ވާދަވެރިކަން ބޮޑު އެމްޑީޕީގެ ރިޔާސީ ޕްރައިމަރީގެ ކެމްޕެއިނަށް ކުރީގެ ރައީސް އަދި އެމްޑީޕީގެ ރައީސް މުޙައްމަދު ނަޝީދު އަތޮޅުތަކަށް ކުރައްވާ ދަތުރުފުޅުގައި އުތުރުގެ 3 އަތޮޅަށް ވަޑައިގަންނަވަން ނިންމަވައިފިއެވެ.
މި ދަތުރުފުޅަކީ އެމްޑީޕީގެ ރިޔާސީ ޕްރައުމެރީގައި އެޕާޓީގެ ޢާންމު މެމްބަރުންގެ ތާޢީދު ހޯއްދެވުމަށް ކުރައްވާ ދަތުރުފުޅެކެވެ. މި ދަތުރުފުޅުގައި އުތުރުގެ 3 އަތުޅެއްގައި ދިރިއުޅޭ އެމްޑީޕީގެ ޢާންމު މެމްބަރުންނާ ވަކިވަކިން ބައްދަލުކުރައްވައި މަޝްވަރާކުރައްވަން ހަމަޖެހިފައިވާކަމަށް މަޢުލޫމާތު ލިބެއެވެ.
މި ދަތުރުފުޅުގެ މާބޮޑު ތަފްސީލެއް އަދި ނަޝީދުގެ ކެމްޕެއިން ޓީމުން ހާމައެއް ނުކުރެއެވެ. "ފިކުރެއްގެ ދިރުން" މި ޝިއާރުގެ ދަށުން ކެމްޕެއިން ކުރައްވަމުން އަންނަ ރައީސް ނަޝީދާއި އެމްޑިޕީގެ އިސްލީޑަރު ރައީސް ޞާލިޙާދެމެދު ވަނީ ވަރަށްބޮޑަށް ޚިޔާތު ތަފާތުވެފައެވެ. އަދި ދެބޭފުޅުންނަށް ތާޢީދުކުރާ މަޖިލިސް މެމްބަރުންނާއި ޕާޓީގެ ސީނިއަރ ބޭފުޅުންގެ މެދުގައި ވަނީ ކޯޅުން ބޮޑުވެފައެވެ.
މާލޭގައި ދިރިއުޅޭ އެމްޑީޕީގެ ޢާންމު މެމްބަރުންނާ ރައީސް ނަޝީދު ބައްދަލުކުރެއްވުން މާދަމާ ރޭ ސަލްޓަން ޕާކްގައި އެބައޮތެވެ.
އަންނަ މަހު 28ގައި ބޭއްވުމަށް ހަމަޖެހިފައިވާ އެމްޑީޕީގެ ރިޔާސީ ޕްރައިމަރީއަށް ކުރިމަތިލައްވާފައިވަނީ އެޕާޓީގެ އިސްލީޑަރު، ރައީސުލްޖުމުހޫރިއްޔާ އިބުރާހިމް މުހައްމަދު ސާލިހާއި އެޕާޓީގެ ރައީސް މުހައްމަދު ނަޝީދެވެ. އަދި ދެބޭފުޅުންވެސް މިހާރު ގެންދަވަނީ ޕްރައިމަރީއަށް ކެމްޕޭން ކުރައްވަމުންނެވެ.
