މިދިޔަ ބުދަ ދުވަހުގެ ރޭ މ.ނިރުފެހި ގޭގައި ހިނގި އަލިފާނުގެ ހާދިސާގައި މަރުވި އެންމެން ދެނެގަނެވިފައިވާކަމަށް ފުލުހުން ބުނެފިއެވެ. އަލިފާނުގެ ހާދިސާގައި 10 މީހަކު ވަނީ މަރުވެފައެވެ.
އަލިފާނުގެ ހާދިސާގައި ނިޔާވި މީހުންގެ ތެރެއިން 9 މީހުން ދެނެގަނެވިފައިވާކަމަށް ފުލުހުން ބުނެފިއެވެ. މި ޙާދިސާގައި މަރުވިއެންމެންނަކީވެސް ބިދޭސީންނެވެ. އެންމެފަހުން ދެނެގަނެވުނު މީހާއަކީ އިންޑިއާ މެހެކެވެ. އިންޑިއާއަށް ނިސްބަތްވާ 8 މީހަކު މި ޙާދިސާގައި ވަނީ މަރުވެފައެވެ. އެއީ 3 އަންހެނުންނާއި 5 ފިރިހެނުންނެވެ. ދެން މަރުވެފައިވަނީ ބަންގްލަދޭޝަށް ނިސްބަތްވާ އަންހެނަކާއި ފިރިހެނެކެވެ.
ހާދިސާގައި މަރުވި މީހުންގެ ހަށިގަނޑުތައް ވަރަށް ބޮޑަށް އަނދާފައިވާތީ އެމީހުން ވަކިކުރަން ނޭނގޭ ވަރަށް ސިފަ ގެއްލިފައިވާ ކަމަށް ފުލުހުން ކުރިން ވިދާޅުވެފައިވެއެވެ. ފުލުހުން ވިދާޅުވީ، އެމީހުން ދެނެގަތުމުގެ މަސައްކަތްކުރީ، އާންމުންނަށް ހުޅުވާލައިގެން ލިބުނު މަޢުލޫމާތާއި ފުލުހުން ހެދި ކްރޮސް މެޗްތަކުން ކަމަށެވެ. އެގޮތުން ފުލުހުން އިއްޔެ ވަނީ ބުދަ ދުވަހުގެ ރެއިން ފެށިގެން ވާނުވާ ނޭނގި ގެއްލިފައިވާ ބިދޭސީންގެ މަޢުލޫމާތު ހިއްސާކޮށްދިނުމަށް އެދިވަޑައިގެންފައެވެ.
