1988ވަނަ އަހަރު ދިވެހިންގެ ބަޔަކު ބޭރުގެ ކުލީ ސިފައިންނާއި އެކު ރާއްޖެ އަރައި ދިން ޢުދުވާނީ ޙަމަލާގެ މޭސްތިރިންގެ ފޮޓޯތަކާއިއެކު މާލޭގައި އިދިކޮޅު ޕްރޮގްރެސިވް ކޯލިޝަނުން ނަސްރުގެ ދުވަސް ފާހަގަކޮށްފިއެވެ.
އިދިކޮޅު ކޯލިޝަނުން މާލޭގައި ބޭއްވި މި އިހްތިޖާޖުގައި އެޕާޓީން ވަނީ މިހަމަލާގައި އިސްކޮށް ހަރަކާތްތެރިވި މީހުންގެ ނަންތައް ޓީޝާޓުތަކުގައި ލިޔެފައެވެ. އަދި އެމީހުންގެ މޫނުތައް ފެންނަ މާސްކުތަކެއް ހަދައި އެތަކެތި ވަނީ މި އިހުތިޖާޖުގައި ބޭނުންކޮށްފައެވެ.
1988 ވަނަ އަހަރުގެ ނޮވެމްބަރު މަހުގެ 3 ވަނަ ދުވަހަކީ ފަހުގެ ތާރީޚެއްގައި ރާއްޖެއަށް ކުރިމަތިވި އެންމެ ބިރުވެރި، އެންމެ ނުރައްކާތެރި ޢުދުވާނީ ޙަމަލާ އާއި ދިވެހިން ކުރިމަތިލީ ދުވަހެވެ.
Nasruge dhuvahaa gulhigen progressive congress coalition in kuriah gendhaa harakaai #RY2023 #SikkaDay pic.twitter.com/2qwv010sZx
— Progressive Party of Maldives (@ProgressPartyMV) November 3, 2022
ދިވެހިންގެ ތެރެއިން މަދު ބަޔަކު ސްރީލަންކާގެ ޓެރަރިސްޓު ޖަމާޢަތަކާއި ގުޅިގެން ހިންގި މި ނުރައްކާތެރި ބަޣާވާތުގައި 18 ވަރަކަށް ގަޑިއިރު ވަންދެން ރާއްޖޭގެ ވެރިރަށް މާލޭގެ މައްޗަށް އަތްގަދަކޮށްލައިގެން ތިބީ ޤައުމުގެ ޢަދާވަތްތެރި ދުޝްމަނުންނެވެ. ބަޣާވާތުގައި ބައިވެރިވި ދިވެހިންގެ މަދުބަޔަކާއެކު ސްރީލަންކާގެ ބާޣީ ޖަމާއަތެއްކަމަށްވާ "ޕްލޯޓް" ގެ 80 މީހުން ހިމެނުނެވެ. ޚާއިނުން ހަނގުރާމަ ކުރަމުން ގެންދިޔައީ މުޅި ޤައުމު އެބައިމީހުންގެ އަތްމައްޗަށް ގެންދިއުމަށްޓަކައެވެ.
ނޮވެމްބަރު 3 ގެ ބާޣީންނާއި ދުޝްމަނުންގެ މަޤްޞަދަކަށްވީ މުޅި ދިވެހި ޤައުމު އެމީހުންގެ އަތްމަށްޗަށް ގެންދިއުމެވެ. މި ޢުދުވާނީ ހަމަލާގެ މޭސްތިރިޔަކީ ހ. ހާޖަރާގޭ ލުޠުފީއެވެ. ލުޠުފީއާއެކު ދިވެހިންގެ 6 މީހަކު އެކިގޮތްގޮތުން މިކަމުގައި އެހީތެރިވެފައިވެއެވެ.
ނަސްރުގެދުވަހުގެ ގޮތުގައި 3 ނޮވެމްބަރު ފާހަގަކުރަންފެށީ 1989 ނޮވެމްބަރު 3 ވަނަ ދުވަހުން ފެށިގެންނެވެ. ނަމަވެސް މިސަރުކާރުން ނަސްރުގެ ދުވަސް މާކުލަގަދަ ގޮތެއްގައި މިދައުރުގައި ފާހަގަ ނުކުރެވެއެވެ.
