްޑީޕީގެ އެތެރޭގައި އެކަން ކުރެވޭނެ މީކަށް ހުރީ އެމަނިކުފާނު ކަމުގައިވެސް ރައީސް ސާލިހު ވިދާޅުވިއެވެ.
އަޅުގަޑުމެންނަށް އަބުރާ އެދުވަސް އިއާދަ ނުވާން އޮތީ ކުރިޔަށް އޮތް 2023 ވަނަ އަހަރުގެ، މިއަހަރު މިބާއްވާ އިންތިޚާބު ކާމިޔާބު ކުރެވިގެން. އެކަން ކުރެވެން އޮތީ ތަފާތު ފިކުރުތައް އެއްކޮށް އުފެއްދޭ ސަރުކާރެއް އުފެއްދުމުގެ ވިސްނުމާއި ފިކުރު ހުރި މީހަކަށް. އަދި އެފަދަ ތާއީދެއްވެސް އޮތް މީހަކަށް. އަޅުގަޑު ގަބޫލުކުރާ ގޮތުގައި މި ޕާޓީގަ އެކަން ކުރެވޭނެ މީހަކަށް ހުރީ އަޅުގަޑު.
ރައީސް ސާލިހު ވިދާޅުވިއެވެ.
މިޖަލްސާގައި ވާހަކަ ދައްކަވަމުން ރައީސް ވިދާޅުވީ މިހާތަަނަށްވެސް އެމަނިކުފާނު ވަޑައިގެންފައިވަނީ އެކަން އެމްޑީޕީގެ އާންމު ރައްޔިތުންނަށް ހާމަ ކޮށްދެއްވަމުން ކަމަށާއި، ދިވެހި ރައްޔިތުންވެސް އެކަން ގަބޫލުކުރާ ކަމުގައެވެ. އަދި ވިދާޅުވީ ކުރިޔަށް އޮތް ތަނުގައިވެސް، އެއްވެސް ރައްޔިތަކު ބާކީ ނުކޮށް، ހުރިހާ ރައްޔިތުން އެދޭގޮތަށް ވެރިކަން ކުރެވޭނެކަމުގެ ޔަގީންކަން އެމަނިކުފާނަށް އެބަ އޮތް ކަމުގައިވެސް ރައީސް ސާލިހު ވިދާޅުވެފައި ވެއެވެ.
ރައީސް ސާލިހު އިތުރަށް ވިދާޅުވީ، އެމްޑީޕީގެ ފުރަތަމަ ވެރިކަން ނިމިގެން ދިޔައީ އެންމެ ރަގަޅުކޮށް ނޫން ކަމަށާއި، އެއީ އެކަންކަމާމެދު މިއަދު ފުރިހަމަޔަށް ވިސްނާ ފިކުރު ކުރާންވީ ކަމެއް ކަމުގައެވެ. މިގޮތުން އެއަށްފަހު އައި 2013 ގެ ރިޔާސީ އިންތިޚާބުގައި އެމްޑީޕީ މަގުމަތި ވެގެން ދިޔައީ އެންމެ 6،000 ވޯޓު މަދުވެގެން ކަމަށާއި، އެ މާޒީ އަބުރާ އިއާދަ ނުވާން އޮތީ ކުރިޔަށް އޮތް ރިޔާސީ އިންތިޚާބު ކާމިޔާބު ކުރެވިގެން ކަމުގައެވެ.
