އެމެރިކާގެ މަޝްހޫރު ބާސްކެޓް ބޯޅަ ކުޅުންތެރިޔާ ބްރިޓްނީ ގްރިނާ، ގައިދީން ބަދަލު ކުރުމުގެ އެއްބަސްވުމެއްގައި، އޭނާ ހައްޔަރު ކޮށްފައިވާ ރަޝިއާގެ ޖަލުން މިނިވަން ކޮށްފިއެވެ. ބްރިޓްނީ ރަޝިއާގެ ޖަލުން މިނިވަން ކުރުމުގެ ބަދަލެއްގެ ގޮތުން އެމެރިކާއިން ވަނީ އެގައުމުގައި، 25 އަހަރުގެ ޖަލު ހުކުމެއް ތަންފީޒުކުރަމުން ގެންދިޔަ، ހަތިޔާރު ޑީލަރެއް ކަމުގައިވާ ވިކްޓަރ ބޮއުޓް ޖަލުން މިނިވަން ކޮށްފއެވެ.
އަލްޖަޒީރާއިން ރިޕޯޓު ކޮށްފައިވާ ގޮތުގައި، އެމެރިކާގެ ޖަލުން މިނިވަންކުރި، ހަތިޔާރުގެ ވަގު ވިޔަފާރު ކުރާ، ރަޝިއާގެ ގައިދީ މިހާރުވަނީ ރަޝިއާއަށް ގޮސްފައެވެ.
ޖަލުން މިނިވަން ކޮށްފައިވާ ރަޝިއާގެ ވިކްޓަރ ބޮއުޓް ހައްޔަރު ކޮށްފައިވަނީ 2008 ވަނަ އަހަރު، ތައިލޭންޑުގައި އެގައުމުގެ ސިފައިންނާއި ތައި ސިފައިން ގުޅިގެން ހިންގި އޮޕަރޭޝަނެއްގައެވެ. އެއަށްފަހު، އެމެރިކާގެ އޮފިޝަލުންނާއި އެގައުމުގެ ރައްޔިތުންނަށް ޖާސޫސް ކުރުމުގެ ކުށުގައި އޭނާ އެމެރިކާއާއި ހަވާލު ކުރުމުން، އެމެރިކާގެ ކޯޓުތަކުން ވަނީ އޭނާ 25 އަހަރަށް ޖަލަށް ލާން ހުކުމް ކޮށްފައެވެ.
ރަޝިއާގެ ފޮރިން މިނިސްޓްރީންވަނީ، އެގައުމުގެ ރައްޔިތެއް ކަމުގައިވާ ވިކްޓަރ ބޮއުޓް އެމެރިކާއިން މިނިވަން ކުރުމުގެ ބަދަލުގައި، ރަޝިއާގައި ޖަލަށް ލާފައިހުރި، އެމެރިކާގެ މަޝްހޫރު ބާސްކެޓް ބޯޅަ ކުޅުންތެރިޔާ ޖަލުން މިނިވަން ކޮށްފައިކަމަށް ބުނެފައެވެ. ރަޝިއާގެ ނޫސް އޭޖެންސީތަކުން ރިޕޯޓު ކޮށްފައިވާ ގޮތުގައި، ގައިދީން މިނިވަންކޮށް އެގައުމުން އަނެއް ގައުމާއި ހަވާލުކޮށްފައިވަނީ އަބޫދާބީ އެއަރޕޯޓުގައެވެ.
އެމެރިކާގެ ބާސްކެޓް ކުޅުންތެރިޔާ މިނިވަން ވުމާއި ގުޅިގެން އެމެރިކާގެ ރައީސް ޖޯ ބައިޑްންވަނީ ޓުވިޓަރުގައި އުފާ ފާޅުކޮށްފައެވެ.
މީގެ ކުޑަ ވަގުތުކޮޅެއްގެ ކުރިން އަހަރެން ބްރިޓްނީ ގްރިނަރއާއި ވާހަކަ ދެއްކިން. އޭނާ ހުރީ ރައްކާތެރިކަމާއެކު. މިހާރު ހުރީ މަތިންދާ ބޯޓުގަ. އެނބުރި ގައުމަށް އައުމުގެ މަގިމަތީގަ.
ބައިޑްން ޓުވީޓް ކޮށްފައި ވެއެވެ.
Moments ago I spoke to Brittney Griner.
She is safe.
She is on a plane.
She is on her way home. pic.twitter.com/FmHgfzrcDT— President Biden (@POTUS) December 8, 2022
ރަޝިއާއިން ބްރިޓްނީ ގްރިނަރ ހައްޔަރު ކޮށްފައިވަނީ އެގައުމަށް، މަސްތުވާތަކެތީގެ ބާވަތެއް ކަމުގައިވާ ނާކޮޓިކްސް ވަގަށް އެތެރެ ކުރަން އުޅުމުގެ ތުހުމަތުގައި، މިއަހަރުގެ ފެބްރުއަރީމަހު، މޮސްކޯގެ އެއަރޕޯޓު ކައިރިންނެވެ. އޭނާ ރަޝިއާއަށް ދަތުރު ކޮށްފައިވަނީ، އޭނާ ތާއީދުކުރާ ރަޝިއާގެ ބާސްކެޓް ބޯޅަ ޓީމާއި ގުޅުމަށެވެ.
