އިދިކޮޅު ރިޔާސީ ކެނޑިޑޭޓް އަދި ޕީޕީއެމްގެ ރައީސް ޔާމީން އައްޑޫ ސިޓީއަށް ވަޑައިގެންނެވުމުން އެސިޓީން އެމަނިކުފާނަށް ހޫނު މަރުޙަބާއެއް ދަންނަވައިފިއެވެ.
ރިޔާސީ އިންތިޚާބުގެ ކެމްޕެއިންގައި އިދިޅު ޕީޕީއެމްއިން އަތޮޅުތެރޭގެ ރަށްތަކަށް ފަށާފައިވާ ދަތުރުގައި ރައީސް ޔާމީން ގެންދަަވަނީ އެކި އަތޮޅުތަކަށް ވަޑައިގެން ރައްޔިތުންނާއި ބައްދަލު ކުރައްވަމުންނެވެ. އެންމެ ފަހުން ރައީސް ޔާމީން ވަޑައިގެންނެވީ ނ.އަތޮޅުގެ ރަށްތަކަށެވެ.
ޔާމީން އައްޑުއަށް ވަޑައިގެންނެވީ މިއަދު ދޭއް ޖަހާކަން ހާއިރުއެވެ. ޔާމީން ވަޑައިގެންނެވި ފްލައިޓް އައްޑޫ އިންޓަނޭޝަނަލް އެއަރޕޯޓަށް ޖެއްސީއިރުވެސް އެތައް ވަގުތެއްކުރިން އެމަނިކުފާނަށް މަރުޙަބާ ދެންނެވުމަށް އެތައް ސަތޭކަ ބަޔަކު އޮތީ އެއްވެފައެވެ. އައްޑޫގެ އެކި ރަށްތަކުން އެތައް ސަތޭކަ ބަޔަކު ޔާމީނަށް މަރުހަބާ ދަންނަވަން އެއާޕޯޓަށް އެއްވިއެވެ.
މިއަދަކީ އައްޑޫ އަށް މޫސުންގޯސް ވިއްސާރަ ދުވަހެއްކަމަށްވިޔަސް ޔާމީނަށް މަރުޙަބާކިޔަން އެއަރޕޯޓުން ފެށިގެން އެތައްބަޔަކު ސަފުހަދާފައި އޮތެވެ.
ޔާމީންނަށް މަރުޙަބާ ދެންނެވުމަށް ނުދިއުމަށް އައްޑޫގެ، ސަރުކާރުގެ މުއައްސަސާތަކުގެ މުވައްޒަފުންނަށް ސަރުކާރުން އަންގާފައިވާކަމަށް ޕީޕީއެމްގެ ބައެއް ސަޕޯޓަރުން ބުނެއެވެ. އެގޮތުން ޔާމީން ބާއްވާ ޖަލްސާއަށް ގޮނޑި ދޫނުކުރުމަށް ސްކޫލްތަކަށް އެންގިކަމުގެ ވާހަކައެއްވެސް ފެތުރިފައިވެއެވެ.
ރައީސް ޔާމީންގެ އައްޑޫ ސިޓީގެ ދަތުރާއި ގުޅޭގޮތުން ޕީޕީއެމްގެ އޮފީހުގައި ބޭއްވި ބައްދަލުވުމުގައި ތަރުޖަމާން ހީނާ ވަލީދު ވިދާޅުވީ ރައީސް ޔާމީން އައްޑޫ ސިޓީއަށް ވަޑައިގަންނަވާނީ މިއަދުންފެށިގެން މިމަހުގެ 9 ވަނަ ދުވަހުގެ ނިޔަލަށް ކަމަށެވެ.
މި ދަތުރުފުޅުގައި ރައީސް ޔާމީން އައްޑޫގައި މީހުން ދިރިއުޅޭ ހުރިހާ ރަށަކަށް ވެސް ވަޑައިގަންނާވާނެ ކަމަށް އޭނާ ވިދާޅުވިއެވެ. އެ ދަތުރުފުޅުގައި އައްޑޫގެ ރައްޔިތުންނާއި ޕީޕީއެމްގެ ސްޓީރިން ކޮމިޓީތަކުގައި އިސްކޮށް މަސައްކަތް ކުރައްވާ އިސް ބޭފުޅުންނާއި ޕީޕީއެމްގެ އިސް ބޭފުޅުންނާ ބައްދަލުކުރައްވާނެ ކަމަށް ހީނާ ވިދާޅުވިއެވެ.
ހީނާ ވިދާޅުވީ، ވަކި ޕާޓީއަކަށް ބެލުމެއް ނެތި އައްޑޫގެ ހުރިހާ ރައްޔިތުންނާ ބައްދަލުކުރުމުގެ ފުރުސަތު ވެސް މި ފަހަރު އޮންނާނެ ކަމަށާއި، ރައީސް ޔާމީންއާ ބައްދަލުކުރަން ބޭނުންވާ ފަރާތްތަކުން ޕީޕީއެމްގެ ސްޓިއަރިން ކޮމިޓީތަކާ ވާހަކަ ދައްކައިގެން އެކަން ހަމަޖެހޭނެ ކަމަށެވެ.
މީގެއިތުރުން ހީނާ ވިދާޅުވީ ރައީސް ޔާމީންގެ ކުރިއަށް އޮތް ވެރިކަމެއްގައި އައްޑޫ ސިޓީގެ ތަރައްގީއަށް އަދި އައްޑޫއަށް ރައީސް ޔާމީންގެ ފަރާތްޕުޅުން ކޮށްދެއްވަން ބޭނުންވަނީ ކޮންކަހަލަ ކަންތައްތަކެއްތޯ ބަލައި އަދި އެ ވާހަތަކުގައި އަލީގައި ރައީސް ޔާމީން އައްޑޫއާ ދޭތެރޭ ދެކެވަޑައިގަންނަވާ ތަސައްވަރު ހާމަކުރައްވަން އެ މަނިކުފާނު ވަރަށް ބޮޑަށް ބޭނުންފުޅުވާ ކަމަށެވެ.
