އަންނަ ހުކުރުދުވަހު މާލޭގައި ބާއްވާ ބޮޑު ޖަލްސާ "ފެލާލައިފި" ޕްރޮމޯޓުކޮށް ރައްޔިތުންގެ ތާޢީދު ހޯދުމަށް އިދިކޮޅު ޕްރޮގްރެސިވް ކޮންގްރެސް ކޯލިޝަނުން މާލެއަތޮޅަށް ހިނގައްޖެއެވެ.
މާލެއަތޮޅުގެ ބައެއް ރަށްރަށަށް ކުރާ ދަތުރެއްގައި މިއަދު ފުރުމުގެ ކުރިން އިދިކޮޅުން ވަނީ މާލޭ އެއް ޢިއްޒުއްދީން ފާލަން ސަރަޙައްދުގައި ނޫސްވެރިންނަށް މަޢުލޫމާތު ދީފައެވެ. މިއަދު ނޫސްވެރިންނަށް މަޢުލޫމާތުދެއްވަމުން ނައިފަރު ދާއިރާގެ މެމްބަރު އަދި ޕީޕީއެމްގެ ނައިބު ރައީސް އަޙްމަދ ޝިޔާމް ވިދާޅުވީ، މިދަތުރަކީ މިއަދުގެ ޤައުމުގެ ޙާލަތާއި ސަރުކާރުގެ ޢަމަލުތަކުގެ ސަބަބުން ރައްޔިތުން އުފުލަމުންދާ ތަކުލީފުތަކަށް ޙައްލެއް ގެނައުމަށް އިދިކޮޅުން ރާވާފައިވާ ކަންކަމާއި ސިޔާސަތުތައް ރައްޔިތުންނަށް ކިޔައިދިނުމަށާއި، ހުކުރުދުވަހުގެ ރޭގެ ޖަލްސާގެ މުހިންމުކަން ހާމަކުރުމަށް ކުރާ ދަތުރެއްކަމަށެވެ. އަދި މިޖަލްސާއަކީވެސް ރައްޔިތުންގެތެރެއިން ގިނަ ބައެއްގެ އެދުމުގެ މަތިން ބާއްވާ ޖަލްސާއެއްކަމަށް ޝިޔާމް ވިދާޅުވިއެވެ.
ޕީއެންސީގެ ނައިބުރައީސް އަދި މާލޭ ސިޓީ ކައުންސިލްގެ ހުޅުމާލެ ދާއިރާގެ ކައުންސިލަރ އިބްރާހީމް ޝުޖާޢު ވިދާޅުވީ މި ދަތުރުގައި ރައީސް ޔާމީންގެ2023ވަނަ އަހަރުގެ މެނިފެސްޓޯގެ މުހިންމު މަޢުލޫމާތު ރައްޔިތުންނަށް ދިނުމާއި އަދި ރައްޔިތުން މެނިފެސްޓޯގައި ހިމަނަން ބޭނުންވާކަން އޮޅުންފިލުވުންވެސް ކުރިއަށްދާނެކަމަށެވެ. އަދި ހުކުރުދުވަހުގެ ޖަލްސާއަށް ރަށްރަށުން މީހުން ގެނައުމަށް ކެމްޕެއިން ކުރިންވެސް އޮންނާނެކަމަށް ޝުޖާޢު ވިދާޅުވިއެވެ.
އަޅުގަނޑުމެން މިފުރީ ކ.ރައްޔިތުންގެ އަރިހަށް.ޤައުމު އިރާ،ވީދާ ކުދިކޮށް ”ފެލާލައިފި“.އަޅުގަނޑުމެން އެދެނީ ސިޓިންގ ރޫމްތަކުން ޖަލްސާބެލުމުގެ ޝައުޤު ދޫކުރައްވާ ކާނިވަލުގެ ގޮނޑިއަށް ވަޑައިގެން ދެއްވުން.އިންޝާالله އަޅުގެނޑުމެން މިވެރިކަން ނިންމާނަން☝🏼#Felaalaifi#RY2023 pic.twitter.com/jH7Zhqp7gE
— Ibrahim Shujau (@IbrahimShujaau) December 20, 2022
"ފެލާލައިފި"ގެ ނަމުގައި ބާއްވާ ޖަލްސާ ބާއްވަން ކަނޑައަޅާފައިވަނީ އަންނަ ހަފްތާގެ ހުކުރުދުވަހުގެރެއެވެ.
ޕީޕީއެމްއިން ބުނީ މާލޭގެ ކާނިވާ ސަރަޙައްދުގައި ބާއްވާ މިޖަލްސާއަކީ މިސަރުކާރުން ރައްޔިތުންނަށް ވެފައިވާ ވަޢުދުތައް ނުފުއްދާތީއާއި ރައްޔިތުންގެ އަތުން ނަގާ ޓެކްސް ބޮޑުކޮށް އެތައް ތަކުލީފެއް ޖައްސާތީ އެކަންކަމާ ދެކޮޅަށް އަޑުއުފުލަން ބާއްވާ ޖަލްސާއެއްކަމަށެވެ. އަދި ތަކެތީގެ އަގުތައް އިންތިހާއަށް ބޮޑުވެ ޢާންމު ޚިދުމަތްތަކުގެ އަގުބޮޑުވެ އެކި ނަންނަމުގައި ރައްޔިތުން ޖޫރިމަނާކޮށް "ފެލާތީ" އެކަންކަމާ ދެކޮޅަށް މިޖަލްސާގައި އަޑުއުފުލާނެކަމަށްވެސް ޕީޕީއެމްއިން ބުނެއެވެ.
ޕީޕީއެމްއިން އަންނަނީ ދޭތެރެދޭތެރެއިން މާލޭގައި ބޮޑެތި ޖަލްސާތައް ބާއްވައި ސަރުކާރަށް ފާޑުކިޔަމުންނެވެ. ފަހަކަށްއައިސް ޕީޕީއެމްއިން ބާއްވާ ޖަލްސާތަކާއި އެޕާޓީން އަތޮޅުތަކަށް ކުރާ ދަތުރުތަކަށް ޢާންމުންގެ ތަރުޙީބު ވަރަށްބޮޑުކަން ފާހަގަކުރެވެއެވެ.
