ޓެކްސް ބޮޑުކުރުމާ ބެހޭ ގޮތުން އެކި ސިނާއަތްތަކުގެ އިސް ބޭފުޅުންނާ މަޝްވަރާކުރީ މިދިޔަ ޖޫންމަހު ކަމަށާއި އެހެންވީމާ މިހާރު ވެސް އެކަށީގެންވާ ވަގުތު ދެވިއްޖެ ކަމަށް ފިނޭންސް މިނިސްޓަރު އިބްރާހީމް އަމީރު މިއަދު ވިދާޅުވެއްޖެއެވެ.

ޖީއެސްޓީ އާއި ޓީޖީއެސްޓީ ބޮޑުކުރުމާ ގުޅޭގޮތުން މަޝްވަރާކުރުމަށް މިއަދު ރައްޔިތުންގެ މަޖިލީހުގެ އާންމު ކޮމެޓީއަށް ހާޒިރުވެވަޑައިގެން ވާހަކަ ދައްކަވަމުން މިނިސްޓަރ އަމީރު ވިދާޅުވީ ޓެކްސް ނެގުމާއި ޓެކްސް ބޮޑުކުރުމަކީ ކޮންމެ ގައުމެއްގައިވެސް ވިޔަފާރިވެރިން އަދި ރައްޔިތުންވެސް ތާއިދުކުރާނެ ކަމެއް ނޫން ކަމަށެވެ.

ކޮވިޑް-19ގެ ތެރޭގައި ފަތުރުވެރިކަމުގެ ސިނާއަތް ތަމްސީލްކުރާ ހުރިހާ ފަރާތްތަކާއި ބައްދަލުކުރައްވާފައިވާނެ ކަމަށާއި، އެ ބައްދަލުކުރެއްވުމުގައި ޖީއެސްޓީ އާއި ޓީޖީއެސްޓީ ބޮޑުކުރުމަށް ނިންމާފައިވަނީ ކީއްވެގެންކަން ހިއްސާކޮށްފައިވާނެ ކަމަށް މިނިސްޓަރު އަމީރު ވިދާޅުވިިއެވެ. އަމީރު ވިދާޅުވީ ޓެކްސް ބޮޑުކުރުމާ ބެހޭ ގޮތުން ވިޔަފާރިވެރިންނާ އޭރު ކުރެއްވި މަޝްވަރާގައި ބައެއް ބޭފުޅުން އެދިވަޑައިގެންނެވީ އެކަން ހަ މަސްދުވަހަށް ލަސްކޮށްލަން ކަމަށެވެ.

އަހަރެއްހާ ދުވަހަށް މަޑުޖައްސައިލަން ވެސް ބައެއް ބޭފުޅުން އެދިވަޑައިގެންނެވި ކަމަށް އޭނާ ވިދާޅުވިއެވެ. އޭރު ބައްދަލުކުރެއްވީ އޭނާ ވިދާޅުވި ގޮތުގައި މަޓީއާއި ގެސްޓްހައުސް އެސޯސިއޭޝަން ވެސް ހިމެނޭ ގޮތުން ޓޫރިޒަމް ސިނާއަތް ތަމްސީލުކުރާ ހުރިހާ ބޭފުޅުންނާއެވެ.

މިހާރު އަޅުގަނޑުމެން މަޖިލީހަށް ބިލު ފޮނުވީ ވެސް އޮގަސްޓްމަހުގައި، މިހާރު އައިސް އަޅުގަނޑުމެން މިއަންނަނީ ނޮވެމްބަރުމަހާ ހަމައަށް. އައި އިރު އަޅުގަނޑު ދަންނަވާނީ އަޅުގަނޑުމެންނަށް އެޑިކުއޭޓް ޓައިމް ވެސް ދެވިއްޖޭ. އަދި މިއީ ހަަމަ ނީޑް އޮފް ދަ އަވާ އެކޭ އަޅުގަނޑުމެން އެކަން ވީހާވެސް އަވަހަކަށް ކުރުން.

– އަމީރު ވިދާޅުވިއެވެ.

އަމީރު ވިދާޅުވީ 2020ގައި ރާއްޖޭގެ އިގްތިސާދު ދަށަށް ދިިޔައީ 35.5 އިންސައްތައަށް ކަމަށާއިި، އެހެން ނަމަވެސް 2021 ގައި އެ ހާލަތު ރަނގަޅުކޮށް 41.6 އިންސައްތަ އިގްތިސާދު ކުރިއަރާފައިވާއިރު، އެއީ އެއްވެސް ފަރާތަކުން އަންދާޒާކުރި މިންވަރެއް ނޫން ކަމަށް އަމީރު ވިދާޅުވިއެވެ. އަމީރު ވަނީ އެ ހާލަތުގައިވެސް ސަރުކާރުން ވިޔަފާރިތައް ހަރުދަނާކުރުމަށް އެތައް މަސައްކަތްތަކެއް ކޮށްދެއްވާފައިވާނެކަން ފާހަގަކުރައްވާފައެވެ.

އިގުތިސާދު އެގޮތަށް "ޖަމްޕް ޖަހަން" ފުރުސަތު ލިބުނީ ވިޔަފާރިތަކަށާއި ފަރުދުންނަށް ވެސް ސަރުކާރުން ދިން އެހީތެރިކަމުގެ ސަަބަބުން ކަމަށް ވިދާޅުވެ، އޭރު ކޮށްދިން ކަންތައްތަކުގެ ތަފްސީލު ވެސް މިނިސްޓަރު ދެއްވިއެވެ.

އެގޮތަށް އެކަން ކުރީމާ އޭގެ ކޮސްޓެއް ވެސް އެބައިން. އެ ކޮސްޓަކީ ޕަބްލިކް ފައިނޭންސަށް ވަރަށް ބޮޑު ހިޓެއް ނެގުން، ދައުލަތުގެ ދަރަނިވެސް އިތުރުވެގެން ދިއުން.

– އަމީރު ވިދާޅުވިއެވެ.

އޭނާ ވިދާޅުވީ ޖީއެސްޓީއާއި ޓީޖީއެސްޓީ ބޮޑުކުރަން ސަރުކާރުން ހުށަހެޅީ އެކަންތައްތައް ރަނގަޅުކުރަން ކަމަށެވެ. މިނިސްޓަރ ވިދާޅުވީ ކޯވިޑާއެކު ފައިސާ ހޯދުމުގައި ދަތިކަމެއް ނެތް ނަމަވެސް މިހާރު އެ ދަތިތައް އެބަހުރި ކަމަށެވެ. އެހެންކަމުން އާމްދަނީ ހޯދުމަށް ސަރުކާރުން ކުރެވެން ހުރި ކަންތައްތައްކޮށްގެން އާމްދަނީ ހޯދޭނެ އިތުރުގޮތްތައް ހޯދަން ޖެހޭ ކަމަށެވެ.

އަމީރު މިހެން ވިދާޅުވިނަމަވެސް މުދަލާއި ހިދުމަތުގެ އަގުން ނަގާ ޓެކްސް އަންނަ އަހަރުން ފެށިގެން ބޮޑުކުރުމަށް މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ)އާއި ރާއްޖޭގެ ގިނަ ވިޔަފާރިތަކުން ދަނީ ދެކޮޅު ހަދަމުންނެވެ. އަދި މަދުވެގެން 12 މަސްދުވެހުގެ މުއްދަތެއް ދޭންޖެހޭ ކަމަށް އެފަރާތްތަކުން ދަނީ ބުނަމުންނެވެ.