އަންނަ މަހުގެ 28 ވަނަ ދުވަހު ބޭއްވުމަށް ހަމަޖެހިފައިވާ އެމްޑީޕީގެ ޕްރައިމަރީއަށް އެޕާޓީގެ ރައީސް މުހައްމަދު ނަޝީދު ފޯމު ހުށަހަޅުއްވައިފިއެވެ. ޕްރައިމަރީގައި ވާދަކުރެއްވުމަށް ނަޝީދު ފޯމު ހުށެހެޅެއްވިކަން ހާމަކޮށްފައިވަނީ ޕާޓީގެ ނަޝީދު ފެކްޝަންގެ އިސް މެމްބަރެއް ކަމުގައިވާ، ރައްޔިތުންގެ މަޖިލިހުގެ ހެންވޭރު ހުޅަނގު ދާއިރާގެ މެމްބަރު ހަސަން ލަތީފެވެ. ނަޝީދު ޕްރައިމަރީގައި ވާދަކުރެއްވުމަށް ފޯމު ހުށަހަޅުއްވާފައިވަނީ އޮންލައިކޮށެވެ.

އެމްޑީޕީގެ ކުރިޔަށް އޮތް ރިޔާސީ ޕްރައިމަރީގައި ވާދަކުރެއްވުމަށް ނަޝީދު ފޯމު ހުށަހަޅުއްވާފައިވާއިރު، މީގެކުރިން ވިދާޅުވެފައިވަނީ ރާއްޖޭގެ ރައީސްކަން ދެން ކުރައްވަން ބޭނުންފުޅު ނުވާކަމުގައެވެ.

ފާއިތުވެދިޔަ ސެޕްޓެމްބަރުމަހު އައްޑޫ ސިޓީއަށް، އެރަށުގައި ހުންނަ އެމްއެންޔޫ ކެމްޕަސްއިން، ތިމާވެއްޓާބެހޭ ފޯރަމެއްގައި ބައިވެރިވުމަށް ކުރެއްވި ދަތުރުފުޅެއްގައި، ބޭއްވި ބައެއް ބައްދަލުވުންތަކުގައި، އެމްޑީޕީގެ ބައެއް މެމްބަރުން ނަޝީދުއާއި ކުރިމަތި ކުރުވި ސުވާލަކީ ކުރިޔަށް އޮތް އެޕާޓީގެ ރިޔާސީ ޕްރައިމަރީގައި ވާދަކުރައްވާނޭތޯއެވެ. އެމްޑީޕީގެ އާންމު މެމްބަރުން މި ސުވާލުތަކަށް ޖަވާބު ދެއްވަމުން ނަޝީދު ވިދާޅުވެފައިވަނީ ރާއްޖޭގެ ރައީސްކަން ކޮށްގެން އަނެއްކާވެސް ލިބޭނީ ބޮނޑިއެއް ކަމަށެވެ.

މިގޮތުން ފާއިތުވި ސެޕްޓެމްބަރުމަހުގެ 17ވަނަ ދުވަހު ސ. މަރަދޫގައި ތިބި އެމްޑީޕީގެ މެމްބަރުންނާ އެކު ބޭއްވި ބައްދަލުވުމުގައި ނަޝީދު ވިދާޅުވީ ރާއްޖޭގެ ރައީސްކަން ކޮށްގެން އަނެއްކާ ލިބޭނީ ބޮނޑިއެއް ކަމަށާއި އަދި ބަރުލަމާނީ ނިޒާމެއްގައި ނޫންގޮތަކަށް ރާއްޖޭގައި ވެރިކަން ހިންގޭނެ ކަމަށް ލަފާ ނުކުރައްވާ ކަމަށެވެ. އެ ބައްދަލުވުމުހައި ނަޝީދު ވިދާޅުވީ އަންނަ އަހަރު ބޭއްވުމަށް ހަމަޖެހިފައިވާ ރިޔާސީ އިންތިހާބަށް ވުރެ މުހިއްމު ވެގެން އަންނަން ޖެހޭނީ ބަރުލަމާނީ އިންތިހާބު ކަމުގައެވެ.

އަޅުގަނޑު ދެކޭ ގޮތުގައި ރާއްޖޭގެ ރައީސްކަން ކޮށްގެން އަނެއްކާވެސް ލިބޭނީ ބޮޑިއެއް. އެކަމު ރާއްޖޭގައި ބަރުލަމާނީ ނިޒާމެއްގައި، ޕާލިމަންޓްރީ ނޫން ނިޒާމެއްގައި ވެރިކަން ހިންގޭނެ ކަމަކަށް އަޅުގަނޑަކަށް ލަފައެއް ނުކުރެވޭ. ތިބޭފުޅުން އަޅުގަނޑުދެކެ ރުޅި އަންނާނެ. އަޅުގަނޑަށް ފެންނަ ފެނުމުގައި ނިޒާމު ބަދަލު ކުރުމުގެ މަސައްއަކަތް އަޅުގަނޑު ކުރާނެ. ދެން އަޅުގަނޑު ދެކޭނީ އަޅުގަނޑަށް ކާމިޔާބު ވާނެކަމަށް. އަޅުގަނޑު ދެކޭނީ ރިޔާސީ އިންތިޚާބަށްވުރެ އިސްކަންދޭންވީ ނިޒާމީ އިންތިޚާބަށް ކަމަށް.

މި ބައްދަލުވުމުގައި ނަޝީދު ވިދާޅުވެފައި ވެއެވެ.

އެމްޑީޕީގެ ރިޔާސީ ޕްރައިމަރީއށް ނަޝީދު ފޯމު ހުށަހަޅުއްވާފައިވާއިރު، ރައީސް ސާލިހުވެސް ގެންދަވަނީ ރިޔާސީ ޕްރައިމަރީގައި ވާދަކުރެއްވުމަށް ފޯމު ހުށަހެޅެއްވުމަށް ތައްޔާރު ވަމުންނެންވެ. މިގޮތުން ޕްރައިމަރީގައި ވާދަކުރެއްވުމަށް ފޯމުހުށަހެޅުމަށް ބޭނުންވާ ތާއީދު ފޯމަށް ރައީސް ސާލިހު ސޮއި ހޯއްދަވަމުން ގެންދަވާއިރު، ރޭވަނީ އެމަނިކްފާނުގެ ފެކްޝަންގެ ހަރުގެ ޖަލްސާތައް ފަށާފައެވެ.

އެމްޑީޕީގެ ޕްރައިމަރީ އޮންނާނީ ޖެނުއަރީ 28ގައެވެ. މިމަހުގެ 24ގެ ކުރިން ވާދަކުރައްވާ ކެނޑިޑޭޓުން ޕާޓީއަށް ނަން ހުށައަޅަންޖެހެއެވެ.

ރިޔާސީ އިންތިޚާބު އޮންނާނީ އަންނަ އަހަރުގެ ސެޕްޓެމްބަރު މަހުއެވެ.