އިސްރާއީލުގެ ޖާސޫސީ އިދާރާއާއި ގުޅިގެން މަސައްކަތްކުރި، އިރާނުގެ 4 މީހަކަށް މަރުގެ އަދަބު ދީފައިވާކަމަށް އެގައުމުގެ ޖުޑިޝަރީން ބުނެފިއެވެ.
މިއަދުގެ ހެނދުނު، ޒަޔަނިސްޓް އިންޓެލިޖެންސް ސާވިސްއާއި ގުޅުން ބޭއްވި ގޭންގުގެ 4 މީހަކަށް ވަނީ މަރުގެ އަދަބު ދީފަ.
އިރާނުގެ ޖުޑިޝަރީގެ މިޒާން އޮންލައިން ވެބްސައިޓުގައި ރިޕޯޓު ކޮށްފައި ވެއެވެ.
އިރާނުން މިމީހުންގެ މަރުގެ ހުކުން ތަންފީޒު ކޮށްފައިވަނީ އެގައުމުގެ ސުޕްރިމް ކޯޓުން މިމީހުންގެ ހުކުމް ދެމެހެއްޓުމަށް ހުކުމް ކުރިތާ 4 ދުވަސް ފަހުންނެވެ. އެމީހުންގެ މައްޗަށް މަރުގެ ހުކުމް އިއްވާފައިވަނީ، އިސްރާއީލުގެ ޖާސޫސީ އިދާރާއި ގުޅިގެން މަސައްކަތް ކުރުމާއި ކިޑްނެޕް ކުރުމުގެ ތުހުމަތު އެމީހުންގެ މައްޗަށް ސާބިތު ވުމާއި ގުޅިގެންނެވެ.
އިރާނުގެ ޖުޑިޝަރީން ބުނެފައިވަނީ މި 4 މީހުންގެ މައްސަލަ އިތުރަށް އިސްތިއުނާފް ކުރުމުގެ ފުރުސަތު އެމީހުންނަށް ދެން އިތުރަށް ނެތްކަމުގައެވެ.
މި 4 މީހުންގެ އިތުރުން އިތުރު 3 މީހަކުވަނީ 5 އަހަރާއި 10 އަހަރާއި ދެމެދުގެ މުއްދަތަކަށް ޖަލަށް ލާން ހުކުމް ކޮށްފައެވެ. މިމީހުން ޖަލަށްލާން ހުކުމް ކޮށްފައިވަނީ އިރާނުގެ ސަލާމަތީ ބާރުތަކާއި ދެކޮޅަށް މަސައްކަތް ކުރުމާއި، ކިޑްނެޕް ކުރުމުގައި ޝާމިލްވެފައި ވާތީއާއި އަދި ހަތިޔާރު ގެންގުޅުމުގެ ކުށުގައެވެ.
މިއަރުގެ މޭމަހު އިރާނުގެ ރިވޮލިއުޝަނަރީ ގާޑްސް ކޯޕްސްއިން ބުނެފައިވަނީ އިސްރާއީލުގެ ޖާސޫސީ އިދާރާގެ އެންގުމާއި އެއްގޮތަށް ހަރަކާތްތެރިވަމުންދިޔަ ނެޓްވާކެއް އަތުލައިގެންފައި ވާކަމުގައެވެ. އަދި މިއަހަރުގެ ޖުލައިމަހު އިރާނުންވަނީ، އިސްރާއީލުގެ ޖާސީސީ އިދާރާ މޮސާދާއި ގުޅުންހުރި ބަޔަކު ހައްޔަރު ކޮށްފައިވާކަމަށް ބުނެފައެވެ.
