މ. ނިރުފެހިގޭގައި ހިނގި އަލިފާނުގެ ހާދިސާގައި ނިޔާވި މީހުންގެ ތެރޭގައި ހިމެނޭ އިންޑިއާ އެންމެންގެ ހަށިތައް އެ ގައުމަށް ގެންގޮސްފައިވާ ކަމަށް އިންޑިއާ ހައި ކޮމިޝަނުން މިއަދު ބުނެފިއެވެ.
ނިރުފެހި ގޭގައި މި މަހުގެ ނުވަ ވަނަ ދުވަހުގެ ރޭ ދަންވަރު ހިނގި އަލިފާނުގެ ހާދިސާގައި 10 ބިދޭސީއަކު މަރުވި އެވެ. އެއީ އިންޑިއާގެ 8 މީހަކާއި ބަންގްލަދޭޝްގެ ދެ މީހެކެވެ. މީގެ ކުރިން އިންޑިއާގެ ތިން މީހެއްގެ ހަށިގަނޑު ވަނީ އެ ގައުމަށް ފޮނުވާލައިފައެވެ.
އިންޑިއާ ހައި ކޮމިޝަނުން ބުނީ އަލިފާނުގެ ހަދިސާގައި މަރުވި އިންޑިއާ މީހުންގެ ތެރެއިން މިހާތަނަށް އެ ގައުމަށް ނުފޮނުވި ހުރި ހަށިތައް މިހާރު އެ ގައުމަށް ފޮނުވާލާފައިވާ ކަމަށެވެ.
Fire incident in Malé:
Mortal remains of all 8 Indian nationals, who lost their lives in this unfortunate incident, have been repatriated to India.
We thank Maldivian authorities for their support in this regard.
— India in Maldives (@HCIMaldives) November 17, 2022
ފުލުހުންގެ ތަހްގީގަށް އެނގިފައިވާ ގޮތުގައި އަލިފާން ރޯވީ ވޯކްޝޮޕެއްގެ ގޮތުގައި ބޭނުން ކުރަމުން އައި އިމާރާތުގެ ގްރައުންޑް ފްލޯގައެވެ. ނަމަވެސް އަލިފާންގަނޑު ވަނީ ގާތްގަނޑަކަށް މިނެޓެއް ތެރޭގައި މުޅި ގެއަށް ފެތުރިފައެވެ. އަލިފާން ރޯވިއިރު ގިނަ މީހުން ތިބީ ނިދާފައެވެ. އަލިފާން ރޯވިއިރު 26 މީހަކު އެއިމާރާތުގައި ތިއްބެވެ.
ފުލުހުން މިހަފްތާގައި ބޭއްވި ނޫސްވެރިންގެ ބައްދަލުވުމެއްގައި އިންސްޕެކްޓަ އޮފް ޕޮލިސް މުހަންމަދު ސާމީ ވިދާޅުވީ އެ އިމާރާތުގެ އެތެރެ ހަދާފައި ހުރީ ފިލައިން ކަމަށާއި އޭގެ ތެރެއިން އެއް ފްލޯގައި ހަތަރު ކޮޓަރި، އަނެއް ފްލޯގައި އަށް ކޮޓަރި ހަދާފައިވާ ކަމަށެވެ. އެ ތަންތަން ވެސް ވަކިކޮށްފައި ހުރީ ފިލައިން ކަމަށް އޭނާ ވިދާޅުވި އެވެ. އެއީ ވިއްސަކަށް ފޫޓު، ތިރީސް ފޫޓުގެ ތަނެއް ކަމަށް ވެސް ފުލުހުން ވިދާޅުވިއެވެ.
