ގުޅީފަޅުގައި ހިނގި އަލިފާނުގެ ޙާދިސާ އެފްކޮންގެ ސައިޓުން އިންސާނެއްގެ ހަށިގަނޑުގެ ބައިތަކެއް ފެނިއްޖެއެވެ. އެ ސަރަހައްދުން އިންސާނެއްގެ ކަށިތަކެއް ފެނިފައިމިވަނީ އެފްކޯންގެ މުވައްޒަފެއް މަދުވެގެން އޭނާ ހޯދުމުގެ މަސައްކަތްކުރަމުން އަންނަނިކޮށެވެ. މިދިޔަ ބުރާސްފަތި ދުވަހުގެ ރޭ އަލިފާނުގެ ހާދިސާ ހިނގީ އެފްކޮންސްގެ މުވައްޒަފުންތިބޭ އެކަމޮޑޭޝަން ބްލޮކެއްގައެވެ. އެތަންވަނީ އެލިފާނުގެ ހާދިސާގައި އަނދައި ހުލިވެފައެވެ. މި އަލިފާނުގެ ހާދިސާގައި 70އަށްވުރެ ގިނަ މީހުންނަށް އަނިޔާވެ ފަރުވާދީފައިވެއެވެ. 6 މީހަކަށް ސީރިއަސް އަނިޔާވެފައިވެއެވެ. އަދި އެކަކު ގެއްލުނުކަމަށް ރިޕޯޓްކުރިއެވެ.
މީހަކު ގެއްލިގެން އުޅޭ ކަމަށް ރިޕޯޓް ކޮށްފައިވަނީ އަލިފާނުގެ ޙާދިސާއަށް އެއް ދުވަސް ފަހުންނެވެ. ބްރިޖްގެ މަސައްކަތް ކުރާ އެފްކޮންސް ކުންފުނިން ފުރަތަމަ ބުނެފައިވަނީ ސައިޓްގައި ދިރިއުޅެމުންދިޔައީ 456 މީހުންކަމަށެވެ. ނަމަވެސް އެ ހަދިސާއަށްފަހު އެތނަުގައި ދިރިއުޅުނު މީހަކު މަދުވާ ކަމަށް އެތަނުގައި ދިރިއުޅުނު ފަރާތްތަކުން ފާހަގަކުރުމާ ގުޅިގެން އެމީހާ ހޯދުމުގެ މަސައްކަތް ފެށި ކަމަށް ފުލުހުން ބުންޏެވެ.
އެގޮތުން އެމްއެންޑީއެފްއިން ވަނީ، އަލިފާނުގެ ޙާދިސާ ހިނގި ސައިޓް އިތުރަށް ބަލާފައެވެ. ފުލުހުން ވިދާޅުވީ އަނދާފައިވާ އެކޮމަޑޭޝަން ބްލޮކް ހިމެނޭ ސަރަޙައްދު ބެލުމުގެ ތެރޭގައި، އިންސާނެއްގެ ހަށިގަނޑުގެ ބައިތަކެއް ކަމަށް ބެލެވޭ ބައިތަކެއް ފެނިފައިވާ ކަމަށެވެ.
އަލިފާނުގެ ޙާދިސާ ހިނގަން މެދުވެރިވި ސަބަބު ދެނެގަތުމުގެ މަސައްކަތްވެސް ދަނީ ކުރަމުންނެވެ.
