މާލޭގެ ފިހާރަތަކުން ވައްކަންކުރަމުންދާ މީހާކު މިއަހަރު 6ވަނަ ފަހަރަށް ހައްޔަރުކޮށްފިއެވެ.
މިމީހާ ވައްކަންކޮށްގެން ކުށުގެ ތުހުމަތުގައި ކުރިން ހައްޔަރުކުރި 5 ފަހަރުވެސް ވަނީ އެކަށީގެންވާ އަދަބު ނުދެވި ދޫކޮށްލާފައެވެ. މިފަހަރު އޭނާ ބަންދުކުރަން ކޯޓުން ކުރި އަމުރާއެކު އޭނާގެ ކުށުގެ ބައެއް ރެކޯޓުތައް ހާމަކޮށްފައިވެއެވެ. އެގޮތުން ޢުމުރުން 47 އަހަރުގެ މި މީހާ އެންމެފަހުން މިހައްޔަރުކުރީ އެމްއެމްއޭ މާޓު ފިހާރައިން ބޮޑު ކޮފީ ޕެކެޓެއް ވަގަށް ނަގަން އުޅެގެންނެވެ. އޭނާ އަތުލައިގަތީ އެފިހާރައިގެ މުވައްޒަފުންނެވެ. މިމައްސަލާގައި އޭނާގެ މައްޗަށް ތުހުމަތުކުރެވޭ ކުށުގެ މައްސަލަ އޭނާ ކުރިއަށްގެންދަން ބޭނުންވަނީ ވަކީލަކާއެކުއެވެ. މިފަހަރު އޭނާގެ ބަންދަށް ކޯޓުން ދިނީ 5 ދުވަހެވެ.
ކޯޓުން ހާމަކުރައްވާފައިވާގޮތުގައި 47 އަހަރުގެ މިމީހާ 47 ފަހަރު މިހާތަނަށް ހައްޔަރުކޮށްފައިވެއެވެ. އަދި 31 ފަހަރު ބަންދުކޮށްފައިވެއެވެ. މިފަހަރުތަކުގައި އޭނާގެ މައްޗަށް ތުހުމަތުކުރެވިފައިވަނީ މައިގަނޑުގޮތެއްގައި މަސްތުވާތަކެއްޗާއި ވައްކަމުގެ މައްސަލަތަކުގެ ކުށެވެ.
މިއަހަރު އެކަނިވެސް 6 ފަހަރެއްގެ މަތިން އޭނާ ހައްޔަރުކޮށް ބަންދުކޮށްފިއެވެ. ހަމަ ކޮންމެފަހަރަކުވެސް ކޮންމެވެސް ގޮތަކުން ދޫވަނީއެވެ.
