އިންޑިއާގެ ބޮޑުވަޒީރު ނަރެންދުރަ މޯދީ ބޭނުންފުޅުވެއްޖެނަމަ ރައީސް ޔާމީން މަދަމާވެސް ޖަލަށް ލެވިދާނެކަމަށާ، އެހެންނަމަވެސް އެމަނިކުފާނުގެ އަޑު ކަނޑުވައެއް ނުލެވޭނެކަމަށް އިދކޮޅު ރިޔާސީ ކެނޑިޑޭޓު އަދި ކުރީގެ ރައީސް ޢަބްދުﷲ ޔާމީން ވިދާޅުވެއްޖެއެވެ.
"ފެލާލައިފި"ގެ ނަމުގައި މިރޭ ކާނިވާ ސަރަޙައްދުގައި އިދިކޮޅު ފަރާތްތަކުން ބޭއްވި ޖަލްސާގައި ވާހަކަފުޅުދައްކަވަމުން ރައީސް ޔާމީން ވަނީ މިސަރުކާރު އޮތީ އިންޑިއާއަށް އަޅުވެތިފައިކަމަށް އެމަނިކުފާނު ވިދާޅުވާ ވާހަކަފުޅު ތަކުރާރުކުރައްވައި ސަރުކާރަށް ވަރަށްބޮޑަށް ފާޑުވިދާޅުވެ ވާހަކަފުޅުދައްކަވާފައެވެ.
އެމްއެމްޕީއާރުސީގެ ޚިޔާނާތުގެ މައްސަލާގައި ރައީސް ޔާމީންގެ މައްޗަށް ޙުކުމްކުރުން އާދީއްތަދުވަހަށް ވަނީ ތާވަލްކޮށްފައެވެ. އެކަމަށް އިޝާރާތްކުރައްވައި މިރޭ ވިދާޅުވީ ޖަލަށްލިޔަސް އަޑު ކަނޑުވައެއް ނުލެވޭނެއެވެ. އާދީއްތަދުވަހުގެ ޙުކުމުގައި އެމަނިކުފާނުގެ މައްޗަށް ކުށް ސާބިތުވެއްޖެނަމަ ޖަލު ޙުކުމެއް އަންނާނެކަމަށް ބެލެވެއެވެ.
މިރޭ ޔާމީން ވިދާޅުވީ މޯދީ ބޭނުންވެއްޖެނަމަ އެމަނިކުފާނު ޖަލަށް ދާން ޖެހިދާނެކަމަށާ، އެކަމަކު އެމަނިކުފާނުގެ އަޑު ކަނޑުވައެއް ނުލެވޭނެކަމަށެވެ. އަދި އެމަނިކުފާނުގެ ވިސްނުންފުޅަކަށް ބަދަލެއްވެސް ނާންނާނެކަމަށެވެ. ބައެއް ފަނޑިޔާރުންގެ ޢަމަލުތަކާމެދު ފާޑުވިދާޅުވަމުން ރައީސް ޔާމީން ވިދާޅުވީ ސުޕްރީމްކޯޓުގެ ފަނޑިޔާރު ޢަލީ ރަޝީދަކީ އެމަނިކުފާނުގެ މައްޗަށް ދަށުކޯޓުގައި ޖަލުޙުކުމެއްކުރެއްވި ފަނޑިޔާރަކަށްވެހުންނަވަނިކޮށް، މިހާރު އަލީ ރަޝީދު ހުންނެވި ސުޕްރީމްކޯޓުން އެޙުކުމް ބާޠިލްކޮށްފައިވާކަމަށެވެ. އަދި އެއީ ސާބިތު އެއްވެސް ހެއްކެއް ނެތި ކޮށްފައިވާ ޙުކުމެއްކަމަށް ސުޕްރީމްކޯޓުން ނިންމުމަކީ ޢަލީ ރަޝީދު މިހާރު އިސްތިފާދެއްވަން ޖެހޭކަމެއްކަމަށެވެ. ދުނިޔޭގެ އެހެންޤައުމުތަކުގައި ޢަމަލުކުރާ ރީތި އުސޫލަކީވެސް އެއީކަމަށް ޔާމީން ވިދާޅުވިއެވެ.
މީގެއިތުރުން އިންސާފު ގާއިމު ކޮށްދިނުމަކީ ފަނޑިޔާރުންގެ އިސްތަށިފުޅުގައި އެޅިފައި އޮންނަ އެންމެބޮޑު ޒިންމާއަށްވާއިރު، މިހަރު ބައެއް ފަނޑިޔާރުން ޢަމަލުކުރަމުންދާ ގޮތަކީ އެކަންކަން ބެލޭނެ އަދި އެކަންކަމާ ފަނޑިޔާރުން ޖަވާބުދާރީ ވާންޖެހޭނެ ކަންކަންކަމުގައި ރައީސް ޔާމީން ވިދާޅުވިއެވެ.
ސަރުކާރަށް ފާޑުވިދާޅުވަމުން ޔާމީން މިރޭ ވިދާޅުވީ މިސަރުކާރު ބަދަލުވާކަށް ދެން މާގިނަ ދުވަހެއް ނެތްކަމަށެވެ. އަދި ސަރުކާރު ބަދަލުވާ ދުވަހަކު ޒީރޯ ޓޮލެރަންސްގައި ކަންކަން ކުރައްވާނެކަމުގެ އިންޒާރުދެއްވިއެވެ. ހުރިހާ ވަގުން ހިފާނެކަމަށާ، އެހެންނަމަވެސް މިސަރުކާރުގައި ތިބި ވަގުންނަށް އެދުވަހަކުން ތަހްގީގަކާ ކުރިމަތިލާން ނުކެރޭނެކަމަށްވެސް ޔާމީން ވިދާޅުވިއެވެ.
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙަށް ގޮންޖައްސަވައި ޔާމީން ވިދާޅުވީ، އެމްއެމްޕީއާރުސީގެ ޚިޔާނާތުގައި ރައީސް ޞާލިޙުގެ މައްޗަށް ތުހުމަތުކުރެވޭ މައްސަލައިގެ ތަޙްޤީޤަކާ ކުރިމަތިލައްވަން އެމަނިކުފާނަށް ކެރިވަޑައިނުގަންނަވާނެކަމަށެވެ.
"ރައީސް އިބްރާހިމަށް އޮތީ އެންމެ ސުވާލެއް. މަނިކުފާނު ތިވިދާޅުވާ ގޮތައް ޒީރޯ ޓޮލެރަންސްގެ ދަށުން މަނިކުފާނުގެ މައްޗަށް ކުރެވޭ އެމްއެމްޕީއާރްސީގެ ތުހުމަތު ރައްޔިތުންނަށް ސާބިތުކަން ދައްކަވާލަދެއްވާ. ތަހްގީގާއި ކުރިމަތިލައްވާ. އެކަމަކު ޔަގީން މަނިކުފާނުގެ ގައިގަ ނުހުންނާނެ އެހިތްވަރެއް." ޔާމީން ވިދާޅުވިއެވެ.
ރައީސް ޔާމީން ވަނީ މިސަރުކާރުން ވަނީ ރާއްޖޭގެ މިނިވަންކަން އިންޑިއާއަށް ވިއްކާލާފައިކަމަށާ، އަމިއްލަ އިޚްތިޔާރުގައި އެއްވެސްކަމެއް ކުރުމުގެ ބާރެއް މިސަރުކާރުގައި ނެތްކަމަށާ، އަދި ރައްޔިތުންގެ ހުރިހާ ހައްޤެއް މިސަރުކާރުން "ފެލާލައިފި"ކަމަށް ޔާމީން ވިދާޅުވިއެވެ.
