ރާއްޖޭގައި މަރުވާ މީހުންނާއި ދިވެހިންގެ ކަށުނަމާދު ގަޑިތައް އަންގައިދެމުން އަންނަ ފޭސްބުކް ޕޭޖާއި ވައިބާ ގުރޫޕު ހުއްޓާލުމަށް މާލެ ސިޓީކައުންސިލުން އެންގިކަމަށް ބުނާ ވާހަކަ މާލެ ސިޓީ ކައުންސިލުން ދޮގުކޮށްފިއެވެ. ނަމަވެސް ސޯޝަލް މީޑިއާ ޕްލެޓްފޯމް ފޭސްބުކާއި ޓުވިޓާގައި "ކަށުނަމާދު" އެކައުންޓު ހިންގާ އަހުމަދު މުނައްވަރު ވަނީ ކަށުނަމާދު އިއުލާނު ކުރުން ހުއްޓާލަން އެންގީ އޭނާއަކީ ކައުންސިލުގެ މުވައްޒަފަކަށްވުމުންކަމަށެވެ. އަދި އެކަމަކީ ކައުންސިލުން ކުރަންޖެހޭ މަސައްކަތެއް ކަމަށް ސިޓީ ކައުންސިލުން ބުނިކަމަށް ބައެއް ނޫސްތަކާއި ވާހަކަ ދައްކަމުން މުނައްވަރު ބުނެފައިވެއެވެ.
މާލެ ސިޓީ ކައުންސިލުން ކުރި ޓްވީޓެއްގައި ބުނީ ކަށުނަމާދު ޕޭޖް ހިންގާ ފަރާތައް ޕޭޖް ހިންގުން މަނާކޮށް ، އެކަން ހުއްޓާލުމަށް މާލެ ސިޓީ ކައުންސިލުން އެންގިކަމަށް ދެކެވޭ ވާހަކައަކީ އެއްވެސް ހަގީގަތެއް އެކުލެވޭ ވާހަކައެއް ނޫންކަމަށެވެ.
ކަށުނަމާދު ޕޭޖް ހިންގާ ފަރާތައް ޕޭޖް ހިންގުން މަނާކޮށް ، އެކަން ހުއްޓާލުމަށް މާލެ ސިޓީ ކައުންސިލުން އެންގިކަމަށް ދެކެވޭ ވާހަކައަކީ އެއްވެސް ހަގީގަތެއް އެކުލެވޭ ވާހަކައެއް ނޫންކަމުގައި ދަންނަވަމެވެ. 1/2
— Male' City Council (@MaleCitymv) December 19, 2022
ސިޓީ ކައުންސިލުން އިތުރަށް ބުނީ މާލެ ސިޓީ ކައުންސިލުގެ އެއްވެސް އޮފިޝަލަކު އެޕޭޖު ހިންގާ ފަރާތައް އެފަދަ ރަސްމީ އެއްވެސް އެންގުމެއް އަންގާފައި ނުވާނެކަމަށެވެ.
މަލަރެސްއަށް މައުލޫމާތު ލިބިފައިވާ ގޮތުގައި އެޕޭޖް ހިންގާ ފަރާތަކީ މާލެ ސިޓީ ކައުންސިލުގައި މަސައްކަތްކުރާ މުވައްޒަފެކެވެ. އެ ޕޭޖް ހިންގާ ފަރާތުން މާލެސިޓީ ކައުންސިލުގެ ނިޔާވާ މީހުންގެ ދަފްތަރުގެ މައުލޫމާތު އެއްވެސް ހުއްދައަކާ ނުލާ އަމިއްލަ ޕޭޖެެއްގައި އަންނަނީ ބޭނުން ކުރަމުންނެވެ.
