ރާއްޖޭގެ މުޅި ޝަރުޢީ ދާއިރާ މިހާރު އޮތީ ހައިޖެކުކޮށްފައިކަމަށާއި، ހުރިހާ ފަނޑިޔާރުން ވެސް ތިއްބެވީ ރަހީނުވެފައިކަމަށް އިދިކޮޅު ރިޔާސީ ކެނޑިޑޭޓު އަދި ޕީޕީއެމް/ޕީއެންސީގެ ރައީސް، ރައީސް ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ މިހާރު އައްޑޫ ސިޓީއަށް ކުރައްވަމުންދާ ކެމްޕެއިން ދަތުރުފުޅުގައި ހިތަދޫގައި ރޭ ބޭއްވި ޖަލްސާގައި ވާހަކަދައްކަވަމުންނެވެ. ރައީސް ޔާމީން ވިދާޅުވީ އެމަނިކުފާނުގެ ވެރިކަމުގައި، ޝަރުޢީ ދާއިރާ އޮތީ އެމަނިކުފާނުގެ ސަރުކާރުގެ ބާރުގެ ދަށުގައިކަމަށްބުނެ އޭރުގެ އިދިކޮޅު ފަރާތްތަކުން ވަރަށްބޮޑަށް ފާޑު ކިޔާފައިވާކަމަށާ، މިއަދުގެ ޙާލަތަށް ބަލާލުމުން ކުރިން އެގޮތަށް ފާޑުކީ މީހުން ތިބީ ވެރިކަމުގައިކަމަށެވެ. އެހެންނަމަވެސް މިއަދު ޖުޑީޝަލް ސާވިސް ކޮމިޝަނާއި މުޅި ޖުޑިޝަރީގެ މައްޗަށް ސަރުކާރުގެ ނުފޫޒު އޮތް މިންވަރު އިހުނަށްވުރެ ކޮންމެ މީހަކަށްވެސް ވަޒަންކޮށްލެވޭނެކަމަށެވެ. ޖޭއެސްސީ އޮތީ އެމްޑީޕީގެ ދަށުގައިކަމަށް ރައީސް ޔާމީން ތުހުމަތުކުރެއްވިއެވެ.
ރާއްޖޭގެ ހުރިހާ ފަނޑިޔާރުން މިވަގުތު ތިބީ "ރަހީނުކޮށްފައި"ކަމަށް ސިފަކުރައްވަމުން ޔާމީން ވިދާޅުވީ، ފަނޑިޔާރުން ތިބީ ބިރުވެރިކަމެއްގެ ތެރޭގައިކަމަށެވެ. ރައީސް ޔާމީންވަނީ ފުލުހުންނަށާއި މުޅި ޢަދު އިންސާފުގެ ދާއިރާއަށްވެސް ސަރުކާރުގެ ސިޔާސީ ނުފޫޒު އިންތިހާއަށް އޮތްކަމަށް ތުހުމަތުކުރައްވާފައެވެ. އެމަނިކުފާނު ވިދާޅުވީ ފުލުހުން މުއައްސަސާ މިއަދު ބޭނުންކުރެވެނީ، ސަރުކާރުން ބޭނުންވާ ސިޔާސީ މީހުންގެ މައްޗަށް ކަންކަން އުފައްދައިގެން އެމީހުން ފްރޭމްކުރަން ބޭނުންކުރާ ތަނެއްގެގޮތުގައިކަމަށެވެ.
ރައީސް ޔާމީން މިހެން ވިދާޅުވިއިރު މިކަންކަމަކީ، އެމަނިކުފާނުގެ ވެރިކަމުގައި ކުރެއްވިކަމަށް މިހާރުގެ ސަރުކާރަށް ތާޢީދުކުރާ މީހުން މިއަދުވެސް ތުހުމަތުކުރާ ކަންކަމެވެ.
