ޕްރޮގްރެސިވް ކޯލިޝަންގެ އެތެރޭގެ އިންތިޚާބުގައި ޕާޓީގެ ރައީސް ޔާމީނާއި، އެކޯލިޝަންގެ ލީޑަރޝިޕުން ތާއީދުކުރާނެ ކެނޑިޑޭޓަކު ނުހުންނާނެކަމަށް ޕްރޮގްރެސިވް ކޯލިޝަނުން ބުނެފިއެވެ.
އެކޯލިޝަނުން މިހެން ބުނެފައިވަނީ މާދަމާ ބޭއްވުމަށް ހަމަޖެހިފައިވާ އެކޯލިޝަންގެ އިންތިޚާބާއި ގުޅިގެން ޗެނަލް ތޭރައިން ގެނެސްދޭ ޕްރޮގްރާމެއްގައި ވަކި ކެނޑިޑޭޓުންތަކެއް ޕްރޮމޯޓްކުރަމުންދާތީ އެކަން ކުށްވެރިކޮށް ނެރުނު ބަޔާނެއްގައެވެ.
އެކޯލިޝަނުން ނެރުނު ބަޔާނުގައި ބުނެފައިވަނީ ޕްރޮގްރެސިވް ކޯލިޝަންގެ ދާއިރާ އިންތިޚާބުގައި ވާދަކުރާ ވަކި ކެނޑިޑޭޓުން ޕްރޮމޯޓްކޮށް އެ ކެނޑިޑޭޓުންނަށް ވޯޓު ދިނުމަށް "މަޑިސީލަ" ޕްރޮގުރާމު ހުށަހަޅައި ދެއްވާ ބައެއް ފަރާތްތަކުން ބުނަމުން ގެންދިއުމަކީ ބަލައި ގަންނަ ކަމެއް ނޫންކަމަށެވެ. އަދި އެއީ އެކޯލިޝަނުން ނުވަތަ ކޯލިޝަނުން އަންގައިގެން ކުރާކަމެއް ނޫންކަމަށްވެސް ވަނީ ބުނެފައެވެ.
މި އިންތިޚާބުގައި ވާދަކުރާ ކެނޑިޑޭޓުންގެ ތެރެއިން ޕާޓީގެ ރައީސް ނުވަތަ ޕާޓީގެ ލީޑަރޝިޕް އެންޑޯޒްކޮށްގެން ނިކުމެފައިވާ އެއްވެސް ކެނޑިޑޭޓެއް ނުހުންނާނެކަމުގެ ޔަގީންކަން އެކޯލިޝަނުން ވަނީ ދީފައެވެ.
އިދިކޮލު ކޯލިޝަންގެ ދާއިރާ އިންތިހާބުގައި ވޯޓު ނަގަން ޖެހޭ ދާއިރާތަކާއި ރަށްރަށުގެ ވޯޓު ނެގުން ކުރިއަށް ގެންދާނީ މާދަމާ ހެނދުނު 10:00 އިން 4:00 އަށް ކަމަށެވެ. އެގޮތުން ހަވީރު 4:00 އާއި ހަމައަށް ވޯޓުލުމަށް ކިއޫ އާއި ގުޅޭ މެންބަރުންނަށް ވޯޓު ލުމުގެ ފުރުސަތު ލިބޭނެއެވެ.
އެ އިންތިހާބުގައި ވޯޓު ދެވޭނީ އިދިކޮޅުން ބުނި ގޮތުގައި އެ ކޯލިޝަންގެ ފަރާތުން އިންތިހާބުގެ ކަންކަން ކުރިއަށް ގެންދިއުމަށް ހަވާލުކޮށްފައިވާ ކޮމިޓީން ވޯޓު ނަގާ މަރުކަޒުތަކަށް ފޮނުވާފައިވާ ވޯޓާސް ލިސްޓުގައި ނަން އޮތް ފަރާތްތަކަށް އެކަންޏެވެ. އެ ފަރާތްތަކުގެ ތެރެއިން ވޯޓު ލާން އަންނަ މީހާއަކީ ކާކުކަން އަންގައިދިނުމަށް ގެންނަ ރަސްމީ ލިޔުމުގެ މުއްދަތު ހަމަވެފައިވީ ނަަމެވެސް ވޯޓު ލުމުގެ ފުރުސަތު ދެވޭނެ ކަމަށް އެ ކޯލިޝަނުން ބުނެއެވެ.
ރަށްރަށުގެ ވޯޓުލުން ކުރިއަށް ގެންދިއުމަށް ހަމަޖެހިފައިވާ ތަނުގެ މައުލޫމާތު މެންބަރުންނަށް ފޯރުކޮށްދޭނީ އެރަށެއްގެ ސްޓިއަރިން ކޮމިޓީންނެވެ. ހުޅުމާލެ އަދި ވިލިމާލެ ދާއިރާ ފިޔަވައި މާލޭގެ ދާއިރާތަކާއި، ރަށްރަށުގެ މީހުން މާލޭގައި ވޯޓުލުމުގެ އިންތިޒާމު ހަމަޖެހިފައިވަނީ ހެންވޭރު ދަނޑުގައެވެ. ވިލިމާލޭގެ ވޯޓުފޮށި ބެހެއްޓިފައި ހުންނާނީ ވިލިމާލޭ ޔޫތު ސެންޓަރުގައެވެ. އަދި ހުޅުމާލޭ ވޯޓުފޮށި ހުންނާނީ ހުޅުމާލޭ ސިންތެޓިކް ޓްރެކް ވީއައިޕީ ހޯލްގައެވެ.
