މަސްވެރިންނަށް މަސްކިރުވާފައި ލިބެންޖެހޭ ފައިސާ ނުލިބިގެން ލ. އަތޮޅުގެ މަސްވެރިން އިހުތިޖާޖުކުރާތީ އެމީހުންނަށް ކުރިމަތިވެފައިވާ މައްސަލަތައް ބެލުމަށް ރައްޔިތުންގެ މަޖިލީހަށް ހުށަހަޅައިފިއެވެ.
ލ.އަތޮޅާއި ތ.އަތޮޅުގެ މަސްވެރިން މިދުވަސްވަރު އިހުތިޖާޖުކޮށް އަޑުއުފުލަމުން ދެއެވެ. އެމީހުން އަޑުއުފުލަނީ މަސްކިރުވާފައި ލިބެން ޖެހޭ ފައިސާ ނުލިބި ލަސްވާތީއާއި ތެލާއި އައިސް ގަތުމުގައި މަސްވެރިންނަށް ދިމާވާ ދަތިތައް ޙައްލުކޮށްދެއްވުމަށް ސަރުކާރާއި ކަމާބެހޭ ފަރާތްތަކުން މާބޮޑުކަމެއް ނުކުރާކަމަށް ތުހުމަތުކޮށެވެ.
މިކަންބޮޑުވުންތައް ބަލަން މަޖިލީހަށް ހުށހެޅީ ރައްޔިތުންގެ މަޖިލީހުގެ، ލ.ފޮނަދޫ ދާއިރާގެ މެންބަރު މޫސާ ސިރާޖެވެ. އޭނާ މައްސަލަ ހުށަހެޅީ އިއްޔެއެވެ.
މޫސާ ސިރާޖު މިމައްސަލާގައި ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ފޮނުއްވި ސިޓީގައި ވަނީ މަސްވެރިން ބާނާ މަސް ކިރުވުމަށްފަހު ލ.މާންދޫގައި ގާއިމުކޮށްފައިވާ ފިޝަރީޒް ޕްރައިވެޓް ލިމިޓެޑުން މަސްވެރިންނަށް ފައިސާ ނުދޭތާ އެތައް ދުވަހެއް ވެފައިވާކަމަށެވެ. އަދި އެ ފައިސާގެ އަދަދު މިހާރު މިލިއަނަކަށް އަރާފައިވާކަމަށާ، މިކަމުގެ ސަބަބުން މަސްވެރިންނަށް ބޮޑެތި ދަތިތަކާއި އެތައް ތަކުލީފެއް އުފުލަން ޖެހިފައިވާކަމަށެވެ. އަދި މަހަށް އަގު ނުލިބޭތާނގައި ލ.އަތޮޅުން މަސްވެރިންނަށް ތެލާއި އައިސް ހޯދުމުގައިވެސް ދަތިތަކާ ކުރިމަތިވެފައިވާކަން އޭނާ ފާހަގަކުރައްވާފައިވެއެވެ.
ލ.އަތޮޅުގެ މަސްވެރިން ކުރަމުންދާ އިހުތިޖާޖު ހޫނުވެ އަޑުއުފުލަން އެއްވި މަސްވެރިންނަށް ގަޔަށް ފުލުހުންވަނީ ޕެޕަ ސްޕްރޭ ޖަހާފައެވެ.
