މާލޭގައި ހުރި ގަރާޖްތައް ހިންގަން ހުޅުމާލެއިން ބިން ދޫކުރުމަށް އެޗްޑީސީން ނިންމައިފިއެވެ.
ހައުސިން ޑިވެލޮޕްމެންޓު ކޯޕަރޭޝަން (އެޗްޑީސީ) އިން މިއަދު ބުނެފައިވަނީ އެކުންފުނިން މިގޮތަށް ނިންމާފައިވަނީ، އާންމުން ދިރިއުޅޭ ތަންތަނުގައި ހިންގަމުންދާ ގަރާޖުތައް ރައްކާތެރި ސަރަަހައްދުތަކަށް ބަދަލު ކުރުމަށް ސަރުކާރާއި އެ ކުންފުނިން ފަށާފައިވާ މަސައްކަތްތަކުގެ ތެރެއިން ކަމުގައެވެ.
މިގޮތުން އެޗްޑީސީން ނިންމާފައިވަނީ މާލޭގައި ހިންގާ 1،000 އަކަފޫޓަށް ވުރެ ކުޑަ ގަރާޖުތަކަށް ހުޅުމާލެއިން 1000 އަކަފޫޓު އަދި ސައިޒުން އެއަށްފުރެ ބޮޑު ގަރާޖްތަކަށް 1300 އަކަފޫޓުގެ ޖާގަ ހަމަޖެއްސުމަށެވެ.
މިގޮތުން ދޫކުރާ ބިންތަކުގައި ހަދާ ގަރާޖްތައް ދެ ފަންގިފިލާއަށް އިމާރާތް ކުރެވޭނެކަމަށްވެސް އެޗްޑީސީން ބުނެފައި ވެއެވެ.
ޚާއްސަކޮށް މާލޭއަކީ މީހުން ބައިބޯ ތަނަކަށް ވުމާއެކު، މާލޭގައި ހިންގާ ގަރާޖްތަކުގައި ވެލްޑިން ކުރުމާއި ޓިންކަރިން ކުރުންފަދަ މަސައްކަތްތައް ކުރުމުގެ އިތުރުން އެ ތަންތަނުގައި ކެމިކަފަދަ ތަކެތި ބޭނުން ކުރުމުގެ ސަބަބުން ނުރައްކާތެރި ހާދިސާތައް ހިގުމަށް މަގުފަހި ވަމުން ދާތީ، އެޗްޑީސީން ފާހަގަ ކޮށްފައިވާ ގޮތުގައި، ގަރާޖްތައް ހުޅުމާލެއަށް ބަދަލު ކުރެވުމުން މިމައްސަލައަށް ބޮޑު ހައްލެއް ލިބިގެން ދާނެއެވެ.
އެޗްޑީސީން ބުނެފައިވަނީ ހުޅުމާލެއިން ގަރާޖު ދޫކުރާ އުސޫލު ބަޔާންކޮށް، އެކަމަށް އެދޭ ފަރާތްތަކުން ކުރިމަތިލުމަށް ވަކިން އިއުލާން ކުރާނެކަމުގައެވެ.
ގަރާޖްތަކަށް ހުޅުމާލެއިން ބިން ދޫކުރުމަށް އެޗްޑީސީން ނިންމާފައިވާއިރު މި ނޮވެމްބަރުމަހު މ. ނިރުފެހި ގޭގައި ހިންގަމުން އައި ގަރާޖެއްގައި ރޯވެ ވަނީ 10 ބިދޭސީއަކު މަރުވެފައެވެ.
