ރާއްޖޭގެ 34 ވަނަ ނަސްރުގެ ދުވަސް ފާހަގަކުރުމަށްޓަކައި ޚާއްސަ ޖަލްސާއެއް ބޭއްވުމަށް ސަރުކާރު ކޯލިޝަންގައި ހިމެނޭ އެމްއާރުއެމްއިން ނިންމައިފިއެވެ.
ނަސްރުގެ ދުވަސް ފާހަގަކުރަނީ 1988ވަނަ އަހަރު ދިވެހިންގެ ބަޔަކު ބޭރުގެ ކުލީ ސިފައިންނާއި އެކު ރާއްޖެ އަރައި ދިން ޢުދުވާނީ ޙަމަލާއިން ދިވެހިންނަށް ލިބުނު ނަސްރު ފާހަގަކުރުމުގެ ގޮތުންނެވެ.
މިސަރުކާރުން ނަސްރުގެ ދުވަސް މާކުލަގޮތެއްގައި ފާހަގަ ނުކުރިނަމަވެސް ނަސްރުގެ ދުވަހަކީ ރާއްޖޭގައި މީގެކުރިން އެންމެ ކުލަގަދަކޮށް ފާހަގަކުރާ އެއްދުވަހެވެ. ނަސްރުގެ ދުވަހުގެ ގޮތުގައި ނޮވެމްބަރު މަހުގެ ތިންވަނަ ދުވަސް ފާހަގަކުރަން ނިންމީވެސް ރައީސް މައުމޫނެވެ.
އެމްއާރުއެމްއިން ނަސްރުގެ ދުވަހާއި ގުޅިގެން ބާއްވާ ޚާއްސަ ޖަލްސާ ބާއްވަނީ ނޮވެމްބަރު މަހުގެ 2 ވަނަ ދުވަހުގެރޭ 20:45 ގައި ޝީ ބިލްޑީންގެ ހޯލުގައެވެ.
ނަސްރުގެ ދުވަހުގެ ޖަލްސާ.
2 ނޮވެމްބަރ 2022 (ބުދަ) ރޭގަނޑު 8:45 ގައި ޝީ ބިލްޑިންގ ހޯލްގައި. pic.twitter.com/JRp1r1avP4— Maldives Reform Movement (MRM) 🇲🇻 (@MRM_Office) October 29, 2022
ދިވެހިންގެ ތެރެއިން ޤައުމަށް ޣައްދާރުވި ބަޔަކު އިސްވެތިބެ ސްރީލަންކާގެ ޓެރަރިސްޓް ޖަމާޢަތެއްކަމަށްވާ، ތަމަޅަ ޓައިގަރުންގެ ބަޔަކާއި ގުޅިގެން މާލެއަށް ހަތިޔާރާއެކު އަރައިގަނެ، ދިވެހިންގެ ތެރެއިން އެތައް ބަޔަކު ޝަހީދުކޮށްލާފައި ވަނީ 1988ވަނައަހަރުގެ ނޮވެމްބަރުމަހުގެ 3 ވަނަ ދުވަހުއެވެ. ދިވެހިން ނަސްރުގެ ދުވަސް ފާހަގަކުރަނީ ދިވެހިރާއްޖޭގެ ޤާނޫނީ ވެރިކަމާއި، ދިވެހިރައްޔިތުންގެ މިނިވަންކަމާ ދެކޮޅަށް ބަޔަކު ދިން ނުރައްކާތެރި ބިރުވެރި މިޙަމަލާއިން ދިވެހި ޤައުމާއި ރައްޔިތުންނަށް ނަޞްރު ލިބުން ފާހަގަކުރުމަށްޓަކައެވެ.
ނަސްރުގެދުވަހުގެ ގޮތުގައި 3 ނޮވެމްބަރު ފާހަގަކުރަންފެށީ 1989 ނޮވެމްބަރު 3 ވަނަ ދުވަހުން ފެށިގެންނެވެ.
