ރައްޔިތުންގެ މަޖިލުހުގެ ރިޔާސަތަކީ ޚުދުމުޚްތާރު ރިޔާސަތެއްކަމަށް މޭރުންކޮށް، ޚުދުމުޚްތާރު ރިޔާސަތުގެ ކުރިމަތީގައި ރައްޔިތުންނަށް ކަންކަން ސާފުކޮށް ދިނުމާއި، ރައްޔިތުންގެ ހައްގުގައި ބަސް ބުނުމަކީ ދަތިކަމެއް ކަމުގައި ރައްޔިތުންގެ މަޖިލިހުގެ އިހަވަންދޫ ދައިރާގެ މެމްބަރު މުހައްމަދު ޝިފާއު ވިދާޅުވެއްޖެއެވެ.
ޝިފާއު މިހެން ވިދާޅުވީ ރާއްޖެއާއި މޮރިޝަސްގެ އިގްތިސާދީ ޚާއްސަ ސަރަހައްދާއި ކޮންޓިނެންޓަލް ޝެލްފްގެ އިން ކަނޑައަޅައިދޭން އެދި ރާއްޖެއާއި ދެކޮޅަށް މޮރިޝަސްއިން އިންޓަރނޭޝަނަލް ޓްރިބިއުނަލް ފޯރ ދަ ލޯ އޮފް ދަ ސީ (އިޓްލޮސް)އަށް ހުށަހަޅާފައިވާ މައްސަލާގައި ރާއްޖެގެ ސިޔާސަތު ބަދަލުވެފައި ވޭތޯ ބަލަން ރައްޔިތުންގެ މަޖިލިހަށް ހުށަހެޅި ގަރާރަށް މަޖިލިހުގައި ކުރިޔަށް ގެންދެވުނު ބަހުސްގައި ޝިފާއު ދެއްކެވި ވާހަކައަށް މަޖިލިހުގެ ރިޔާސަތުގައި އިންނެވި، މަޖިލިސް ރައީސް މުހައްމަދު ނަޝީދު ރައްދު ދެއްވުމުން ނަޝީދުގެ ވާހަކައަށް ރައްދު ދީ ވާހަކަ ދައްކަވަމުންނެވެ.
މިއަދު މަޖިލިހުގެ ޖަލްސާއަށް ހުށަހެޅުނު މިގަރާރު މަޖިލީހަށް ހުށަހެޅުއްވީ އެމްއެންޕީގެ ރައީސް، ދަގެތީ ދާއިރާގެ މެމްބަރު މުހައްމަދު ނާޒިމްއެވެ.
މިމައްސަލައަށް ވާހަކަ ދައްކަވަމުން ޝިފާއު ވިދާޅުވީ ރާއްޖޭގެ އެތައް ރައީސުންނެއް އައިސް ގޮސްފައި ވާއިރު، އަދި އެތައް ބަންޑާރަ ނާއިބުންނެވެސް ބަންޑާރަނާއިބުކަން ކޮށްފައިވާއިރު، ރާއްޖެއަށް ހޯދެން އޮތް އެއްޗެއް ނޫހޯއްދަވާ ތިއްބަފާ އެބޭފުޅުންނަށް ޒިންމާއިން ރެކި ނުގަނެވޭނެ ކަމަށެވެ.
އަދި ޝިފާއު ވިދާޅުވީ ނާޒިމް ހުށަހެޅުއްވީ ސިޔާސީ ގަރާރެއް ކަމުގައެވެ.
ޝިފާއު ވިދާޅުވީ ކުރީގެ އެއްވެސް ރައީސަކު އަދި އެއްވެސް ބަންޑާރަނާއިބަކު މީގެ ކުރިން ޗާގޮސްއަކީ ރާއްޖޭގެ ބައެއްކަމަށް ދައުވާ ކުރައްވާފައި ނުވާ ކަމަށާއި، އެ މައްސަލާގައި ބައިނަލްއަގުވާމީ ކޯޓުން އެއީ މޮރިޝަސްގެ ބައެއްކަމަށް މިއަދި ހުކުމް ކުރުމުން ރާއްޖެއިން އެ ހުކުމް ގަބޫލުކުރަން ޖެހޭ ކަމުގައެވެ. އޭނާ ވިދާޅުވި ގޮތުގައި އެއީ ރާއްޖެއިން ބައެއް ދޫކޮށްލުމަށް ވެވޭ އެއްބަސްވުމެއް ނޫންކަމުގައެވެ.
ޝިފާއުގެ ވާހަކަ ހުއްޓުވުމަށްފަހު އޭނާއަށް ރައްދު ދެއްވަމުން ނަޝީދު ވިދާޅުވެފައިވަނީ ރާއްޖޭގެ ހުރިހާ ބަންޑާރަ ނާއިބުންނާއި ހުރިހާ ވެރިންވެސް ރާއްޖޭގެ ސިޔާސީ އިގްތިސާދީ ސަރަހައްދު ހިފެހެއްޓުވުމަށް ގިނަގުނަ މަސައްކަތްތަކެއް ކުރައްވާގައި ވާކަމުގައެވެ. އަދި ރާއްޖޭގެ ސިޔާސީ އިގްތިސާދީ ސަރަހައްދު ދިވެހިންގެ ބައެއްގެ ގޮތުގައި އޮތީ އެ ސަބަބާހެދިކަމަށްވެސް ނަޝީދު ވިދާޅުވެފައި ވެއެވެ.
ނަޝިދުގެ ވާހަކަތަކަށް ރައްދު ދެއްވަމުން ޝިފާޢު ވިދާޅުވީ، ޚުދުމުޚްތާރު ރިޔާސަތެއްގެ ކުރިމަތީ ރައްޔިތުންނަށް ކަންކަން ސާފު ކޮށްދިނުމަކީ ފަސޭހަކަމެއް ނޫންކަމުގައެވެ.
ޚުދުމުޚްތާރު ރިޔާސަތުގެ ކުރިމަތީގައި ރައްޔިތުންނަށް ކަންކަން ސާފުކޮށް ދިނުމާއި، ރައްޔިތުންގެ ހައްގުގައި ބަސް ބުނުމަކީ ދަތިކަމެއް.
ޝިފާއު ވިދާޅުވިއެވެ.
ޝިފާއު އިތުރަށް ވިދާޅުވީ، އެހެން ގައުމެއްގެ ސިޔާދަތަށް އަރައިގަނެވޭ ވާހަކަ ދައްކާނަމަ، ވިދާޅުވީ އިންޑިއާ ކަނޑުގައި އޮތް މަސް ކަނޑު ހޯދަން، މަސްވެރިންގެ ހައްގުގައި މަސައްކަތް ކުރާންޖެހޭ ކަމަށެވެ. އެހާތަނުން ނަޝީދު ޝިފާއުގެ ވާހަކަ އަނެއްކާވެސް ހުއްޓުވާފައި ވެއެވެ. އަދި ޝިފާއުގެ ވަގުތު ހަމަވެއްޖެ ކަމަށް ވިދާޅުވެ، އެހެން މެމްބަރުންނަށް ފުރުސަތު ދެއްވަން އުޅުއްވުމުން، ޝިފާއުގެ ޝަކުވާ ކުރެއްވުންމުން އިތުރަށް ވާހަކަ ދައްކަވަން ނަޝީދު ދެއްވާފައިވަނީ އިތުރު އެއް މިނިޓްގެ ވަގުތުކޮޅެކެވެ.
