ރިޔާސީ ދެވަނަ ދައުރަކަށް ކުރިމަތިލާއިރު ވެރިކަން ކުރާ ކޯލިޝަންގައި ހިމެނޭ ޕާޓީތަކުގެ ތާއީދު ލިބޭނެކަމުގެ ފުރިހަމަ އިތުބާރު އޮތްކަމުގެ ޔަގީންކަން އެބައޮތްކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.

2018ގައި ރައީސް އިބްރާހީމް މުޙައްމަދު ޞާލިޙް ވެރިކަމަށް ވަޑައިގަތީ، އެމްޑީޕީ އިސްވެ އޮވެ އުފެއްދެވި ކޯލިޝަން ސަރުކާރަކާއެކުއެވެ. މި ކޯލިޝަންގައި ހިމެނެނީ އެމްދީޕީގެ އިތުރުން އަދާލަތު ޕާޓީއާއި، އެމްއާރްއެމްއާއި، ޖުމްހޫރީ ޕާޓީއެވެ. ރިޔާސީ އިންތިޚާބު ކާމިޔާބުކުރެއްވުމަށްފަހު ރައީސް ވަނީ ކޯލިޝަން ދަމަހައްޓާނެކަމުގެ ޔަޤީންކަން ދެއްވާފައެވެ. އަދި މިއީ ސަރުކާރެއްގައި މިހާތަަނަށް އެންމެ ގިނަ ދުވަހު ދެމިއޮތް ކޯލިޝަން ސަރުކާރުވެސް މެއެވެ.

ރައީސް އޮފީހުގައި އޮތް ނޫސްވެރިންގެ ބައްދަލުވުމުގައި ރައީސް ވިދާޅުވީ ވެރިކަމަށް ކުރިމަތިލުމަށް ނިންމައި މިހާރު އެންމެ ބޮޑު އަމާޒެއް އޮތީ އެމްޑީޕީގެ ޓިކެޓް ހޯދުންކަމަށެވެ. އެއަށްފަހު ޕާޓީތަކާއި މަޝްވަރާ ކުރައްވާނެކަމަށެވެ. ނަމަަވެސް މިހާރުވެސް ޕާޓީތަކުގެ ވިސްނުން ހުރިގޮތް އެނގޭކަމަށާއި، ގިނަ ޕާޓީތަކުގެ ތާއީދު ލިބިވަޑައިގަންނަވާނެކަމަށެވެ.

ރައީސް ވިދާޅުވީ މިހާރު ކޯލިޝަންގައި ތިއްބެވި ޕާޓީތަކުގެ ލީޑަރުންނާއި ވަކިވަކި ސިޔާސީ އިސްބޭފުޅުންގެ ތާއީދުވެސް ލިބިގެންދާނެކަމުގެ ޔަގީންކަން މިހާރުވެސް ލިބިފައިވާކަމަށެވެ.

ރައީސް ވިދާޅުވީ ކޯލިޝަންގެ މެދުގައި މިހާރުވެސް ކަންކަމުގައި މަޝްވަރާ ކުރެވެމުންދާކަމަށެވެ. ބައްދަލުވުންތައް ސީދާ އޮފީހުގައި ނުބޭއްވުނު ނަމަވެސް، ގިނަ ފަހަރަށް ފޯނު ކޮށްގެންނާއި، އަދި ކެބިނެޓްގައިވެސް ކޯލިޝަންގެ ވަޒީރުން ހިމެނޭތީ މަޝްވަރާކުރެވި ކަންކަމުގައި ޚިޔާލު ބަދަލު ކުރެވެމުންދާކަމަށް ރައީސް ވިދާޅުވިއެވެ. އެމަނިކުފާނު ވިދާޅުވީ ބައެއް ކަންކަމުގައި ޚިޔާލު ތަފާތުވި ނަމަވެސް ގިނަ ކަންކަމުގައި ޚިޔާލް އެއްގޮތްކަމަށެވެ.

ނަމަވެސް ހުރިހާކަމެއްގައިވެސް އިސްކަން ދެއްވަނީ ގިނަ ބަޔަކު ދެކޭ ގޮތަށް ކަމަށާއި، ކޯލިޝަނަކާއިއެކު ކުރިއަށް އޮތް ދައުރުގައިވެސް ވާދަކުރުމަކީ އިސްކަން ދެއްވާނެ ކަމެއްކަމަށެވެ.