ނިމިދިޔަ ވާރލްޑް ކަޕް ފުޓުބޯޅަ މުބާރާތުގެ ފައިނަލް މެޗަށްފަހު، އާޖެންޓީނާއިން ވާރލްޑްކަޕް ތައްޓާއެކު އުފާ ފާޅުކުރަމުން ދަނިކޮށް، ދުނިޔޭގެ މަޝްހޫރު ޝެފް ނުސްރެޓް ގޯކްސް ދަނޑަށް އަރާ ތަށި ހިފަހައްޓައިގެންހުރެ ނަގާފައިވާ ފޮޓޯތަކާ ވީޑިއޯތައް ސޯޝަލް މިޑިއާގައި ވައިރަލް ވެގެން ދިއުމާއެކު، އާންމުންނަށް ދަޑުގެ ކުޅޭ ސަރަހައްދަށް ވަަންނަން ފުރުސަތު ލިބުނު ގޮތެއް ފީފާއިން ތަހުގީގު ކުރަން ފަށައިފިއެވެ.

ނުސްރެޓް ގޯކްސް މަޝްހޫރުވެފައިވަނީ، އޭނާ ތައްޔަރުކުރާ ކާއެއްޗެހީގެ ލޮނު ހެޔޮވަރު ކުރުމަށް އޭނާ ގެންގުޅޭ ވައްޓާފާޅީގެ ސަބަބުންނެވެ. މިހާރު އޭނާއަކީ "ސޯލްޓް ބޭ"ގެ ނަމުން މަޝްހޫރުވެފައިވާ ރެސްޓޯރެންޓް ޗެއިންއެއް ހިންގަމުންދާ ސެލެބްރިޓީއެކެވެ. އޭނާވަނީ އާރޖެންޓީނާ ފްރާންސް މެޗަށްފަހު، ވާރލްޑް ކަޕް ތައްޓާއެކު، ދަނޑުމަތީގައި އާޖެންޓީނާ ޓީމުގެ ކުޅުންތެރިންނާއެކު އޭނާ އުފާ ފާޅުކުރަމުން ދަނިކޮށް ނަގާފައިވާ ފޮޓޯތައް އޭނާގެ އަމިއްލަ އިންސްޓަގްރާމް އެގައުންޓުގައި ޝާއިއު ކޮށްފައެވެ.

މީގެ ތެރޭގައި އޭނާ ވާރލްޑް ކަޕް ތަށި އުފުލާލާއިގެން ހުއްޓާ ނަގާފައިވާ ފޮޓޯތައްވެސް ހިމެނެއެވެ.

ފީފާގެ ވެބްސައިޓުގައި ވާގޮތުން ވާރލްޑް ކަޕް ތަށީގައި އަތްލުމުގެ ފުރުސަތު ލިބޭނީ "ވަރަށް ޚާއްސަ މަދު" ބަޔަކަށެވެ. އޭގެ ތެރޭގައި ކުރިން ވާރލް ކަޕް ކާމިޔާބު ކޮށްފައިވާ ކުޅުންތެރިންނާއި ގައުމުތަކުގެ ވެރިން ހިމެނެއެވެ.

އާންމުވެފައިވާ ވީޑިއޯތަކުން ފެންނަ ގޮތުގައި، އާޖެންޓީނާގެ ފުޓުބޯޅަ ތަރި މެސީގެ ސަމާލުކަން ހޯދުމަށް ދަނޑުމަތީގައި ނުސްރެޓް ގޯކްސް މެސީގެ އަތުގައި ހިފާތަންވެސް ފެނެއެވެ.

"ޑިސެމްބަރ 18ވަނަ ދުވަހު ލުސައިލް ސްޓޭޑިއަމްގައި ބޭއްވުނު ވާރލްޑް ކަޕް ނިންމުމުގެ ރަސްމިއްޔާތަށްފަހު، ހުއްދަނެތި އާންމުންނަށް ދަނޑަށް ވަދެގަނެވުނު ގޮތެއް، ރިވިވްއެއް ހެދުމަށްފަހު ފީފާއިން ދަނީ ބަލަމުން،" ދުނިޔޭގެ ފުޓުބޯޅައިގެން މައި ޖަމިއްޔާ، ފީފާއިން ނެރުނު ބަޔާނެއްގައި ބުނެފައި ވެއެވެ.

"އަދި އެއަށްފަހު، އަޅާންޖެހޭ ފިޔަވަޅުތައް އަޅާނެ."

ނުސްރެޓް ގޯކްސް ދުނިޔެއަށް މަޝްހޫރު ވެފައިވަނީ، 2017ވަނަ އަހަރު، އެއްގަމު މަހުގެ ލޮނު ހެޔޮވަރު ކުރުމަށް، ހަރުފައެއް ހަރަކާތް ކުރާގޮތަށް ހަރަކާތް ކުރަމުން މަހަށް އެއަށް އޭނާ ލޮނު ބުރުއްސަމުންދާ މަންޒަރުގެ އާންމުވެ އެ ވީޑިއޯ ވައިރަލް ވެގެން ދިއުމާއެކުއެވެ.

މިހާރު އޭނާގެ އިންސްޓަގްރާމްގައި 50 މިލިއަން ފޮލޯވަރުން ތިބެއެވެ. އަދި އޭނާއަށް ލިބިގެންދިޔަ މި މަޝްހޫރުކަމާއެކު އޭނާވަނީ ދުނިޔޭގެ އެކި ކަންކޮޅުތަކުގައި Nusr-Et ބްރޭންޑްގެ ގިނަ ރެސްޓޯރަންޓްތައް ހުޅުވާފައެވެ. މި ރެސްޓޯރަންޓްތަކުގައި ވިއްކަން ހުންނަ ބައެއް އެއްގަމު މަހުގެ ބާވަތްތަކަކީ ވަރަށް އަގު ބޮޑުކޮށް ވިއްކާ މަހެކެވެ.

އަދި ގިނަ އަދަދެއްގެ މަޝްހޫރު ފުޓުބޯޅަ ކުޅުންތެރިންނާއި ސެލެބްރިޓީންވަނީ އޭނާގެ ރެސްޓޯރަންޓުން ޚިދުމަތް ހޯދާފައެވެ. އޭގެ ތެރޭގައި ރޮބަރޓް ލިބަންޑޯވްސްކިއާއި، ފްރާންސްގެ މަޝްހޫރު ކުޅުންތެރިޔާ ކިލިއަން މްބައްޕޭވެސް ހިމެނެއެވެ.

އޭނާވަނީ، އޭނާއާއި މެސީއާ ދެމީހުންގެ ކުރީގެ ބައްދަލުވުމެއްގެ ވީޑިއޯ ފާއިތުވެދިޔަ ހަފްތާގައި އިންސްޓަގްރާމްގައި ޝާއިއުކޮށްފައެވެ.