މުސްލިމުންގެ މެދުގައި ވަހުދަތު ގާއިމްކުރުމަށް ބޭނުންވާނަމަ އިސްލާމް ދީނުގެ އަޚްލާގުން މުސްލިމުން ޒީނަތްތެރި ވާންޖެހޭނެކަމުގައި މިއަދު ހުކުރު ޚުޡުބާގައި ވިދާޅުވެއްޖެއެވެ.
"އިސްލާމީ ވަޙުދަތާއ އެއްބައިވަންތަކަމުގެ މުހިންމުކަން" މިމައުޟޫއަށް ޚާއްސަ ކުރެވިގެންދިޔަ މިއަދުގެ ހުކުރު ޚުޡުބާގައި ވިދާޅުވި ގޮތުގައި އެއްބަޔަކު އަނެއް ބަޔަކަށް އަޅާލާ ހެޔޮ ފޯރުވާ، ރަޙުމަތްތެރިކަމާއި އެކުވެރިކަން ގާއިމްކޮށް، އެއްބަޔަކު އަނެއްބަޔަކާއި ގުޅިގެން އުޅެ، ދެބަސްވުންތަކާއި އަރައިރުންތަކާއި ދުރުހެލިވެގެން މެނުވީ އިސްލާމީ އުޚުއްވަތްތެރިކަން ގާއިމެއް ނުކުރެވޭނެއެވެ.
މުސްލިމް އަޚުންނޭވެ! އަހަރެމެން އެއްބައިވަންތަކޮށް އެކަތިގަޑަކަށް ހަދައިދެނީ އަހަރެންމެގެ ތައުހީދެވެ. މާތްވެގެންވާ އިސްލާމް ދީނެވެ. އިސްލާމްދީން ގޮވާލަނީ މުސްލިމުން އެއްބަޔަކު އަނެއްބަޔަކަށް ވާގިވެރިވެ، ނަސްރު ދިނުމަށެވެ. މުސްލިމުން އެއްބަޔަލު އަނެއްބަޔަކަށް އަޅައިލުމަށެވެ.
މިއަދުގެ ހުކުރު ޚުޡުބާގައި ވިދާޅުވެފައި ވެއެވެ.
އިތުރަށް ޚުޡުބާގައި ވިދާޅުވެފައިވާ ގޮތުގައި ދިވެހިންނަކީ ޒަމާނުއްސުރެ އިސްލާމީ އެއްބައިވަންތަކަމުގެ މަތިވެރި ނަމޫނާ ދައްކަމުން އަންނަ ބައެކެވެ.
މިގޮތުން 2004 ވަނަ އަހަރު ކުރިމަތިވި ސުނާމީގެ ކާރިސާގެ ސަބަބުން، މި ކުޑަކުޑަ ރާއްޖެއަށް ބޮޑެތި ގެއްލުންތަކެއް ލިބުނުއިރު، ހާލުގައިޖެހި ބިކަވި އާއިލާތަކަށް އެހީތެރިވުމުގައި ސަރުކާރާ ގުޅިގެން ދިވެހީން ދެއްކީ އެފަދަ ދެވަނައެއް ނެތް މިސާލެއްކަން ފާހަގަކޮށްފައި ވެއެވެ.
އަދި ފަހުގެ ތާރީޚަށް ނަޒަރު ހިންގާލާއިރު، ވެރިކަންކުރާ ފުރަމާލެއިން ބޯފެނުގެ ޚިދުމަތް ކެނޑިގެންދިޔަ ހާދިސާއާއި، ދާދިފަހުން ކުރިމަތިވި ކޯވިޑް-19ގެ ބިރުވެރި ރޯގާގެ ޙާލަތުގައިވެސް ދިވެހީން ދައްކާފައިވަނީ ކެތްތެރިކަމާއި، އެކުވެރިކަމާއި، އެއްބައިވަންތަކަމާއި، އެކަކު އަނެކަކަށް އަޅާލުމާއި، ހެއުފޯރުވުމާއި، ދީލަތިވުމުގެ ނަމޫނާކަމުގައި ޚުޡުބާގައި ވިދާޅުވެފައި ވެއެވެ.
މިގޮތުން މުސްލިމުންގެ މެދުގައި އޮތް އިސްލާމީ އުޚުއްވަތްތެރިކަމުގެ މަތިން ހަނދުމަކުރުމަށާއި، މުޖުތަމަޢުގައި އޮތް ޒަމާންވީ ރީތި އަޚްލާގިއްޔަތަށް ތަބާވެ ތެދު ބުނުމަށާއި ދޮގު ނުހެދުމަށް މިއަދުގެ ހުކުރު ޚުޡުބާގައިވަނީ ގޮލައްވާފައެވެ.
